ନୂଆଦିଲ୍ଲୀ,୫।୨ :ଆମେରିକାର ଶର୍ଟ ସେଲର ହିଣ୍ଡେନବର୍ଗ ରିସର୍ଚ୍ଚ ଆଦାନୀ ଗ୍ରୁପ୍ର ଜାଲିଆତିକୁ ପଦାରେ ପକାଇବା ପରେ ଏହି ଗ୍ରୁପ୍ କମ୍ପାନୀର ଶେୟାର ମୂଲ୍ୟ ହ୍ରାସ ପାଇଚାଲିଛି। ଏହି ପ୍ରସଙ୍ଗରେ କଂଗ୍ରେସ ରବିବାରଠାରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଦୈନିକ ୩ଟି ପ୍ରଶ୍ନ ପଚାରିବ ବୋଲି ଦଳର ସାଧାରଣ ସମ୍ପାଦକ ଜୟରାମ ରମେଶ କହିଛନ୍ତି। ଭାରତରୁ ବିଦେଶକୁ ଯାଉଥିବା ଏବଂ ସେଠାରୁ ଦେଶକୁ ଆସୁଥିବା କଳାଧନ ଉପରେ ନଜର ରଖିବା ଲାଗି ଏକାଧିକ ତଦନ୍ତକାରୀ ଗ୍ରୁପ୍କୁ ପ୍ରଧାନମନ୍ତ୍ରୀ ମୋଦି ବ୍ୟକ୍ତିଗତ ଭାବେ ନିର୍ଦ୍ଦେଶ ଦେଇଥିବା ୨୦୧୬ ଏପ୍ରିଲ ୪ରେ ପାନାମା ପେପର ଲିକ୍ ଘଟଣାର ଜବାବରେ ଅର୍ଥ ମନ୍ତ୍ରଣାଳୟ କହିଥିଲା। ୨୦୧୬ ସେପ୍ଟେମ୍ବର ୫ରେ ଚାଇନାରେ ହଙ୍ଗଝୋଉରେ ଜି୨୦ ସମିଟ୍ରେ ଆର୍ଥତ୍କ ଅପରାଧୀଙ୍କ ନିରାପଦ ଭୂସ୍ବର୍ଗକୁ ଧ୍ୱଂସ କରାଯିବା ଆବଶ୍ୟକ ବୋଲି ମୋଦି କହିଥିଲେ। ସେମାନଙ୍କୁ ଚିହ୍ନଟ କରିବା ଏବଂ ମନିଲଣ୍ଡରମାନଙ୍କୁ ପ୍ରତ୍ୟର୍ପଣ କରିଆଣି କାର୍ଯ୍ୟାନୁଷ୍ଠାନ କରିବା ସହ ଦୁର୍ନୀତିକୁ ଲୁଚାଉଥବା ଅତ୍ୟଧିକ ବ୍ୟାଙ୍କ ଗୋପନୀୟତା ଏବଂ ଜଟିଳ ଅନ୍ତର୍ଜାତୀୟ ନିୟମାବଳୀକୁ ରଦ୍ଦ କରିବା ପାଇଁ ମୋଦି ଆହ୍ବାନ ଦେଇଥିଲେ। ଏବେ ‘ଆମେ ଆଦାନୀଙ୍କର କିଏ’ ବୋଲି କହି ମୋଦି ସରକାର ଉପରୋକ୍ତ ପ୍ରଶ୍ନକୁ ଏଡ଼ାଇଯାଇପାରିବେ ନାହିଁ ବୋଲି ଜୟରାମ କହିଛନ୍ତି।
ସୂଚନାଯୋଗ୍ୟ, ଆଦାନୀ ଗ୍ରୁପ୍ ବିରୋଧରେ ଅଭିଯୋଗକୁ ନେଇ ବିରୋଧୀ ଦଳ କଂଗ୍ରେସ କେନ୍ଦ୍ର ସରକାରଙ୍କ ରବିବାର କଡ଼ା ସମାଲୋଚନା କରିଛି। ଏହି ପ୍ରସଙ୍ଗରେ ନରେନ୍ଦ୍ର ମୋଦି ସରକାରଙ୍କ ନୀରବତାରୁ ଗୋପନ ବୁଝାମଣାର ଗନ୍ଧ ଆସୁଛି ବୋଲି କଂଗ୍ରେସ କହିଛି।
