କୋଡିଙ୍ଗା,୨୮।୯(ଡି.ଏନ୍.ଏ.): ସାଦା ପୋଷାକରେ ଯାଞ୍ଚ କରିବା ୨ ଅବାକରୀ କନଷ୍ଟେବଲଙ୍କୁ ପଡ଼ିଲା ମହଙ୍ଗା। ମଦ ଚୋରାଚାଲାଣ ସନ୍ଦେହରେ ଦମ୍ପତିଙ୍କ ଗାଡିକୁ ପିଛା କରି ଓ ଯାଞ୍ଚ କରିବାବେଳେ ସେମାନେ ମାଡ଼ ମାରିଥିବା ନେଇ କନଷ୍ଟେବଲ ୨ଜଣ କୋଡିଙ୍ଗା ଥାନାରେ ଅଭିଯୋଗ କରିଛନ୍ତି। କନଷ୍ଟେବଳ ୨ଜଣ ଅଯଥାରେ ଗାଡିର ପିଛା ସହ ଯାଞ୍ଚ କରିବା ଏବଂ ଏହି ସମୟରେ ସ୍ବାମୀଙ୍କୁ ମାରିଛନ୍ତି ବୋଲି ମହିଳା ଜଣଙ୍କ କନଷ୍ଟେବଲ ୨ଜଣଙ୍କ ନାମରେ କୋଡିଙ୍ଗା ଥାନାରେ ଏତଲା ଦେଇଛନ୍ତି। କନଷ୍ଟେବଲ ୨ଜଣଙ୍କ ଅଭିଯୋଗ କ୍ରମେ କେସ୍ ନଂ. ୧୪୭/୨୨ ଓ ମହିଳାଙ୍କ ଅଭିଯୋଗ କ୍ରମେ ୧୪୮/୨୨ରେ ମାମଲା ରୁଜୁକରି ପୋଲିସ ଘଟଣାର ତଦନ୍ତ କରୁଛି।
ଚିର୍ମା ଗ୍ରାମରୁ ଭୀଷ୍ମ ବିଷୋଇ ସ୍ତ୍ରୀ କଳ୍ପନାଙ୍କ ସହ ଶ୍ୱଶୁର ଘର ବଡ ମସିଗାଁକୁ ଯାଉଥିଲେ। ନବରଙ୍ଗପୁର ଅବକାରୀ ଥାନାରେ କାର୍ଯ୍ୟରତ କନଷ୍ଟେବଲ ଛତର ଗଣ୍ଡ ଓ ଉମେଶ ହରିଜନ ଭଟିଗାଁ ନିକଟରେ ମଦ ଚୋରାଚାଲାଣ ଖବରପାଇ ସାଧା ପୋଷାକରେ ଯାଞ୍ଚ କରୁଥିଲେ। ସେମାନେ ଭୀଷ୍ମଙ୍କୁ ଅଟକାଇ ଥିଲେ ମଧ୍ୟ ସେ ନ ଶୁଣି ଗାଡ଼ି ନେଇ ପଳାଇଥିଲେ। କନଷ୍ଟେବଲ ୨ଜଣ ତାଙ୍କର ପିଛା କରିଥିଲେ। ବଡମସିଗାଁ ପହଞ୍ଚତ୍ବା ପରେ ଭୀଷ୍ମଙ୍କ ଗାଡି ଅଟକାଇ ଛତର ଓ ଉମେଶ ଯାଞ୍ଚ କରିବାକୁ ଉଦ୍ୟମ କରିଥିଲେ। ଏହାକୁ ନେଇ ଉଭୟ ପକ୍ଷରୁ ବଚସା ପରେ ଗଣ୍ଡଗୋଳ ସହ ମାରପିଟ ହୋଇଥିଲା। ଅବକାରୀ କନଷ୍ଟେବଲ ବୋଲି ପରିଚୟ ଦେବା ପରେ ମଧ୍ୟ ମାଡ଼ ମାରିଥିବା ନେଇ ଛତର ଓ ଉମେଶ ଥାନାରେ ଦେଇଥିବା ଏତଲାରେ ଉଲ୍ଲେଖ କରିଛନ୍ତି। ଆମ ପାଖରେ ମଦ ନ ଥିଲା। ବିନା କାରଣରେ କିଛି ନ କହି ଗାଡ଼ିର ପିଛା, ଯାଞ୍ଚ କରିଥିଲେ। ଯାଞ୍ଚବେଳେ କନଷ୍ଟେବଳ ୨ ଜଣ ଭୀଷ୍ମଙ୍କୁ ମାରିଥିବା ନେଇ କଳ୍ପନା ନିଜ ଏତଲାରେ ଉଲ୍ଲେଖ କରିଛନ୍ତି। ପୋଲିସ ୨ଟି ମାମଲା ରୁଜୁ କରି ଘଟଣାର ତଦନ୍ତ କରୁଛି ବୋଲି କୋଡିଙ୍ଗା ଥାନାଧିକାରୀ ଅଭିମନ୍ୟୁ ଦୁର୍ଗା ସୂଚନା ଦେଇଛନ୍ତି।