ଭୁବନେଶ୍ୱର,୨୦।୧୧(ବ୍ୟୁରୋ): ପ୍ରକୃତିଠୁ ଜୀବନ ଦୂରେଇ ଯିବା ହିଁ ଅନେକ ସମସ୍ୟାର କାରଣ। ଶିଶୁମାନଙ୍କୁ ପ୍ରକୃତି ସହ ଯୋଡ଼ି ରଖିବା ଶିକ୍ଷାବ୍ୟବସ୍ଥାର ପ୍ରମୁଖ ଆଭିମୁଖ୍ୟ ହେବା ଉଚିତ ବୋଲି ରାଜ୍ୟପାଳ ପ୍ରଫେସର ଗଣେଶୀ ଲାଲ କହିଛନ୍ତି। ଶନିବାର ଖାରବେଳନଗରଠାରେ ‘ଏକାମ୍ର ବାଟିକା’ ସ୍କୁଲ୍କୁ ଉଦ୍ଘାଟନ କରି ରାଜ୍ୟପାଳ କହିଲେ, ପ୍ରତ୍ୟେକ ଶିଶୁ ଅନନ୍ୟ। ତାଙ୍କୁ ନିଜଭଳି ହେବାକୁ ଦିଆଯାଉ। ସେମାନେ କାହାର ଅନୁକରଣ ନ କରନ୍ତୁ। ଶିଶୁଙ୍କ ଭିତରେ ଥିବା ଅନନ୍ତ ସମ୍ଭାବନା ଓ ସାମର୍ଥ୍ୟର ପ୍ରକାଶ ନିମନ୍ତେ ଅନୁକୂଳ ପରିବେଶ ନିର୍ମାଣ କରିବା ଉଚିତ। ଏହି ଅବସରରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭିଡିଓ ଜରିଆରେ ଶୁଭେଚ୍ଛା ବାର୍ତ୍ତା ପ୍ରଦାନ କରି କହିଲେ, ଛୋଟ ସମୟରୁ ପିଲାଙ୍କୁ ତାଙ୍କ ହିସାବରେ ଉପଯୁକ୍ତ ପରିବେଶ ଆବଶ୍ୟକ ହୋଇଥାଏ। ସେମାନଙ୍କ ପସନ୍ଦ ଅନୁସାରେ ସେମାନେ ସବୁକିଛି କରିଥାନ୍ତି। ସେମାନଙ୍କୁ ଏକ ଉପଯୁକ୍ତ ପରିବେଶ ଦେବାରେ ଏହି ବିଦ୍ୟାଳୟ ସହାୟକ ହେବ ବୋଲି ମୁଖ୍ୟମନ୍ତ୍ରୀ କହିଥିଲେ।
ବିଶିଷ୍ଟ ଶିକ୍ଷାବିତ୍ ତଥା ଉଦ୍ୟୋଗୀ ଶଶାଙ୍କ ବୀରା ଉପସ୍ଥିତ ରହି ପ୍ରାଥମିକ ସ୍ତରରେ ଗୁଣାତ୍ମକ ଶିକ୍ଷା ପ୍ରଦାନ ଉପରେ ଗୁରୁତ୍ୱାରୋପ କରିଥିଲେ। ଶିକ୍ଷାନୁଷ୍ଠାନ ସମ୍ପର୍କରେ ଅଧ୍ୟକ୍ଷା ମେଘନା ସିଂହଦେଓ ସୂଚନା ଦେଇ କହିଲେ, ଏକ ନୂତନ ବିଶ୍ୱ ପାଇଁ ପିଲାଙ୍କୁ ପ୍ରସ୍ତୁତ କରିବା ନିମନ୍ତେ ପ୍ରାଥମିକ ସ୍ତରରେ ଗୁଣାତ୍ମକ ଶିକ୍ଷା ଜରୁରୀ। ପ୍ରଗତିଶୀଳ ପାଠ୍ୟକ୍ରମ, ଛାତ୍ର କୈନ୍ଦ୍ରିକ ଭିତ୍ତିଭୂମି ଓ ଉନ୍ନତ ଶିକ୍ଷଣ ପଦ୍ଧତି ମାଧ୍ୟମରେ ଏକାମ୍ର ବାଟିକା ଉନ୍ନତ ଶିକ୍ଷାପ୍ରଦାନ କରିବ। ଉଦ୍ଘାଟନୀ ଅବସରରେ ‘ଏକ ନୂତନ ବିଶ୍ୱ ପାଇଁ ଶିକ୍ଷା: ଆପଣ କେଉଁଠାରେ ଓ କିପରି ଶିକ୍ଷାଲାଭ କରିବେ’ ଶୀର୍ଷକରେ ଏକ ଅଧିବେଶନ ଆୟୋଜନ ହୋଇଥିଲା। ଏଥିରେ ପ୍ୟାନେଲିଷ୍ଟ ଭାବେ ଯୋଗଦେଇ ‘ଧରିତ୍ରୀ’ ତଥା ‘ଓଡ଼ିଶା ପୋଷ୍ଟ’ର ମୁଖ୍ୟ କାର୍ଯ୍ୟନିର୍ବାହୀ ଆଦ୍ୟାଶା ଶତପଥୀ କହିଲେ, ଛୋଟ ସମୟରେ ପିଲାମାନେ ସ୍ବତଃପ୍ରବୃତ୍ତ ସବୁକିଛି ଶିଖି ଯାଆନ୍ତି। ସେମାନଙ୍କୁ ତାଙ୍କ ହିସାବରେ ରହିବାକୁ ଦେବା ଉଚିତ। ସମାଜ ସହ କିଭଳି ବଢ଼ିବେ ତାହା କେବଳ ଶିଖାଇବା ସହ ସେମାନଙ୍କ ପାଇଁ ତାଙ୍କ ପସନ୍ଦ ମୁତାବକ ପରିବେଶ ସୃଷ୍ଟି କରିବା ଦରକାର ବୋଲି ଆଦ୍ୟାଶା କହିଛନ୍ତି। ବଲିଉଡ୍ ଅଭିନେତା ଚନ୍ଦ୍ରଚୂଡ଼ ସିଂହ କହିଲେ, ପିଲାମାନେ ନିଜ ଇଚ୍ଛାରେ ବଢ଼ିବା ଆବଶ୍ୟକ। ମୌଳିକ ଶିକ୍ଷାରେ ସେମାନଙ୍କୁ ସାହାଯ୍ୟ କରିବା ସହ କୌଣସି କଥାରେ ବାଧା ଦେବା ଠିକ୍ ନୁହେଁ ବୋଲି ସେ ମତପ୍ରକାଶ କରିଥିଲେ। ଡ. ଚିଦାତ୍ମିକା ଖଟୁଆ ବର୍ତ୍ତମାନ ସମୟରେ ପିଲାମାନେ ଆଖପାଖରେ ଘଟୁଥିବା ସବୁ ଘଟଣାକୁ ଦେଖି ପରିପ୍ରକାଶ କରିବାକୁ ଚେଷ୍ଟା କରିବା ସହ ତୃଣମୂଳ ସ୍ତରରେ କିଭଳି ଆଗକୁ ବଢ଼ିପାରିବେ ସେ ନେଇ ଆଲୋକପାତ କରିଥିଲେ। ଶିକ୍ଷାବିତ୍ ବୀରା ଅଧିବେଶନକୁ ସଞ୍ଚାଳନ କରିଥିଲେ। ଉପସ୍ଥିତ ଅଭିଭାବକମାନେ ପ୍ୟାନେଲିଷ୍ଟଙ୍କୁ ବିଭିନ୍ନ ପ୍ରଶ୍ନ ପଚାରି ବୁଝିଥିଲେ। ଏହି ଅବସରରେ ବିଦ୍ୟାଳୟର ୨୦୨୩-୨୪ ଶିକ୍ଷାବର୍ଷ ପାଇଁ ପ୍ଲେ ଗ୍ରୁପ୍ ଏବଂ ନର୍ସରି ଶ୍ରେଣୀ ପାଇଁ ନାମଲେଖା ଘୋଷଣା କରାଯାଇଥିଲା। ଅନ୍ୟମାନଙ୍କ ମଧ୍ୟରେ ପୂର୍ବତନ ମନ୍ତ୍ରୀ ଅନଙ୍ଗ ଉଦୟ ସିଂହଦେଓ, ତାଙ୍କ ସ୍ତ୍ରୀ ବିଜୟଲକ୍ଷ୍ମୀ ଦେବୀ, କଳିକେଶ ସିଂହ ଦେଓ, ‘ଧରିତ୍ରୀ’ ତଥା ‘ଓଡ଼ିଶା ପୋଷ୍ଟ’ର ସମ୍ପାଦକ ତଥାଗତ ସତପଥୀ ପ୍ରମୁଖ ଉପସ୍ଥିତ ଥିଲେ। ପ୍ରିୟା ମିଶ୍ର କାର୍ଯ୍ୟକ୍ରମ ପରିଚାଳନା କରିଥିଲେ।