ନୂଆଦିଲ୍ଲୀ,୧୧।୯: ଜି-୨୦ ସମ୍ମଳିନୀରେ ରାଷ୍ଟ୍ରପତି ଦୌପଦୀ ମୁର୍ମୁଙ୍କ ପକ୍ଷରୁ ଆୟୋଜିତ ଡିନର୍ରେ ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ ଯୋଗଦେବାକୁ ନେଇ ବିବାଦ ଉପୁଜିଛି। ତାଙ୍କର ଏହି ନିଷ୍ପତ୍ତି ଉପରେ କଂଗ୍ରେସ ପ୍ରଶ୍ନ ଉଠାଇଛି। ବରିଷ୍ଠ କଂଗ୍ରେସ ନେତା ଅଧୀର ରଞ୍ଜନ ଚୌଧୁରୀ ମମତା ବାନାର୍ଜୀଙ୍କ ନିଷ୍ପତ୍ତି ଉପରେ ପ୍ରଶ୍ନ କରିଛନ୍ତି। ଏହା ନରେନ୍ଦ୍ର ମୋଦି ସରକାରଙ୍କ ବିରୋଧରେ ତାଙ୍କ ଆଭିମୁଖ୍ୟ ଦୃଢ଼ ହେବ ନାହିଁ ବୋଲି ସେ କହିଛନ୍ତି।
ତୃଣମୂଳ କଂଗ୍ରେସ (ଟିଏମସି) ସୁପ୍ରିମୋ ଏହି କାର୍ଯ୍ୟକ୍ରମରେ ଯୋଗଦେବା ପାଇଁ ଅନ୍ୟ କୌଣସି କାରଣ ଅଛି କି ନାହିଁ ବୋଲି ଅଧୀର ରଞ୍ଜନ ପ୍ରଶ୍ନ କରିଛନ୍ତି। ସେ କହିଛନ୍ତି, ବିରୋଧୀ ମେଣ୍ଟ ‘ଇଣ୍ଡିଆ’ ଗଠନ ହେବା ପାଇଁ ମମତା ଅନ୍ୟତମ ପ୍ରମୁଖ ସ୍ଥାପତ୍ୟ ଏବଂ ଆମେ ତାଙ୍କୁ ପ୍ରଶାସନିକ ଦୃଷ୍ଟିକୋଣରୁ ମାନିବାକୁ ଥିବା କିଛି ପ୍ରୋଟୋକଲ ବିଷୟରେ କହିବାର ଆବଶ୍ୟକତା ନାହିଁ। ବହୁ ଅଣ-ଭାଜପା ମୁଖ୍ୟମନ୍ତ୍ରୀ ରାତ୍ରୀ ଭୋଜନରେ ଯୋଗଦେବାକୁ ଏଡାଇ ଦେଇଥିବା ବେଳେ ଦିଦି (ମମତା ବାନାର୍ଜୀ) ଗୋଟିଏ ଦିନ ପୂର୍ବରୁ ଦିଲ୍ଲୀ ଯାଇଥିଲେ। ଏହି ଅବସରରେ ଆୟୋଜିତ କାର୍ଯ୍ୟକ୍ରମରେ କେନ୍ଦ୍ର ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହା ଏବଂ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଉପସ୍ଥିତ ଥିଲେ। ଏହି ନେତାଙ୍କ ସହ ରାତ୍ରୀ ଭୋଜନରେ ଯୋଗଦେବା ପାଇଁ ତାଙ୍କୁ ଦିଲ୍ଲୀ ଯିବାକୁ କିଏ ପ୍ରବର୍ତ୍ତାଇଲା।