ଭୁବନେଶ୍ୱର,୨।୧୨(ବ୍ୟୁରୋ): ଭୁବନେଶ୍ୱର ମହାନଗର ନିଗମାଞ୍ଚଳରେ ବିଭିନ୍ନ କଞ୍ଜରଭାନ୍ସି (ସଂରକ୍ଷିତ) ଲେନରେ ଥିବା ଜବରଦଖଲ ଖୁବ୍ଶୀଘ୍ର ହଟିବ। ସହରର ସୁନ୍ଦର ଓ ସ୍ବାସ୍ଥ୍ୟକର କରିବା ପାଇଁ ୩ଦିନ ଧରି ଚାଲିଥିବା ୱାର୍ଡସ୍ତରୀୟ ପରିମଳ କମିଟି କର୍ମଶାଳା ‘ଆତ୍ମମନ୍ଥନ’ର ଉଦ୍ଯାପନୀ ଉତ୍ସବରେ ଏହି ଘୋଷଣା କରାଯାଇଛି। ମହାନଗର ନିଗମର ସମସ୍ତ ୱାର୍ଡକୁ ୩ଟି ଜୋନରେ ବିଭକ୍ତ କରାଯାଇ ଏହି କର୍ମଶାଳା ଅନୁଷ୍ଠିତ ହୋଇଥିଲା। ୩ଦିନରେ ମହାନଗର ନିଗମର କର୍ପୋରେଟର, ସାନିଟାରୀ ଇନ୍ସପେକ୍ଟର, ସ୍ବଚ୍ଛ ସୁପରଭାଇଜର, ସ୍ବଚ୍ଛସାଥୀ, ଏଜେନ୍ସି ସୁରଭାଇଜରଙ୍କ ମତାମତ ନେବା ପରେ କେତେକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯାଇଛି। ସେଗୁଡିକ ମଧ୍ୟରେ ପ୍ରତି ୱାର୍ଡକୁ ଆବର୍ଜନା ମୁକ୍ତ କରିବା, ଅଳିଆ ପକାଉଥିବା ସ୍ଥାନର ସୌନ୍ଦର୍ଯ୍ୟରଣ, ବିଭିନ୍ନ ୱାର୍ଡକୁ ଗାଡ଼ି ଓ ସ୍ବଚ୍ଛସାଥୀ ଯୋଗାଇଦେବା ଭଳି ପଦକ୍ଷେପ ଖୁବ୍ଶୀଘ୍ର ନିଆଯିବ। କୌଣସି ବ୍ୟକ୍ତି ଯଦି ବାହାରେ ଅଳିଆ ପକାଇଲେ ସେମାନଙ୍କୁ ସମ୍ପୂର୍ଣ୍ଣ ବାରଣ କରିବା ପାଇଁ କର୍ପୋରେଟରମାନେ ମତ ଦେଇଛନ୍ତି। ତେବେ ଭୁବନେଶ୍ୱରର ପରିମଳ ବ୍ୟବସ୍ଥାରେ ସୁଧାର ଆଣି ଦେଶର ଏକ ନମ୍ବର ସହରରେ ପରିଣତ କରିବାକୁ ସମସ୍ତ ପ୍ରକାର ନିୟମଭିତ୍ତିିକ ସହାୟତା ଯୋଗାଇ ଦିଆଯିବ ବୋଲି ମେୟର ଓ କମିଶନର ପ୍ରତିଶ୍ରୁତି ଦେଇଛନ୍ତି। ପରିମଳ କମିଟି ସଦସ୍ୟମାନେ ନିଜ ନିଜ ୱାର୍ଡର ପରିମଳ ବ୍ୟବସ୍ଥାକୁ ନେଇ ସମୀକ୍ଷା କରିବାକୁ ଆହ୍ବାନ ଦେଇଥିଲେ ମେୟର ସୁଲୋଚନା ଦାସ।
ଭବନେଶ୍ୱରକୁ ଏକ ନମ୍ବର କରିବା ପାଇଁ ପ୍ରତ୍ୟେକ ଶପଥ ନେବା ଦରକାର। ଭୁବନେଶ୍ୱର ପ୍ରଥମ କେବଳ ସମ୍ଭବ ହୋଇପାରିବ, ଯଦି କର୍ପୋରେଟର ଓ କର୍ମଚାରୀ ଆତ୍ମବିଶ୍ୱାସର ସହ କାମ କରିବେ। ଯେଉଁଠି ଗାଡ଼ିର ଅଭାବ, ସେଠାକୁ ଏକ ମାସ ମଧ୍ୟରେ ଗାଡ଼ି ଯୋଗାଇ ଦିଆଯିବ। ଆସନ୍ତା ୧ ମାସ ମଧ୍ୟରେ ମହାନଗର ନିଗମ ଆହୁରି ୧୫୦ଟି ଗାଡ଼ି ଯୋଗାଇବ। ଭୁବନେଶ୍ୱର ମହାନଗର ନିଗମକୁ ଦେଶର ପ୍ରଥମ କରିବାକୁ ମ୍ୟାନ, ମେଶିନ ଓ ଅନ୍ୟାନ୍ୟ ସରଞ୍ଜାମ ଦିଆଯିବ। କାର୍ଯ୍ୟକ୍ରମରେ କମିଶନର ବିଜୟ ଅମୃତ କୁଲାଙ୍ଗେଙ୍କ ସମେତ ଅତିରିକ୍ତ କମିଶନର ସୂର୍ଯ୍ୟବଂଶୀ ମୟୂର ବିକାଶ ଉପସ୍ଥିତ ଥିଲେ। ଡେପୁଟି କମିଶନର ପରିମଳ ଶୁଭେନ୍ଦୁ କୁମାର ସାହୁଙ୍କ ସଂଯୋଜନାରେ ଜ୍ୟୋତି ପ୍ରକାଶ ଉପସ୍ଥାପନା କରିଥିଲେ। ଜୋନାଲ ଡେପୁଟି କମିଶନର ପ୍ରିୟବ୍ରତ ପାଢୀ ଏବଂ ଏସ୍ବିଏ ସେଲର ଟିମ୍ ଲିଡର ମନୋରଞ୍ଜନ ସାହୁ କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ।