ନୂଆଦିଲ୍ଲୀ,୧୦ା୧୧: ବିହାର ବରାଉଣି ଜଙ୍କସନ୍ରେ ତାଳମେଳ ଅଭାବରୁ ରେଲଓ୍ବେ ପଏଣ୍ଟସ୍ମ୍ୟାନ୍ଙ୍କ ମୃତ୍ୟୁ ଘଟଣାରେ ସାମ୍ନାକୁ ଆସିଛି ସାଙ୍ଘାତିକ ସତ। ଭାରତୀୟ ରେଲୱେର ପ୍ରାଥମିକ ତଦନ୍ତରୁ ଜଣା ପଡ଼ିଛି ଯେ, ଷଡ଼ଯନ୍ତ୍ର କରି ସହକର୍ମୀଙ୍କୁ ହତ୍ୟା କରିଛନ୍ତି।
ରେଲୱେର ତଦନ୍ତ ସମୟରେ ସିସିଟିଭି ଯାଞ୍ଚ ସହିତ ପ୍ରତ୍ୟକ୍ଷଦର୍ଶୀଙ୍କ ବୟାନକୁ ଜଣାପଡିଛି ଯେ, ଏହା ଏକ ଯୋଜନାବଦ୍ଧ ହତ୍ୟା। ଅଭିଯୁକ୍ତ ମହମ୍ମଦ ସୁଲେମାନ ଜାଣିଜାଣି ସହଯୋଗୀ ଆମର କୁମାରଙ୍କୁ ଭୁଲ୍ ସିଗନାଲ ଦେଇଥିଲେ, ଯେଉଁଥିପାଇଁ ତାଙ୍କର ମୃତ୍ୟୁ ଘଟିଛି।
ଲକ୍ଷ୍ନୌ-ବରାଉଣି ଟ୍ରେନ୍ ଶନିବାର ସକାଳ ୮.୧୦ ରେ ଷ୍ଟେସନରେ ପହଞ୍ଚିବା ପରେ ମହମ୍ମଦ ସୁଲେମାନ ଏବଂ ଅମର କୁମାରଙ୍କୁ ଇଞ୍ଜିନ ଅଲଗା କରିବାକୁ ପଠାଯାଇଥିଲା। ଏହି ସମୟରେ, ଲୋକୋ ପାଇଲଟଙ୍କୁ ଭୁଲ ସିଗନାଲ ଦେବା ପରେ ଅମର ଇଞ୍ଜିନ ଏବଂ ପାୱାର କାର ମଧ୍ୟରେ ଅଟକି ଯାଇଥିଲା ବୋଲି ତଦନ୍ତ ରିପୋର୍ଟରୁ ଜଣାପଡିଛି।
ପ୍ରତ୍ୟକ୍ଷଦର୍ଶୀମାନେ ଦୁର୍ଘଟଣା ସମୟରେ ପାଟିକରି ଜଣାଇବା ପରେ ଲୋକ ପାଇଲଟ ଟ୍ରେନରୁ ବାହାରି ଇଞ୍ଜିନ ପଛକୁ ଘୁଞ୍ଚାଇବା କିମ୍ବା ଦୁର୍ଘଟଣାକୁ ରୋକିବା ପାଇଁ କୌଣସି ପଦକ୍ଷେପ ନ ନେଇ ଘଟଣାସ୍ଥଳରୁ ପଳାଇ ଯାଇଥିଲେ ବୋଲି ଜଣାପଡିଛି।
ପ୍ରାୟ ଦୁଇ ଘଣ୍ଟା ପରେ ଇଞ୍ଜିନ ଏବଂ ପାୱାର କାର ଅଲଗା କରାଯାଇ ମୃତଦେହକୁ ବାହାର କରାଯାଇଥିଲା।ଘଟଣାକୁ ନେଇ ଅମରଙ୍କ ପରିବାର ସୁଲେମାନଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଦାବି କରିଛନ୍ତି।
ତେବେ ସୁଲେମାନ ତାଙ୍କ ନିଜକୁ ନିର୍ଦ୍ଦୋଷ କହି ଲୋକୋ ପାଇଲଟଙ୍କୁ ଏହି ଦୁର୍ଘଟଣା ପାଇଁ ଦାୟୀ କରିଛନ୍ତି। ସେ କହିଛନ୍ତି ଯେ ସେ ଏବଂ ଅମର ସେଣ୍ଟର୍ ବଫର୍ କପ୍ଲର୍ – ଇଞ୍ଜିନକୁ କୋଚ୍ ସହିତ ସଂଯୋଗ କରୁଥିବା ଏକ ଉପକରଣ ଦ୍ୱାରା ଇଞ୍ଜିନ ଏବଂ ପାୱାର କାରକୁ ସଂଯୋଗ ବିଚ୍ଛିନ୍ନ କରିଥିଲେ।
ସେ ଆହୁରି ମଧ୍ୟ କହିଛନ୍ତି ଯେ ଇଞ୍ଜିନ ପାୱାର କାରଠାରୁ ଟିକିଏ ଦୂରକୁ ଚାଲିଯାଇଥିଲା ଏବଂ ଯେତେବେଳେ ଅମର ବଫର କପ୍ଲର ବନ୍ଦ କରିବାକୁ ଯାଇଥିଲେ, ସେତିକିବେଳେ ପାଇଲଟ (ସୁଲେମାନ) ଙ୍କ କୌଣସି ସିଗନାଲ ବିନା ଇଞ୍ଜିନକୁ ପଛକୁ ନେଇ ଆସିଥିଲେ। ତେବେ ରେଳ ଅଧିକାରୀଙ୍କ କହିବା ଅନୁଯାୟୀ ଅନ୍ୟ ଜଣେ ବରିଷ୍ଠ ସ୍ତରୀୟ ତଦନ୍ତ ମଧ୍ୟ ନିର୍ଦ୍ଦେଶ ଦିଆଯାଇଛି।