ନୂଆଦିଲ୍ଲୀ,୨୭।୪ : କର୍ନାଟକ ବିଧାନସଭା ନିର୍ବାଚନ ପାଖେଇ ଆସୁଥିବାରୁ ସମସ୍ତ ଦଳ ନିଜର ପ୍ରଚାର ଅଭିଯାନକୁ ତ୍ୱରାନ୍ବିତ କରିଛନ୍ତି। ଏହି ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦଳର କର୍ମୀଙ୍କୁ ଭେଟି ଭାଜପା ଜିତିବାରେ ସାହାଯ୍ୟ କରିବାକୁ ସେମାନଙ୍କୁ ଗୁରୁ ମନ୍ତ୍ର ଦେଇଛନ୍ତି। ପ୍ରଧାନମନ୍ତ୍ରୀ କର୍ମୀମାନଙ୍କୁ କହିଛନ୍ତି, ଭାଜପା ଜିତିବାରେ କେବଳ ସେମାନେ ହିଁ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରନ୍ତି।
ପ୍ରଧାନମନ୍ତ୍ରୀ ମୋଦି ଏକ ଭର୍ଚୁଆଲ ବୈଠକରେ ଯୋଗଦେଇ କର୍ମୀଙ୍କୁ ଘର ଘର ବୁଲିବାକୁ କହିଛନ୍ତି। ରାଜ୍ୟରେ ଭାଜପା ସରକାର କ୍ଷମତାକୁ ଆସିବା ପରେ ବିକାଶ କିପରି ହୋଇଛି ତାହା ଲୋକଙ୍କୁ ଜଣାଇବାକୁ ପଡିବ।
ତାଙ୍କ ସମ୍ବୋଧନରେ ପ୍ରଧାନମନ୍ତ୍ରୀ ମୋଦି କଂଗ୍ରେସକୁ କଡ଼ା ସମାଲୋଚନା କରିଛନ୍ତି। ପ୍ରଧାନମନ୍ତ୍ରୀ କହିଛନ୍ତି କଂଗ୍ରେସ ଯୁଗରେ ବିକାଶ ପରିବର୍ତ୍ତେ କେବଳ ଦୁର୍ନୀତି ବିଷୟରେ ଆଲୋଚନା ହୋଇଥିଲା। ୭୦ବର୍ଷର କଂଗ୍ରେସ ସରକାର ଅପେକ୍ଷା ଆମ ସରକାରର ୧୦ବର୍ଷର କାମ ଅଧିକ ରହିଛି।
କଂଗ୍ରେସର ନିଜସ୍ବ ୱାରେଣ୍ଟି ବର୍ତ୍ତମାନ ଶେଷ ହୋଇଛି, ତେଣୁ ଏହାର ଗ୍ୟାରେଣ୍ଟି ଉପରେ କେହି ବିଶ୍ୱାସ କରିବେ ନାହିଁ। କଂଗ୍ରେସ ଏବେ ଦୁର୍ନୀତି ଏବଂ ମିଥ୍ୟା ପ୍ରତିଶ୍ରୁତିର ଏକ ଦଳ ପାଲଟିଛି ବୋଲି ପ୍ରଧାନମନ୍ତ୍ରୀ କହିଛନ୍ତି।