ବେଙ୍ଗାଲୁରୁ,୭।୩ : କର୍ନାଟକ ବିଧାନସଭାର କାର୍ଯ୍ୟକାଳ ୨୪ ମେ ୨୦୨୩ ରେ ଶେଷ ହେବାକୁ ଯାଉଛି। ଏଭଳି ପରିସ୍ଥିତିରେ ଚଳିତ ମାସରେ ବିଧାନସଭା ନିର୍ବାଚନ ହେବାର ସମ୍ଭାବନା ରହିଛି। ଏହି ସମୟରେ କର୍ନାଟକ କଂଗ୍ରେସ ରାଜ୍ୟ ଅଧ୍ୟକ୍ଷ ଡି.କେ ଶିବକୁମାର ଦାବି କରିଛନ୍ତି ଯେ ସର୍ଭେରୁ ଜଣାପଡିଛି ଯେ ଆସନ୍ତା ବିଧାନସଭା ନିର୍ବାଚନରେ ତାଙ୍କ ଦଳ ମୋଟ ୨୨୪ଟି ଆସନ ମଧ୍ୟରୁ ୧୪୦ ରୁ ଅଧିକ ଆସନ ପାଇବ। ଦୁଇ ପୂର୍ବତନ ଭାଜପା ବିଧାୟକ ତଥା ମହୀଶୂରର ପୂର୍ବତନ ମେୟର ଦଳରେ ଯୋଗଦେବା ପରେ ସେ ଗଣମାଧ୍ୟମକୁ ଏହା କହିଛନ୍ତି।
ଭାଜପା ଛାଡି କଂଗ୍ରେସରେ ଯୋଗ ଦେଇଥିବା ତିନିଜଣ ନେତାଙ୍କ ମଧ୍ୟରେ ପୂର୍ବତନ କୋଲେଗାଲ ବିଧାୟକ ଜି ଏନ ନାନଜୁଣ୍ଡ ସ୍ବାମୀ ଏବଂ ପୂର୍ବତନ ବିଜେପୁର ବିଧାୟକ ମନୋହର ଏନାପୁର ଏବଂ ମହୀଶୂରର ପୂର୍ବତନ ମେୟର ପୁରୁଷୋତ୍ତମ ଅଛନ୍ତି।
ଶିବକୁମାର କହିଛନ୍ତି, ବହୁ ପୂର୍ବତନ ବିଧାୟକ ଭାଜପା ଛାଡି କଂଗ୍ରେସରେ ଯୋଗ ଦେଉଛନ୍ତି। ଆଗାମୀ ଦିନରେ, ଆମେ ଯୋଗଦେବାକୁ ବସିଥିବା ବିଧାୟକଙ୍କ ତାଲିକା ମଧ୍ୟ ଘୋଷଣା କରିବୁ। ଏ ବାବଦରେ ଆଲୋଚନା ଚାଲିଛି। ମୁଁ ବର୍ତ୍ତମାନ କୌଣସି ନାମ ପ୍ରକାଶ କରିବି ନାହିଁ। ସେ କହିଛନ୍ତି ଯେ ନେତାମାନେ ବିନା ସର୍ତ୍ତରେ କଂଗ୍ରେସରେ ଯୋଗ ଦେଉଛନ୍ତି ଏବଂ ଦଳର ଆଦର୍ଶ ଏବଂ ନେତୃତ୍ୱକୁ ଗ୍ରହଣ କରୁଛନ୍ତି। ଜିଲାସ୍ତରରେ ବହୁ ନେତା ଦଳରେ ଯୋଗ ଦେଉଛନ୍ତି, କିଛି ପ୍ରତିଷ୍ଠିତ ନେତାଙ୍କୁ ଏଠାରେ ଅଣାଯାଉଛି। ଏଥିରୁ ସ୍ପଷ୍ଟ ହୋଇଛି ଯେ ଜନମତ କଂଗ୍ରେସ ସପକ୍ଷରେ ଅଛି।
