ପାରାଦୀପ, ୩୧।୭ (ସ୍ବ.ପ୍ର.): ପାରାଦୀପ ଆଦର୍ଶଥାନା ଅନ୍ତର୍ଗତ ଅଠରବାଙ୍କି ଟର୍ମିନାଲ ରାସ୍ତାରେ ୨୭ ତାରିଖ ସାରେ ପିପିଏଲ୍ ୱାର୍କର୍ସ ୟୁନିୟନ ସମ୍ପାଦକ ପ୍ରଫୁଲ୍ଲ ଖଟୁଆଙ୍କୁ ୨ ଜଣ ଯୁବକ ମାରଣାସ୍ତ୍ରରେ ଆକ୍ରମଣ କରିଥିଲେ। ଏହି ଘଟଣାରେ ସେ ଥାନାରେ ଅଭିଯୋଗ କରିବା ପରେ ପୋଲିସ ମାମଲା (ନଂ.୨୩୧/୨୨)ରୁଜୁ କରି ୨ ଜଣଙ୍କୁ ଗିରଫ ପରେ କୋର୍ଟ ଚାଲାଣ କରିଛି। ଉକ୍ତ ଅଭିଯୋଗରେ ଖଟୁଆ ପାରାଦୀପ ପୋର୍ଟ ଆଣ୍ଡ ଡକ୍ ମଜ୍ଦୁର ୟୁନିୟନ ନାମ ଦର୍ଶାଇବା ସହ କେତେଜଣ କର୍ମକର୍ତ୍ତାଙ୍କ ନାମ ଉଲ୍ଲେଖ କରିଛନ୍ତି। ଏହାକୁ ଶନିବାର ମଜ୍ଦୁର ୟୁନିୟନ ପକ୍ଷରୁ ଖଣ୍ଡନ କରାଯାଇଛି। ୟୁନିୟନ ସମ୍ପାଦକ ସନାତନ ବେହେରା ଲିଖିତ ଭାବେ ଦର୍ଶାଇଛନ୍ତି ଯେ, ଏହି ୟୁନିୟନ ପିପିଏଲ୍ରେ ୩୦ ବର୍ଷ ହେଲା ଶ୍ରମିକଙ୍କ ପାଇଁ କାମ କରୁଛି। ଆମ ନେତା ହେଲେ ଘନଶ୍ୟାମ ଜେନା। ୨୦୨୧ରେ ପିପିଏଲ୍ରେ ୧୫୦ ନୂତନ ଶ୍ରମିକ ନିଯୁକ୍ତି ପାଇଛନ୍ତି। ସେମାନଙ୍କ ମଧ୍ୟରୁ ଅଧିକାଂଶ ଆମ ୟୁନିୟନର ସଭ୍ୟ ହୋଇଛନ୍ତି। ଏପରି ବର୍ଦ୍ଧିତ ଲୋକପ୍ରିୟତା ଦେଖି ଅନ୍ୟ ୟୁନିୟନଗୁଡିକ ହତୋତ୍ସାହ ହୋଇ ଆକ୍ରମଣ ଘଟଣାରେ ଆମ ୟୁନିୟନ ନାମ ଯୋଡି ବଦ୍ନାମ କରିବାକୁ ଚେଷ୍ଟା କରୁଛନ୍ତି। ପ୍ରଶାସନ ଏହାର ନିରପେକ୍ଷ ତଦନ୍ତ କରି ସତ୍ୟାସତ୍ୟ ପ୍ରକାଶ କରୁ। ଏହି ଅଭିଯୋଗ ସମ୍ପର୍କରେ ଆହତ ଖଟୁଆ କହିଛନ୍ତି, ମୋତେ ଯେଉଁମାନେ ଆକ୍ରମଣ କରିଥିଲେ ସେମାନଙ୍କ ନାମ ଅଭିଯୋଗରେ ଦର୍ଶାଯାଇଛି।