ନୂଆଦିଲ୍ଲୀ,୫।୧୨: ରାଜସ୍ଥାନ, ମଧ୍ୟପ୍ରଦେଶ ଓ ଛତିଶଗଡରେ କଂଗ୍ରେସ ଧରାଶାୟୀ ହେବା ପରେ ଏବେ କଂଗ୍ରେସର ଭବିଷ୍ୟତକୁ ନେଇ ପ୍ରଶ୍ନ ଉଠିବାରେ ଲାଗିଛି। ବିରୋଧୀ ମେଣ୍ଟ ଇଣ୍ଡିଆର ନେତା ତଥା ଏମପି ରାହୁଲ ଗାନ୍ଧୀଙ୍କୁ ଓ୍ବାଏନାଡରୁ ଆଗାମୀ ଲୋକସଭା ନିର୍ବାଚନ ନ ଲଢିବାକୁ ପରାମର୍ଶ ଦିଆଯାଇଛି। ତାଙ୍କୁ ଓ୍ବାଏନାଡ ପରିବର୍ତ୍ତେ ଉତ୍ତର ଭାରତରୁ ଲଢିବାକୁ ପରାମର୍ଶ ଦିଆଯାଇଛି। ୨୦୧୯ ଲୋକସଭା ନିର୍ବାଚନରେ ରାହୁଲ କଂଗ୍ରେସର ଗଡ କୁହାଯାଉଥିବା ଉତ୍ତର ପ୍ରଦେଶର ଆମେଠିରୁ ନିର୍ବାଚନ ଲଢି ପରାଜିତ ହୋଇଥିଲେ।
ଇଣ୍ଡିଆ ମେଣ୍ଟରେ ସାମିଲ ହୋଇଥିବା ସିପିଏମର ବରିଷ୍ଠ ନେତା ଏମବି ଗୋବିନ୍ଦନ କଂଗ୍ରେସର କେରଳରେ ଲଢିବାକୁ ଥିବା ନିଷ୍ପତ୍ତି ଉପରେ ପ୍ରଶ୍ନ କରିଛି। ଏକ ଜାତୀୟ ଗଣମାଧ୍ୟମକୁ ସାକ୍ଷାତକାରରେ ସିପିଏମ ନେତା କହିଛନ୍ତି, କଂଗ୍ରେସର ଏପରି ପରାଜୟକୁ ନେଇ ଯେକେହି ବି କହିବ ଯେ, କଂଗ୍ରେସ ଆଗାମୀ ନିର୍ବାଚନ ଓ୍ବାଏନାଡରୁ ନ ଲଢୁ ।
କେରଳରେ ଭାଜପା ନାହିଁ। ରାହୁଲ ଭାଜପା ବିରୋଧରେ ନିର୍ବାଚନ ଳଢିବା ଉଚିତ। ଏଲଡିଏଫ ବିରୋଧରେ ନୁହେଁ। ଯଦି ରାହୁଲ ଏଲଡିଏଫ ବିରୋଧରେ ନିର୍ବାଚନ ଲଢନ୍ତି ତେବେ ଦୁନିଆକୁ ଏଇ ସନ୍ଦେଶ ଯିବ ଯେ ରାହୁଲ ଭାଜପା ବିରୋଧରେ ନୁହେଁ ବାମ ଦଳ ବିରୋଧରେ ଲଢୁଛନ୍ତି। ରାହୁଲଙ୍କୁ ଭାଜପାର ଗଡକୁ ଯାଇ ନିର୍ବାଚନ ଲଢିବା ଉଚିତ।