ନୂଆଦିଲ୍ଲୀ, ୨୭।୪ : ରାଜଦ୍ରୋହ ଆଇନର (୧୨୪-ଏ) ର ସାମ୍ବିଧାନିକ ବୈଧତାକୁ ଚ୍ୟାଲେଞ୍ଜ କରୁଥିବା ଆବେଦନ ଉପରେ ସୁପ୍ରିମକୋର୍ଟରେ ଦାଖଲ ହୋଇଥିବା ଆବେଦନ ବୁଧବାର ଦିନ ଶୁଣାଣି ହୋଇପାରି ନାହିଁ। କିନ୍ତୁ କୋର୍ଟ ସୋଲିସିଟର ଜେନେରାଲ ତୁଷାର ମେହେଟ୍ଟାଙ୍କୁ ଏହି ସପ୍ତାହରେ ଏନେଇ କେନ୍ଦ୍ର ସରକାରଙ୍କ ଜବାବ ଦାଖଲ କରିବାକୁ କହିଛନ୍ତି।
ଆସନ୍ତା ୪ ଦିନ ମଧ୍ୟରେ କେନ୍ଦ୍ର ସରକାରଙ୍କୁ ଜବାବ ଦେବାକୁ ପଡ଼ିବ ବୋଲି କୋର୍ଟ କହିଛନ୍ତି। ତେବେ ସୋଲିସିଟର ଜେନେରାଲ ଜବାବ ପ୍ରସ୍ତୁତ ରହିଛି ଏବଂ ୨ ଦିନ ମଧ୍ୟରେ ଏହାକୁ ଦାଖଲ କରାଯିବ ବୋଲି ସୂଚନା ଦେଇଛନ୍ତି।
ପରବର୍ତ୍ତୀ ଶୁଣାଣି ସ୍ଥଗିତ ରହିବ ନାହିଁ। ସୁପ୍ରିମକୋର୍ଟ ବର୍ତ୍ତମାନ ଏହି ମାମଲାର ଶୁଣାଣି ଆସନ୍ତା ମେ‘ ୫ ଓ ୬ ରେ କରିବେ। ଏହା ସହିତ ଅଦାଲତ ସ୍ପଷ୍ଟ କରିଛନ୍ତି ଯେ ଉଭୟ ତାରିଖ ଦିନ ଶୁଣାଣି ହେବ। ଗତ ବର୍ଷ ଏପ୍ରିଲରେ ସୁପ୍ରିମକୋର୍ଟ କେନ୍ଦ୍ର ସରକାରଙ୍କୁ ପଚାରିଥିଲେ ଯେ ମହାତ୍ମା ଗାନ୍ଧୀଙ୍କ ପରି ଲୋକଙ୍କ ସ୍ବରକୁ ଦମନ କରିବା ପାଇଁ ବ୍ରିଟିଶ ସରକାର ଏହାକୁ ବ୍ୟବହାର କରୁଥିଲେ। ଉପନିବେଶ ଯୁଗର ରାଜଦ୍ରୋହ ଆଇନର ବ୍ୟାପକ ଅପବ୍ୟବହାରକୁ ନେଇ ଶୀର୍ଷ କୋର୍ଟଙ୍କ ପକ୍ଷରୁ ଚିନ୍ତା ପ୍ରକଟ କରାଯାଇଥିଲା।
ସୁପ୍ରିମକୋର୍ଟ କହିଛନ୍ତି ଯେ ସର୍ବୋଚ୍ଚ ନ୍ୟାୟାଳୟଙ୍କ ସମ୍ମୁଖରେ ଅନେକ ପିଟିଶନରେ ଦେଶଦ୍ରୋହ ଆଇନକୁ ଚ୍ୟାଲେଞ୍ଜ କରାଯାଇଛି। ତେଣୁ ସମସ୍ତ ଆବେଦନର ଏକାଠି ଶୁଣାଣି କରାଯିବ। ସୁପ୍ରିମକୋର୍ଟ, ଏଡିଟର୍ସ ଗିଲ୍ଡ ଅଫ ଇଣ୍ଡିଆର ତଥା ପୂର୍ବତନ ମେଜର-ଜେନେରାଲ ଏସ.ଜି ୱେମାଟକେରଙ୍କ ଭାରତୀୟ ଦଣ୍ଡବିଧି ସଂହିତା ଧାରା ୧୨୪-ଏ(ଦେଶଦ୍ରୋହ) ର ସାମ୍ବିଧାନିକ ବୈଧତାକୁ ଚ୍ୟାଲେଞ୍ଜ କରି ହୋଇଥିବା ଆବେଦନ ସହିତ ଏକମତ ହୋଇଥିବାବେଳେ କହିଛନ୍ତି ଯେ ପ୍ରକୃତ ଚିନ୍ତା ହେଉଛି ଆଇନର ଅପବ୍ୟବହାର। ଫଳରେ ଏପରି ମାମଲା ବୃଦ୍ଧି ପାଉଛି ।
ଆବେଦନକାରୀମାନେ ଯୁକ୍ତି କରିଛନ୍ତି ଯେ ରାଜଦ୍ରୋହ ଆଇନ ସରକାରଙ୍କ ସହମତି ଏବଂ ଅସ୍ପଷ୍ଟ ପରିଭାଷା ଅଣ-ସାମ୍ବିଧାନିକ। ଯାହା ସମ୍ବିଧାନର ଧାରା ୧୯ (୧) (କ) ଅନୁଯାୟୀ ଅଭିବ୍ୟକ୍ତିର ସ୍ବାଧୀନତା ମୌଳିକ ଅଧିକାରକୁ ଉଲ୍ଲଂଘନ କରୁଛି।