ପନ୍ତନମଥିଟ୍ଟା,୧୮।୪: ଲୋକ ସଭା ନିର୍ବାଚନ ୨୦୨୪ ପାଇଁ ଶଙ୍ଖନାଦ ହୋଇଛି ଏବଂ ପ୍ରଥମ ପର୍ଯ୍ୟାୟ ଭୋଟ ଆସନ୍ତାକାଲି ଅର୍ଥାତ୍ ଶୁକ୍ରବାର ହେବ। ସେପଟେ କେନ୍ଦ୍ର ପ୍ରତିରକ୍ଷା ମନ୍ତ୍ରୀ ତଥା ଭେଟେରାନ ଭାଜପା ନେତା ରାଜନାଥ ସିଂ କଂଗ୍ରେସ ନେତା ରାହୁଲ ଗାନ୍ଧୀଙ୍କୁ ଟାର୍ଗେଟ କରିଛନ୍ତି। ବରିଷ୍ଠ ଭାଜପା ବା ଭାରତୀୟ ଜନତା ପାର୍ଟି ନେତା ରାଜନାଥ ସିଂ ଗୁରୁବାର କଂଗ୍ରେସ ନେତା ରାହୁଲ ଗାନ୍ଧୀଙ୍କୁ ଟାର୍ଗେଟ କରି କହିଛନ୍ତି ଯେ ସେ ୨୦୧୯ରେ ଆମେଠୀ ଲୋକ ସଭା ଆସନରୁ ହାରିଯାଇଛନ୍ତି, ତେଣୁ ସେ ଏଥର ସେଠାରୁ ନିର୍ବାଚନ ଲଢିବାକୁ ସାହସ କରି ନାହାଁନ୍ତି।
ରାଜନାଥ ସିଂ କହିଛନ୍ତି ଯେ ରାହୁଲ ଗାନ୍ଧୀ ପରାଜୟ ପରେ ଉତ୍ତରପ୍ରଦେଶରୁ କେରଳ ପଳାଇଛନ୍ତି। ଭାଜପା ପ୍ରାର୍ଥୀ ଅନିଲ କେ ଆଣ୍ଟୋନିଙ୍କ ସପକ୍ଷରେ ପ୍ରଚାର କରୁଥିବାବେଳେ ସେ କହିଛନ୍ତି ଯେ ମୁଁ ଶୁଣିଛି ଯେ ୱାୟାନାଡର ଲୋକମାନେ ତାଙ୍କୁ (ରାହୁଲ ଗାନ୍ଧୀ) ସେମାନଙ୍କର ଏମପି ନକରିବାକୁ ନିଷ୍ପତ୍ତି ନେଇଛନ୍ତି। ରାଜନାଥ କହିଛନ୍ତି ଯେ ଦେଶରେ ବିଭିନ୍ନ ମହାକାଶ କାଯ୍ରକ୍ରମ ଓ ପରିଯୋଜନା ଲଞ୍ଚ ହୋଇଛି କିନ୍ତୁ କଂଗ୍ରେସର ଯୁବ ନେତାମାନେ ଗତ ୨୦ବର୍ଷ ମଧ୍ୟରେ ସେମାନଙ୍କୁ ‘ଲଞ୍ଚ’ କରିବାରେ ସକ୍ଷମ ହୋଇ ନାହାଁନ୍ତି।
ୱାୟାନାଡରୁ କଂଗ୍ରେସ ଏମପି ରାହୁଲ ଗାନ୍ଧୀଙ୍କୁ ଟାର୍ଗେଟ କରି ସେ କହିଛନ୍ତି ଯେ କଂଗ୍ରେସ ଦଳର ‘ରାହୁଲୟାନ’ ଆରମ୍ଭ ହୋଇପାରିବ ନାହିଁ କିମ୍ବା ଏହା କୌଣସି ସ୍ଥାନରେ ଅବତରଣ କରିପାରିବ ନାହିଁ। ରାଜନାଥ ସିଂ ତାଙ୍କ ସମ୍ବୋଧନରେ କଂଗ୍ରେସର ବରିଷ୍ଠ ନେତା ଏ.କେ ଆଣ୍ଟୋନିଙ୍କୁ ପ୍ରଶଂସା କରିଥିଲେ ଏବଂ ତାଙ୍କୁ ଜଣେ ଅନୁଶାସିତ ଏବ ସିଦ୍ଧାନ୍ତବାଦୀ ବ୍ୟକ୍ତି ଭାବରେ ବର୍ଣ୍ଣନା କରିଥିଲେ, ଯାହାର ସଚ୍ଚୋଟତା ଏବଂ ଅଖଣ୍ଡତା ଉପରେ ପ୍ରଶ୍ନ କରାଯାଇପାରିବ ନାହିଁ।
