ନୂଆଦିଲ୍ଲୀ, ୨୫ା୮: ପଞ୍ଜାବ, ରାଜସ୍ଥାନ କଂଗ୍ରେସରେ ଅନ୍ତର୍ଦ୍ୱନ୍ଦ୍ୱ ଥମିବାର ନାଁ ଧରୁ ନ ଥିବାବେଳେ ଏବେ ଛତିଶଗଡ଼ରେ କ୍ଷମତା ହାତେଇବାକୁ ନେଇ ଦଳରେ ଫାଟ ଦେଖାଦେଇଛି। ଶାସନ ଗାଦି ହାତରେ ରଖିବାକୁ ମୁଖ୍ୟମନ୍ତ୍ରୀ ଭୁପେଶ ବାଘେଲ ଏବଂ ବରିଷ୍ଠ ନେତା ତଥା ରାଜ୍ୟ ସ୍ବାସ୍ଥ୍ୟ ମନ୍ତ୍ରୀ ଟି. ଏସ୍. ସିଂଦେଓଙ୍କ ମଧ୍ୟରେ ବିବାଦ ଘନେଇଛି। ଏହାର ସମାଧାନ ପାଇଁ ମଙ୍ଗଳବାର ଉଭୟଙ୍କୁ ଭେଟିଛନ୍ତି କଂଗ୍ରେସ ନେତା ରାହୁଲ ଗାନ୍ଧୀ। ଛତିଶଗଡ଼ରେ ମୁଖ୍ୟମନ୍ତ୍ରୀଙ୍କ ପରିବର୍ତ୍ତନ ପାଇଁ କଂଗ୍ରେସ ଉପରେ ଚାପ ପଡ଼ୁଥିବାବେଳେ ଏ ପର୍ଯ୍ୟନ୍ତ ପାର୍ଟି ହାଇକମାଣ୍ଡ ପକ୍ଷରୁ ଏ ନେଇ କୌଣସି ସଙ୍କେତ ଦିଆଯାଇନାହିଁ। ବିବାଦର ସମାଧାନ ପାଇଁ ରାହୁଲ ଉଭୟଙ୍କ ସହ ଆଲୋଚନା କରିଛନ୍ତି।
ବାସଭବନରେ ଅନୁଷ୍ଠିତ ଏହିବ ବୈଠକରେ ଛତିଶଗଡ଼ ଦାୟିତ୍ୱରେ ଥିବା ଅଲ୍ ଇଣ୍ଡିଆ କଂଗ୍ରେସ କମିଟି(ଏଆଇସିସି)ର ପି. ଏଲ୍. ପୁନିଆ ଏବଂ ଏଆଇସିସି ସାଧାରଣ ସମ୍ପାଦକ କେ. ସି. ବେଣୁଗୋପାଳ ମଧ୍ୟ ଉପସ୍ଥିତ ଥିଲେ। ଉଭୟ ନେତା ରାହୁଲଙ୍କ ସହ ପୃଥକ୍ ଭାବେ ଆଲୋଚନା କରିଥିବା ରିପୋର୍ଟ ପ୍ରକାଶ ପାଇଛି। ଏହା ପ୍ରାୟ ୩ ଘଣ୍ଟା ଧରି ଚାଲିଥିଲା। ଉଭୟଙ୍କୁ ରାହୁଲ ବୁଝାଇବା ସହ ଆଗାମୀ ଦିନରେ ଅନ୍ୟ ବରିଷ୍ଠ ନେତାଙ୍କ ଉପସ୍ଥିତିରେ ଆଉ ବୈଠକ ବସିବ ବୋଲି ନିଷ୍ପତ୍ତି ନିଆଯାଇଥିବା ଜଣାପଡ଼ିଛି। ତେବେ ଗଣମାଧ୍ୟମକୁ ସୂଚନା ଦେଇ ପୁନିଆ କହିଛନ୍ତି, ବୈଠକରେ ରାଜ୍ୟର ଉନ୍ନତିମୂଳକ କାର୍ଯ୍ୟକ୍ରମ ଉପରେ ଆଲୋଚନା ହୋଇଥିଲା। ଛତିଶଗଡ଼ର ନେତୃତ୍ୱ ସମ୍ପର୍କରେ କୌଣସି କଥା ଉଠି ନ ଥିବା ସେ ପ୍ରକାଶ କରିଛନ୍ତି। ଜୁନ୍ରେ ବାଘେରଙ୍କ ସରକାରଙ୍କୁ ଅଢ଼େଇ ବର୍ଷ ପୂରିଛି। ୨୦୧୮ରେ ନିର୍ବାଚନ ଜିତିବା ପରେ ଅଢ଼େଇ ବର୍ଷରେ ମୁଖ୍ୟମନ୍ତ୍ରୀ ପଦ ଅଦଳବଦଳ ନିମନ୍ତେ ନିଷ୍ପତ୍ତି ହୋଇଥିଲା ବୋଲି ସିଂ ଦେଓ ଦାବି କରିଛନ୍ତି। ସୋନିଆ ଗାନ୍ଧୀ ଓ ରାହୁଲ ଗାନ୍ଧୀଙ୍କ ନିଷ୍ପତ୍ତିକୁ ମାନିବେ ବୋଲି ଉଭୟେ କହିଛନ୍ତି। ଏଥିସହ ବାଘେଲ କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀଙ୍କୁ ମଧ୍ୟ ଭେଟିଛନ୍ତି।
‘ଅମରିନ୍ଦରଙ୍କ ଉପରେ ଭରସା ନାହିଁ’
କଂଗ୍ରେସ ନେତା ନଭଜ୍ୟୋତ ସିଂ ସିଦ୍ଧୁଙ୍କ ପରେ ପଞ୍ଜାବ ମୁଖ୍ୟମନ୍ତ୍ରୀ ଅମରିନ୍ଦର ସିଂଙ୍କୁ ଖୋଲାଖୋଲି ବିରୋଧ କରିଛନ୍ତି ଦଳର ୩୧ ବିଧାୟକ। ସେମାନଙ୍କ ସମେତ କେତେଜଣ ପୂର୍ବତନ ବିଧାୟକ ମଙ୍ଗଳବାର ମନ୍ତ୍ରୀ ତ୍ରିପତ ରାଜିନ୍ଦର ସିଂ ବାଜଓ୍ବାଙ୍କ ବାସଭବନରେ ଏକାଠି ହୋଇଛନ୍ତି। ଅମରିନ୍ଦରଙ୍କ ଉପରେ ଆଉ ଭରସା ନାହିଁ। ତେଣୁ ମୁଖ୍ୟମନ୍ତ୍ରୀ ପଦରୁ ତାଙ୍କୁ ହଟାଇବା ପାଇଁ ସେମାନେ ପାର୍ଟି ହାଇକମାଣ୍ଡଙ୍କୁ ଭେଟି ଦାବି ରଖିବେ ବୋଲି ନିଷ୍ପତ୍ତି ହୋଇଛି। ତେବେ ପଞ୍ଜାବ ପ୍ରଦେଶ କଂଗ୍ରେସ କମିଟି ମୁଖ୍ୟ ସିଦ୍ଧୁ ଏହି ବୈଠକରେ ଉପସ୍ଥିତ ନ ଥିଲେ। ପଞ୍ଜାବ ମନ୍ତ୍ରୀ ଚରଣଜିତ୍ ସିଂ ଚନ୍ନି କହିଛନ୍ତି, ଦଳର ୫ ମନ୍ତ୍ରୀ, ପିସିସିସି ସାଧାରଣ ସମ୍ପାଦକ ଦାୟିତ୍ୱରେ ଥିବା ପର୍ଗତ ସିଂ ଖୁବ୍ଶୀଘ୍ର ଦିଲ୍ଲୀ ଗସ୍ତ କରି ଏଆଇସିସି ମୁଖ୍ୟ ସୋନିଆ ଗାନ୍ଧୀଙ୍କୁ ଭେଟି ଏହି ଦାବି ରଖିବେ। ଅମରିନ୍ଦରଙ୍କୁ ବଦଳାଇବା ଛଡ଼ା ଅନ୍ୟ କୌଣସି ବିକଳ୍ପ ନାହିଁ ବୋଲି ବାଜଓ୍ବା କହିଛନ୍ତି। ବୈଠକରେ ୪୬ ବିଧାୟକ ଉପସ୍ଥିତ ଥିଲେ ବୋଲି ସେ ଦାବି କରିଛନ୍ତି। ଦଳରେ ଅମରିନ୍ଦରଙ୍କ ଆହୁରି ଅନେକ ବିରୋଧୀ ଥିବା ବାଜଓ୍ବା କହିଛନ୍ତି।