ନୂଆଦିଲ୍ଲୀ,୧୬।୧୧: ଚଳିତ ନିର୍ବାଚନରେ ଜମ୍ମୁ କଶ୍ମୀରରେ ନାଶନାଲ କନଫରେନ୍ସ କଂଗ୍ରେସ ସହ ମେଣ୍ଟ କରି ସରକାର ଗଠନ କରିଛି। ତେବେ ନିଜ ମନ ମୁତାବକ ପଦ ନ ମିଳିବାରୁ କଂଗ୍ରେସ ମୁଖ୍ୟମନ୍ତ୍ରୀଙ୍କ ଓମାରଙ୍କ କ୍ୟାବିନେଟରେ ସାମିଲ୍ ହୋଇନାହିଁ। କିନ୍ତୁ ସମର୍ଥନ ଜାରି ରଖିବ ବୋଲି କହିଛି। କିନ୍ତୁ ଏହାରି ଭିତରେ ଏପରି ଏକ ଘଟଣା ଦେଖିବାକୁ ମିଳିଛି ଯେଉଁଥିରେ ମେଣ୍ଟ ସରକାରରେ ଫାଟ ହେବ ବୋଲି ଅନୁମାନ କରାଯାଉଛି। ସରକାର ଆସିବା ପୂର୍ବରୁ ଓମାରଙ୍କ ସରକାର ୩୭୦ ଧାରା ପୁଣି ଲାଗୁ କରିବ ବୋଲି ଘୋଷଣା କରିଥିଲା। ତେବେ ଏହାକୁ ଜମ୍ମୁ କଶ୍ମୀର ବିଧାନସଭାରେ ସମର୍ଥନ କରାଯାଇଥିବାବେଳେ କେବଳ କେନ୍ଦ୍ର ସରକାରଙ୍କ ପାଖରେ କଥା ଅଟକିଛି। କିନ୍ତୁ ଏହାରି ଭିତରେ ଦେଖିବାକୁ ମିଳିଛି ଯେ, ୩୭୦ ଲାଗୁ କରିବା ନେଇ କଂଗ୍ରେସ ୟୁ ଟର୍ନ ମାରିଛି।
କଂଗ୍ରେସର ରାଷ୍ଟ୍ରୀୟ ଅଧ୍ୟକ୍ଷ ମଲ୍ଲିକାର୍ଜ୍ଜୁନ ଖାର୍ଗେ ଅନୁଚ୍ଛେଦ ୩୭୦ ଲାଗୁ କରିବା ଦାବି କରିବାକୁ ନେଇ ୟୁ ଟର୍ନ ମାରିଛନ୍ତି। ଖାର୍ଗେଙ୍କ ପରେ ପରେ ଜମ୍ମୁ କଶ୍ମୀର କଂଗ୍ରେସ ମୁଖ୍ୟ ହାମିଦ କର୍ର ମଧ୍ୟ ସମାନ ଆଭିମୁଖ୍ୟ ପ୍ରକାଶ କରିଛନ୍ତି। ସେ କହିଛନ୍ତି, ନିକଟରେ ବିଧାନସଭାରେ ପାରିତ ପ୍ରସ୍ତାବରେ ଅନୁଚ୍ଛେଦ ୩୭୦ ପ୍ରସ୍ତାବ ଲାଗୁ କରିବା ନେଇ କୌଣସି ଦାବି କରାଯାଇନାହିଁ। ଆମେ ପୂର୍ବରୁ ସ୍ପଷ୍ଟ କରିସାରିଛୁ, ସୁପ୍ରିମକୋର୍ଟଙ୍କ ୩୭୦ ନିଷ୍ପତ୍ତି ବାଦ୍ ଆମେ କେବଳ ଜମ୍ମୁ କଶ୍ମୀରରେ ପୂର୍ଣ୍ଣ ରାଜ୍ୟ ମାନ୍ୟତା ଦେବାପାଇଁ ଦାବି କରିଛୁ। ତେବେ କଂଗ୍ରେସର ଏହି ୟୁଟର୍ନ କ୍ଷମତାସୀନ ନାଶନାଲ କନଫରେନ୍ସ ସରକାରଙ୍କୁ ଖୋଲା ଟାର୍ଗେଟ କରିଛି।
ଏହାକୁ ନେଇ ଏନସି ନେତା ତଥା ଏମପି ଅଗା ରହୁଲ୍ଲା କଂଗ୍ରେସକୁ କଡ଼ା କାଉଣ୍ଟର କରିଛନ୍ତି। ସେ କହିଛନ୍ତି, କାହାକୁ ବି ଏହି ଅଧିକାର ଦିଆଯାଇ ନାହିଁ କି ବିଧାନସଭା ଦ୍ୱାରା ପ୍ରସ୍ତୁତ ପ୍ରସ୍ତାବକୁ ଭୁଲ ରୂପରେ ଉପସ୍ଥାପନା କରିବା। କଂଗ୍ରେସ ସ୍ପଷ୍ଟ କରୁ ଯେ, ଅନୁଚ୍ଛେଦ ୩୭୦ ଲାଗୁ କରିବା ନେଇ ତା’ର ମତ କ’ଣ।
ଏକ ଜାତୀୟ ଗଣମାଧ୍ୟମର ରିପୋର୍ଟ ଅନୁସାରେ, କଂଗ୍ରେସ ଓମାର ଅବଦୁଲ୍ଲାଙ୍କ ସରକାରରେ ସାମିଲ୍ ନ ହେବା ପାଇଁ ନିଷ୍ପତ୍ତି ନେଇଥିଲା। କାରଣ ଦଳକୁ ଡର ଥିଲା କି, ଏନସି ସହ ମେଣ୍ଟ କରିବା ଘଟଣାକୁ ଭାଜପା ଆଗାମୀ ବିଧାନସଭା ନିର୍ବାଚନରେ ଏକ ହତିଆର ଭଳି ବ୍ୟବହାର କରିପାରେ। ଏନସି ୩୭୦ ଧାରାକୁ ଲାଗୁ କରିବାକୁ ଦାବି କରୁଛି। ଯାହାକୁ ଭାଜପା ଅସ୍ତ୍ର କରି ମହାରାଷ୍ଟ୍ର ଓ ଅନ୍ୟାନ୍ୟ ବିଧାନସଭା ନିର୍ବାଚନରେ କଂଗ୍ରେସ ବିରୋଧରେ ଉଠାଇପାରେ।