କାଙ୍ଗ୍ରା,୫ା୧୧(ପି.ଟି.): ହିମାଚଳପ୍ରଦେଶ ବିଧାନସଭା ନିର୍ବାଚନରେ କଂଗ୍ରେସ ବିଜୟୀ ହୋଇ କ୍ଷମତାକୁ ଫେରିଲେ ରାଜ୍ୟରେ ଲକ୍ଷେ ନିଯୁକ୍ତି ପ୍ରଦାନ କରିବା ସହ ପୁରୁଣା ପେନ୍ସନ ଯୋଜନା କାର୍ଯ୍ୟକାରୀ କରିବ ବୋଲି ଶୁକ୍ରବାର ଦଳର ସାଧାରଣ ସମ୍ପାଦିକା ପ୍ରିୟଙ୍କା ଗାନ୍ଧୀ ଭଦ୍ରା ପ୍ରତିଶ୍ରୁତି ଦେଇଛନ୍ତି। ଏଥିସହିତ ରାଜ୍ୟର ପ୍ରତ୍ୟେକ ମହିଳାଙ୍କୁ ୧,୫୦୦ ଟଙ୍କା ଲେଖାଏ ଆର୍ଥତ୍କ ସହାୟତା ଯୋଗାଇ ଦିଆଯିବ ବୋଲି ପ୍ରିୟଙ୍କା କହିଛନ୍ତି। କାଙ୍ଗ୍ରାଠାରେ ଏକ ସାଧାରଣ ସଭାରେ ଉଦ୍ବୋଧନ ଦେଇ ପ୍ରିୟଙ୍କା କହିଥିଲେ, ରାଜ୍ୟରେ ଅତ୍ୟଧିକ ନିଶା କାରବାର ଯୋଗୁ ଯୁବତୀଯୁବକଙ୍କ ଭବିଷ୍ୟତ ଅନ୍ଧକାର ମଧ୍ୟକୁ ଠେଲିହୋଇ ଯାଉଛି। କଂଗ୍ରେସ ଏହା ବିରୋଧରେ ଲଢ଼େଇ କରିବା ସହ ପ୍ରତି ନିର୍ବାଚନ ମଣ୍ଡଳୀରେ ଇଂଲିଶ ମିଡିୟମ ସ୍କୁଲ୍ ଖୋଲାଯିବ ବୋଲି ପ୍ରିୟଙ୍କା କହିଛନ୍ତି। ଭାଜପା ସରକାରରେ ରାଜ୍ୟ ଋଣଭାରରେ ବୁଡ଼ିଗଲାଣି। ୬୩,୦୦୦ ସରକାରୀ ପଦବୀ ଖାଲି ପଡ଼ିଛି। ଛତିଶଗଡ଼ ଓ ରାଜସ୍ଥାନ ଭଳି ହିମାଚଳପ୍ରଦେଶରେ କଂଗ୍ରେସ ତା’ର ସମସ୍ତ ପ୍ରତିଶ୍ରୁତି ପୂରଣ କରିବ। ଛତିଶଗଡ଼ରେ ଭୂପେଶ ବଘେଲ ସରକାର ୩ ବର୍ଷରେ ୫ ଲକ୍ଷ ନିଯୁକ୍ତି ପ୍ରଦାନ କରିଥିବାବେଳେ ରାଜସ୍ଥାନରେ କଂଗ୍ରେସ ସରକାର ୧.୩୦ ଲକ୍ଷଙ୍କୁ ନିଯୁକ୍ତି ଯୋଗାଇ ଦେଇଥିବା ପ୍ରିୟଙ୍କା କହିଥିଲେ।