ବଇଣ୍ଡା,୧ା୬ କରୋନାକୁ କାବୁ କରିବାକୁ ହେଲେ ଅଧିକରୁ ଅଧିକ ଟେଷ୍ଟିଂ ଓ କଣ୍ଟାକ୍ଟ ଟ୍ରେସିଂ ନିମନ୍ତେ ବିଶେଷଜ୍ଞମାନେ ପରାମର୍ଶ ଦେଉଛନ୍ତି। ସରକାରଙ୍କ କୋଭିଡ୍ ଗାଇଡ୍ଲାଇନ୍ରେ ମଧ୍ୟ ଏହା ଉପରେ ଗୁରୁତ୍ୱ ଦିଆଯାଇଛି। କିନ୍ତୁ ଗ୍ରାମାଞ୍ଚଳରେ ପ୍ରବେଶ କରିସାରିଥିବା କୋଭିଡ୍ ଭୂତାଣୁକୁ ନିୟନ୍ତ୍ରଣରେ ରଖିବା ପରିବର୍ତ୍ତେ ଅନୁଗୋଳ ଜିଲା ସ୍ବାସ୍ଥ୍ୟ ପ୍ରଶାସନ ଏବେ ସଂକ୍ରମିତଙ୍କ ସଂଖ୍ୟା କମ୍ ଦେଖାଇବାର ଷଡ଼ଯନ୍ତ୍ର କରୁଥିବା ଅଭିଯୋଗ ହେଉଛି। ବିଶେଷକରି କିଶୋରନଗର ବ୍ଲକର ସର୍ବାଧିକ ସଂକ୍ରମିତ ତଥା ଗୋଷ୍ଠୀ ସଂକ୍ରମଣ ହୋଇସାରିଥିବା ୮ ପଞ୍ଚାୟତରେ କଣ୍ଟାକ୍ଟ ଟ୍ରେସିଂ କରାଯାଉ ନାହିଁ କି ସ୍ବାବ୍ ସଂଗ୍ରହ ହେଉନାହିଁ। ଏପରି କି ବଇଣ୍ଡା ମେଡିକାଲରେ ମଧ୍ୟ କରୋନା ପରୀକ୍ଷାକୁ ବନ୍ଦ କରିଦିଆଯାଇଛି। ଏଥିଯୋଗୁ ବ୍ଲକ ଅଞ୍ଚଳରେ କୋଭିଡ୍ ଅଧିକ କାୟା ବିସ୍ତାର କରୁଥିବାବେଳେ ପ୍ରଶାସନର ଅବହେଳାକୁ ନେଇ ଅସନ୍ତୋଷ ଦେଖାଦେଇଛି।
କିଶୋରନଗର ବ୍ଲକରୁ ବର୍ତ୍ତମାନ ସୁଦ୍ଧା ୧୮୫୭ ଜଣ ପଜିଟିଭ୍ ଚିହ୍ନଟ ହୋଇସାରିଛନ୍ତି। ବିଶେଷକରି ୧୩ନଂ. ଜିଲା ପରିଷଦ ଜୋନ୍ରେ ଥିବା ୮ଟି ପଞ୍ଚାୟତରେ ସର୍ବାଧିକ ସଂକ୍ରମିତ ରହିଛନ୍ତି। ନୁନୁକାପଶି ପଞ୍ଚାୟତରୁ ୨୯୮ ଜଣ, ଗାଁ ବଇଣ୍ଡା ପଞ୍ଚାୟତରୁ ୨୮୫, ହଣ୍ଡପାରୁ ୨୭୮, ଲୁହାମୁଣ୍ଡାରୁ ୮୪, କଣ୍ଟେଇକୋଳିଆରୁ ୭୭, ଜାମୁନାଳୀରୁ ୯୦, ବିଲେଇନାଳୀରୁ ୭୮, କଟରଙ୍ଗା ପଞ୍ଚାୟତରୁ ୮୨ ଜଣ କରୋନା ସଂକ୍ରମିତ ଚିହ୍ନଟ ହୋଇଛନ୍ତି। ଏଥିସହ ୧୩ ଜଣଙ୍କ ମୃତ୍ୟୁ ମଧ୍ୟ ହୋଇସାରିଛି। ଏସବୁ ପଞ୍ଚାୟତରେ ଗୋଷ୍ଠୀ ସଂକ୍ରମଣ ବଢୁଥିବାବେଳେ ୬ ପଞ୍ଚାୟତକୁ ଶଟ୍ଡାଉନ କରାଯାଇଛି। ଗାଁ ବଇଣ୍ଡାରେ ଗତ ଗୁରୁବାର ୨୦୦ ଜଣଙ୍କ ସ୍ବାବ୍ ଟେଷ୍ଟ କରାଯାଇଥିବା ବେଳେ ୧୫୧ ପଜିଟିଭ୍ ଚିହ୍ନଟ ହୋଇଥିଲେ। ସମସ୍ତ ସଂକ୍ରମିତଙ୍କୁ ଔଷଧ ଦିଆଯାଇଥିଲେ ମଧ୍ୟ ସେମାନଙ୍କ ପରିବାର ସଦସ୍ୟ କିମ୍ବା ସଂସ୍ପର୍ଶରେ ଆସିଥିବା ଲୋକଙ୍କ ଟେଷ୍ଟ କରାଯାଉ ନାହିଁ। ସେହିପରି ଖଣ୍ଡବର ଗ୍ରାମରୁ ସପ୍ତାହେ ତଳେ ୩୦ରୁ ଅଧିକ ପଜିଟିଭ୍ ବାହାରିଥିଲେ। ସେମାନଙ୍କ ସଂସ୍ପର୍ଶରେ ଆସିଥିବା ଲୋକଙ୍କ ସ୍ବାବ୍ ଟେଷ୍ଟ ଏଯାଏ କରାଯାଉନାହିଁ । ବଇଣ୍ଡା ମେଡିକାଲକୁ ପ୍ରତ୍ୟେକ ଦିନ ଶତାଧିକ ଜ୍ୱର ଆକ୍ରାନ୍ତ ଟେଷ୍ଟ କରିବାକୁ ଆସୁଥିବା ବେଳେ ୨ ଦିନ ହେବ ଟେଷ୍ଟ ବନ୍ଦ କରାଯାଇଛି। ସଂକ୍ରମଣରେ ହ୍ରାସ ଦେଖାଇବାକୁ ପ୍ରଶାସନ ପକ୍ଷରୁ ଏପରି ଷଡ଼ଯନ୍ତ୍ର କରାଯାଇଥିବା ଅଭିଯୋଗ ବଢ଼ୁଥିବା ବେଳେ ସୋମବାର ବଇଣ୍ଡା ମେଡିକାଲରେ ଉତ୍ତେଜନା ଦେଖାଯାଇଥିଲା। ସେହିପରି ଟିକାକରଣରେ ମଧ୍ୟ ରୋକ୍ ଲଗାଯାଇଛି। ଏପ୍ରିଲ ୨୭ ତାରିଖ ସୁଦ୍ଧା ବଇଣ୍ଡା ଅଞ୍ଚଳରେ ୬୦ ବର୍ଷରୁ ଊର୍ଦ୍ଧ୍ୱ ମାତ୍ର ୬୬୨ ଜଣଙ୍କୁ ପ୍ରଥମ ଡୋଜ୍ ଟିକା ଦିଆଯାଇଛି। ୪୫ ବର୍ଷରୁ ୫୯ ବର୍ଷ ମଧ୍ୟରେ ୮୮୦ ଜଣଙ୍କୁ ପ୍ରଥମ ଡୋଜ୍ ଓ ମାତ୍ର ୩୭ଜଣଙ୍କୁ ଦ୍ୱିତୀୟ ଡୋଜ୍ ଦିଆଯାଇଛି। ବ୍ଲକର ଅନ୍ୟ ମେଡିକାଲରେ ଟିକା ଦିଆଯାଉଥିବା ବେଳେ ବଇଣ୍ଡାରେ ଟିକାକରଣ ହେଉ ନ ଥିବାରୁ ଜନ ଅସନ୍ତୋଷ ଦେଖାଦେଇଛି। ବଇଣ୍ଡା ଏକ ଜନଗହଳି ପୂର୍ଣ୍ଣ ଅଞ୍ଚଳ ହୋଇଥିବାରୁ ଏବଂ ବହୁ ପଜିଟିଭ୍ ଏଠାରୁ ଚିହ୍ନଟ ହେଉଥିବାରୁ ଅଧିକ ସ୍ବାବ୍ ଟେଷ୍ଟ ସହ ଟିକାକରଣକୁ ପ୍ରାଧାନ୍ୟ ଦେବାକୁ ଦାବି ହେଉଛି। ଏ ନେଇ ବଇଣ୍ଡା ମେଡିକାଲର ଆୟୁଷ ଡାକ୍ତର ସରୋଜ କୁମାର ନନ୍ଦ କହିଛନ୍ତି, ଜିଲା ପ୍ରଶାସନ ପକ୍ଷରୁ ନିର୍ଦ୍ଦେଶ ଆସିଲେ ବଇଣ୍ଡା ମେଡିକାଲ ଓ ଗୋଷ୍ଠୀ ସଂକ୍ରମଣ ଗ୍ରାମରୁ ସ୍ବାବ୍ ସଂଗ୍ରହ କରାଯିବ।
ଟେଷ୍ଟ କରା ନ ଗଲେ ଆନ୍ଦୋଳନ
କିଶୋରନଗର ବ୍ଲକର ବହୁ ଗାଁ ଏବେ କରୋନା କବଳରେ। କେତେକ ଗ୍ରାମରେ ଗୋଷ୍ଠୀ ସଂକ୍ରମଣ ହୋଇସାରିଛି। କିନ୍ତୁ ସଂକ୍ରମଣ କମ୍ ଦେଖାଇବାକୁ ସେଠାକାର ଲୋକଙ୍କ ସ୍ବାବ୍ ସଂଗ୍ରହ କରାଯାଉ ନାହିଁ। ଏହାକୁ ନେଇ ବହୁ ବୟସ୍କ ଭୟଭୀତ ଅବସ୍ଥାରେ ଅଛନ୍ତି। ତୁରନ୍ତ ସେମାନଙ୍କ ଟେଷ୍ଟ କରା ନ ଗଲେ ଆନ୍ଦୋଳନ ହେବ।
-ସ୍ବୟଂମ୍ବର ପ୍ରଧାନ, ସରପଞ୍ଚ, ଜାମୁନାଳୀ
ଅଧିକରୁ ଅଧିକ ପରୀକ୍ଷା କରାଯାଉ
ବଇଣ୍ଡା ଅଞ୍ଚଳରେ ସଂକ୍ରମିତଙ୍କ ସଂଖ୍ୟା ଦ୍ରୁତଗତିରେ ବଢ଼ୁଛି। ଅମାନିଆମାନଙ୍କ ଯୋଗୁ ଗୋଷ୍ଠୀ ସଂକ୍ରମଣ ହୋଇଥିବା ବେଳେ ମେଡିକାଲରେ ଦୈନିକ ଅଧିକରୁ ଅଧିକ ସ୍ବାବ୍ ଟେଷ୍ଟ ଜରୁରୀ ହୋଇପଡ଼ିଛି। ତୁରନ୍ତ ଜିଲା ପ୍ରଶାସନ ଏଥିପ୍ରତି ଦୃଷ୍ଟି ଦେଇ ଟେଷ୍ଟ କାର୍ଯ୍ୟ ପୁନଃ ଆରମ୍ଭ ନ କଲେ ଅଧିକ ଜୀବନହାନିର ଆଶଙ୍କା ରହିଛି।
-ଗିରୀଶ ଚନ୍ଦ୍ର ସାହୁ, ବଇଣ୍ଡା
ଓ୍ବାର୍ଡଗୁଡ଼ିକରେ କ୍ୟାମ୍ପ ହେଉ
କରୋନା ଯେପରି ଭାବେ ବ୍ୟାପୁଛି, ତାହାକୁ ନେଇ ଗ୍ରାମାଞ୍ଚଳରେ ଭୟର ବାତାବରଣ ଦେଖାଦେଇଛି। ଏହାକୁ ଗୁରୁତ୍ୱ ଦେଇ ସ୍ବାସ୍ଥ୍ୟ ବିଭାଗ ପକ୍ଷରୁ ୱାର୍ଡଗୁଡ଼ିକରେ ଟେଷ୍ଟ ପାଇଁ କ୍ୟାମ୍ପ କରାଯାଉ। କେବଳ ବଇଣ୍ଡା ମେଡିକାଲରେ ଟେଷ୍ଟ କରାଗଲେ ସେଠାରେ ଅଧିକ ଭିଡ଼ ହେବ ଓ ପୁଣି ଗୋଷ୍ଠୀ ସଂକ୍ରମଣ ଅଧିକ ବଢ଼ିବ।
-ଧ୍ରୁବଚରଣ ପ୍ରଧାନ, ଲୁହାମୁଣ୍ଡା
ମେଡିକାଲରୁ ନିରାଶରେ ଫେରୁଛନ୍ତି ଲୋକେ
ସଚେତନତାର ଅଭାବ ସହ ଅନେକେ ଏହାକୁ ଖାମଖିଆଲରେ ନେଉଥିବାରୁ ଗ୍ରାମାଞ୍ଚଳରେ କରୋନା ସଂକ୍ରମଣ ଦ୍ରୁତଗତିରେ ବଢ଼ୁଛି। ମାସ୍କ ଓ ସାମାଜିକ ଦୂରତ୍ୱ ନିୟମକୁ ମଧ୍ୟ ଠିକ୍ ଭାବେ ପାଳନ କରାଯାଉ ନାହିଁ। ଟେଷ୍ଟ ଓ ଟିକା ପାଇଁ ବଇଣ୍ଡା ମେଡିକାଲ ଯାଉଥିବା ଲୋକେ ନିରାଶରେ ଫେରୁଥିବାରୁ ଅସନ୍ତୋଷ ଦେଖାଦେଇଛି।
-ଲିଙ୍ଗରାଜ ବିଶ୍ବାଳ, ଧୁଣ୍ଡି
ଖୁବ୍ଶୀଘ୍ର ଟିକାକରଣ ଦିଗରେ ପଦକ୍ଷେପ
ବଇଣ୍ଡା ମେଡିକାଲ ଅଧୀନରେ ଥିବା ଯେଉଁସବୁ ପଞ୍ଚାୟତରେ ଗୋଷ୍ଠୀ ସଂକ୍ରମଣ ହୋଇଛି, ସେଠାକାର ଲୋକେ ସ୍ବାବ୍ ଟେଷ୍ଟ କରାନ୍ତୁ। ସେଠାରେ ଖୁବ୍ଶୀଘ୍ର ଟିକାକରଣ ଦିଗରେ ପଦକ୍ଷେପ ନିଆଯିବ। ସମସ୍ତେ ସାମାଜିକ ଦୂରତ୍ୱ ରକ୍ଷା କରିବା ସହ ମାସ୍କ ବ୍ୟବହାର କରନ୍ତୁ ଓ ଲକ୍ଡାଉନ୍ ନିୟମ ମାନି ଘରେ ରୁହନ୍ତୁ।
-ଲଳିତ ମୋହନ ବେହେରା, ଉପଜିଲାପାଳ, ଆଠମଲ୍ଲିକ