କାନବେରା,୫।୧୨(ପି.ଟି.): ରିଷ୍ଟ ସ୍ପିନର ୟୁଜବେନ୍ଦ୍ର ଚହଲ ପ୍ରଥମେ ଭାରତୀୟ ଦଳରେ ସାମିଲ ନ ଥିଲେ। ପ୍ରଥମ ଟି୨୦ ମ୍ୟାଚ୍ରେ କନ୍କସନ ସବ୍ଷ୍ଟିଚ୍ୟୁଟ ହିସାବରେ ଚହଲ ରବୀନ୍ଦ୍ର ଜାଡେଜାଙ୍କ ସ୍ଥାନରେ ଦଳରେ ସାମିଲ ହୋଇଥିଲେ ଓ ଦମ୍ଦାର ବୋଲିଂ କରି ବିଜୟରେ ମୁଖ୍ୟ ଭୂମିକା ଗ୍ରହଣ କରିବା ସହ ମ୍ୟାନ୍ ଅଫ୍ ଦି ମ୍ୟାଚ୍ ବିବେଚିତ ହୋଇଥିଲେ। ମ୍ୟାଚ୍ର ଅନ୍ତିମ ଓଭରର ଦ୍ୱିତୀୟ ବଲ୍ରେ ଅଷ୍ଟ୍ରେଲିଆ ଯୁବ ଦ୍ରୁତ ବୋଲର ମିଚେଲ ଷ୍ଟାର୍କଙ୍କ ଏକ ବାଉନ୍ସର ଜାଜେଡାଙ୍କ ହେଲମେଟ୍ରେ ବାଜିଥିଲା। ଏହାପରେ ସେ ବ୍ୟାଟିଂ ଜାରି ରଖିଥିଲେ ଓ ଇନିଂସ ଶେଷ ବେଳକୁ ୪୪ ରନ କରି ଅପରାଜିତ ରହିଥିଲେ। ତେବେ ରନ୍ ନେବା ବେଳେ ସେ ସଂଘର୍ଷ କରୁଥିବାର ଅର୍ଥାତ୍ ଛୋଟଉଥିବାର ଦେଖାଯାଇଥିଲା। ଏହାପରେ ଅଷ୍ଟ୍ରେଲିଆ ଇନିଂସରେ ଜାଡେଜା ପଡିଆକୁ ଆସି ନ ଥିଲେ। ତାଙ୍କ ସ୍ଥାନରେ କନକସନ ସବଷ୍ଟିଚ୍ୟୁଟ୍ ହିସାବରେ ଚହଲ ଖେଳିଥିଲେ। ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ମେଡିକାଲ ଟିମ୍ ଜାଡେଜାଙ୍କୁ ନେଇ ପରୀକ୍ଷା କରୁଛି। ଏନେଇ ବିସିସିଆଇ ଟୁଇଟ୍ କରି ଜଣାଇଛି। ଚହଲଙ୍କୁ ଖେଳିବାର ସୁଯୋଗ ଦିଆଯିବା ପରେ ଅଷ୍ଟ୍ରେଲିଆ କୋଚ୍ ଜଷ୍ଟିନ ଲାଙ୍ଗର ଆଇସିସି ମ୍ୟାଚ ରେଫରି ଡେଭିଡ୍ ବୁନ୍ଙ୍କ ସହ ଯୁକ୍ତିତର୍କ କରୁଥିବାର ଦେଖାଯାଇଥିଲା। ଉଲ୍ଲେଖଥାଉ କି, ଗତବର୍ଷ ଜୁଲାଇରେ ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି) କନ୍କସନ ସବଷ୍ଟିଚ୍ୟୁଟ୍ ନିୟମକୁ ଲାଗୁ କରିଥିଲା। ଯଦି କୌଣସି ଖେଳାଳିଙ୍କ ମୁଣ୍ଡ ଓ ବେକରେ ବଲ୍ ବାଜେ ଓ ସମ୍ପୃକ୍ତ ଖେଳାଳି ଆହତ ହୁଅନ୍ତି ତେବେ ତାଙ୍କ ସ୍ଥାନରେ ଆଉ ଜଣେ ସେହିଭଳି ଖେଳାଳିଙ୍କୁ ସୁଯୋଗ ଦିଆଯାଇଥାଏ। ଅର୍ଥାତ୍ ବ୍ୟାଟ୍ସମ୍ୟାନଙ୍କ ବଦଳରେ ଜଣେ ବ୍ୟାଟ୍ସମ୍ୟାନ, ବୋଲରଙ୍କ ବଦଳରେ ଜଣେ ବୋଲର ଖେଳିପାରିବେ। ବ୍ୟାଟ୍ସମ୍ୟାନଙ୍କ ସ୍ଥାନରେ ଯଦି ଜଣେ ଅଲରାଉଣ୍ଡରଙ୍କୁ ଖେଳାଯାଏ, ତାହେଲେ ସେ କେବଳ ବ୍ୟାଟିଂ ହିଁ କରିବେ। ୧୨ରୁ ଊର୍ଦ୍ଧ୍ୱ ଖେଳାଳି ବୋଲିଂ କିମ୍ବା ବ୍ୟାଟିଂ କରିପାରିବେ। ଏହି ପ୍ରକ୍ରିୟାକୁ କନ୍କସନ ସବଷ୍ଟିଚ୍ୟୁଟ୍ କୁହାଯାଏ। ଇତିମଧ୍ୟରେ କେତେଟି ଦଳ ଏହି ନିୟମ ଲାଗୁ କରିଛନ୍ତି। ପ୍ରଥମ ଦଳ ଭାବେ ଅଷ୍ଟ୍ରେଲିଆ ଏହି ନିୟମ ଲାଗୁ କରିଥିଲା।