ଶିଲଙ୍ଗ,୨ା୩: ୬୦ ଆସନ ବିଶିଷ୍ଟ ମେଘାଳୟ ବିଧାନସଭାରେ ମ୍ୟାଜିକ୍ ନମ୍ବର ହେଉଛି ୩୧। ନିକଟରେ ଅନୁଷ୍ଠିତ ନିର୍ବାଚନରେ ମୁଖ୍ୟମନ୍ତ୍ରୀ କନରାଡ୍ ସାଙ୍ଗ୍ମାଙ୍କ ଦଳ ନ୍ୟାଶନାଲ ପିପୁଲ୍ସ ପାର୍ଟି (ଏନ୍ପିପି)କୁ ୨୭ ଆସନରେ ସଫଳତା ମିଳିଛି। ତେଣୁ ଲୋକ ସଭାର ପୂର୍ବତନ ବାଚସ୍ପତି ସ୍ବର୍ଗତ ପି.ଏ. ସାଙ୍ଗ୍ମାଙ୍କ ପୁଅ କନରାଡ୍ ଗୁରୁବାର ସ୍ବରାଷ୍ଟ୍ରମନ୍ତ୍ରୀ ଅମିତ୍ ଶାହାଙ୍କୁ ଫୋନ୍ କରି ସହଯୋଗ ଲୋଡ଼ିଛନ୍ତି। ଏହି ଉତ୍ତର-ପୂର୍ବ ରାଜ୍ୟରେ ଭାଜପା ମାତ୍ର ୨ ଆସନ ପାଇଛି। ତେବେ ସାଙ୍ଗ୍ମା ଫୋନ୍ କରି ସହାୟତା ମାଗିବା ମାତ୍ରେ ଶାହା ଅବିଳମ୍ବେ ତାଙ୍କ ଅନୁରୋଧ ରକ୍ଷା କରିଛନ୍ତି। ଏନ୍ପିପିକୁ ଭାଜପା ସମର୍ଥନ କରିବ ବୋଲି ଆସାମ ମୁଖ୍ୟମନ୍ତ୍ରୀ ତଥା ଉତ୍ତର-ପୂର୍ବାଞ୍ଚଳରେ ଏନ୍ଡିଏ ମ୍ୟାନେଜର ହିମନ୍ତ ବିଶ୍ୱ ଶର୍ମା ଘୋଷଣା କରିଛନ୍ତି। ମେଘାଳୟରେ ଝୁଲା ବିଧାନସଭା ଗଠନ ହୋଇପାରେ ବୋଲି ଏକ୍ଜିଟ୍ ପୋଲ୍ରୁ ଜଣାପଡ଼ିବା ପରେ ସାଙ୍ଗ୍ମା ଓ ବିଶ୍ୱଶର୍ମା ଗୁଆହାଟୀରେ ମନ୍ତ୍ରଣା କରିଥିଲେ।
