କୋଲକାତା,୧୪।୧୧: ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ସୋମବାର ଭାଜପା ନେତୃତ୍ୱାଧୀନ କେନ୍ଦ୍ର ସରକାର ଉପରେ ବର୍ଷିଛନ୍ତି। ସେ କହିଛନ୍ତି, ପଶ୍ଚିମବଙ୍ଗ ବିରୋଧରେ ଏକ ଷଡଯନ୍ତ୍ର ରଚାଯାଇ ତୃଣମୂଳ କଂଗ୍ରେସକୁ ବଦନାମ କରିବାକୁ ଚେଷ୍ଟା କରାଯାଉଛି। କିଛି ଲୋକ ବେଙ୍ଗଲରେ ବସି ଖାଉଛନ୍ତି ଏବଂ ଷଡଯନ୍ତ୍ର କରୁଛନ୍ତି ଏବଂ ପଶ୍ଚିମବଙ୍ଗକୁ ଟଙ୍କା ନ ଦେବାକୁ ଦିଲ୍ଲୀରେ ଯାଇ କହୁଛନ୍ତି। ମୁଁ ଦିଲ୍ଲୀର ଟଙ୍କା ଚାହୁଁ ନାହିଁ। ବଙ୍ଗଳା ନିଜ ପାଦରେ ଠିଆ ହେବାକୁ ସକ୍ଷମ । ଆମର ଆତ୍ମ ସମ୍ମାନ ଆମ ପାଇଁ ସବୁଠାରୁ ଗୁରୁତ୍ୱପୂର୍ଣ୍ଣ, ଆମେ ଏହାକୁ ଛଡ଼େଇ ନେବାକୁ ଦେବୁ ନାହିଁ।
ଦୁର୍ନୀତି ଅଭିଯୋଗରେ ଟିଏମସି ନେତାମାନେ ଗିରଫ ହେବା ଘଟଣାକୁ ନେଇ ମମତା କହିଛନ୍ତି, ରାଜ୍ୟ ବିରୋଧରେ ଦୁର୍ଭାଗ୍ୟପୂର୍ଣ୍ଣ ଅଭିଯାନ ଚାଲିଛି। ଯଦି କୌଣସି ବ୍ୟକ୍ତି ଭୁଲ କରିଛନ୍ତି, ତେବେ ତାଙ୍କୁ ସେହି ଭୁଲଗୁଡ଼ିକୁ ସଂଶୋଧନ କରିବାର ସୁଯୋଗ ଦିଆଯିବା ଉଚିତ। ଯଦି କୌଣସି ଭୁଲରେ କେହି ଜଡିତ ଅଛନ୍ତି, ତେବେ ଆଇନ ନିଜ କାମ କରିବ। କିନ୍ତୁ ଏଠାରେ ମିଡିଆ ଟ୍ରାଏଲ ଚାଲିଛି।
ନିକଟରେ ମମତା ଆସନ୍ତା ଡିସେମ୍ବର ମାସରେ ରାଜ୍ୟରେ ସାମ୍ପ୍ରଦାୟିକ ଦଙ୍ଗା ସୃଷ୍ଟି କରିବାର ସମ୍ଭାବନା ସମ୍ପର୍କରେ ଅଧିକାରୀମାନଙ୍କୁ ଚେତାବନୀ ଦେଇଛନ୍ତି।