ଦୋହା, ୨୪।୧୧: କାତାର ଫିଫା ବିଶ୍ୱକପରେ କ୍ରମାଗତ ବିପର୍ଯ୍ୟୟ ଘଟିବାର ଲାଗିଛି। ଆର୍ଜେଣ୍ଟିନାକୁ ସାଉଦି ଆରବ ହରାଇବାର ଦିନକପରେ ୪ଥର ଚାମ୍ପିୟନ ଜର୍ମାନୀକୁ ପରାସ୍ତ କରି ବିସ୍ମୟ ସୃଷ୍ଟି କରିଛି ଜାପାନ। ଖଲିଫା ଇଣ୍ଟରନ୍ୟାଶନାଲ ଷ୍ଟାଡିୟମରେ ବୁଧବାର ଅନୁଷ୍ଠିତ ଏହି ମ୍ୟାଚରେ ଏକଦା ପଛୁଆ ରହିବା ସତ୍ତ୍ୱେ ସଫଳ ପ୍ରତ୍ୟାବର୍ତ୍ତନ କରି ଜର୍ମାନୀକୁ ୨-୧ ଗୋଲରେ ଜାପାନ ହରାଇ ଦେଇଛି।
ମ୍ୟାଚର ୩୧ତମ ମିନିଟରେ ଜାପାନର ଗୋନ୍ଡା ଫାଉଲ୍ କରିବାରୁ ଜର୍ମାନୀକୁ ପେନାଲ୍ଟି ସୁଯୋଗ ଦିଆ ଯାଇଥିଲା। ଜର୍ମାନୀର ଇଲ୍କେ ଗୁଏଣ୍ଡୋଗାନ ୩୩ତମ ମିନିଟରେ ଏହାକୁ ଗୋଲରେ ପରିଣତ କରି ଦଳକୁ ଅଗ୍ରଣୀ କରାଇଥିଲେ। ପ୍ରଥମାର୍ଦ୍ଧର ଅବଶିଷ୍ଟଭାଗ ଜର୍ମାନୀ ନିୟନ୍ତ୍ରଣରେ ରହିଥିଲା। ଦ୍ୱିତୀୟାର୍ଦ୍ଧରେ ଜର୍ମାନୀ ହାଲୁକା ହୋଇ ଯାଇଥିବାବେଳେ ୮ ମିନିଟ ମଧ୍ୟରେ ୨ଟି ଗୋଲ ଦେଇ ଜାପାନ ବିପର୍ଯ୍ୟୟ ଘଟାଇଥିଲା।
୭୫ତମ ମିନିଟରେ ରିତ୍ସୁ ଡୋଆନ ଗୋଲଟି ପରିଶୋଧ କରିଥିବାବେଳେ ୮୩ତମ ମିନିଟରେ ତାକୁମା ଆସାନୋ ଗୋଲ ଦେଇ ଜାପାନକୁ ଅଗ୍ରଣୀ କରାଇଥିଲେ। ଏହି ଗୋଲ ହିଁ ଶେଷରେ ନିର୍ଣ୍ଣାୟକ ସାଜିଥିଲା। ଜର୍ମାନୀ ଦଳ ବିଳମ୍ବରେ ଅଣ୍ଟା ଭିଡ଼ିଥିଲେ ହେଁ ଜାପାନ ରକ୍ଷଣଭାଗ ଆଉ ଗୋଲ ହେବାକୁ ଦେଇ ନ ଥିଲା। ସମାନଭାବେ ମଙ୍ଗଳବାର ମ୍ୟାଚରେ ସାଉଦି ଆରବ ୨-୧ ଗୋଲରେ ଆର୍ଜେଣ୍ଟିନାକୁ ପରାସ୍ତ କରିଥିଲା।
