ଯାଜପୁର ଅଫିସ,୩।୫: ବ୍ୟକ୍ତିଗତ ସ୍ବାର୍ଥ ପାଇଁ ଜଳାଶୟ ଜମିକୁ କିସମ ପରିବର୍ତ୍ତନ କରାଯାଇ ପାରୁଛି। ଏହି କାରବାରରେ ସମ୍ପୃକ୍ତ ଅଧିକାରୀ ଏବଂ ଜମି ଦଖଲକାରୀଙ୍କ ମଧ୍ୟରେ ଲକ୍ଷାଧିକ ଟଙ୍କାର ନେଣଦେଣ ହେଉଛି। ଜଳର ଚିହ୍ନବର୍ଣ୍ଣ ନ ଥିବା ଜମିରେ ସାମୂହିକ ବିକାଶ ନିର୍ମାଣ ଉଦ୍ଦେଶ୍ୟରେ ଆରଡିସିସ୍ତରରେ ଜମିର କିସମ ପରିବର୍ତ୍ତନ ହେବାର ନିୟମ ରହିଥିଲେ ହେଁ ବ୍ୟକ୍ତିଗତ ସ୍ବାର୍ଥକୁ ଅଧିକ ଗୁରୁତ୍ୱ ଦିଆଯାଉଛି। ଫଳରେ ସରକାରୀ ଜମି ସଙ୍କୁଚିତ ହେବା ସହ ଆବଶ୍ୟକସ୍ଥଳେ ନଦୀପଠା ପୋତାଯାଇ ସରକାରୀ କୋଠା ନିର୍ମାଣ ହେଉଥିବା ଦେଖିବାକୁ ମିଳିଛି। ଯାଜପୁର ପୌର ପରିଷଦ ଅଧୀନ ୟୁନିଟ-୮ ଯଯାତିନଗରରେ ଜଳାଶୟ ଜମିକୁ କିସମ ପରିବର୍ତ୍ତନ କରାଯାଇ ବ୍ୟବସାୟ ଉଦ୍ଦେଶ୍ୟରେ ଶପିଂ ମଲ୍ ନିର୍ମାଣ ଏହାର ଜ୍ୱଳନ୍ତ ଉଦାହରଣ । କିସମ ପରିବର୍ତ୍ତନ ନାମରେ ଜଳାଶୟ ଜମି ଏଠାରେ ବିକ୍ରି ହେଉଛି। ଏ ନେଇ ଚନ୍ଦ୍ରଶେଖର ରାୟ ଏନ୍ଜିଟିରେ ରାଜ୍ୟ ସରକାରଙ୍କ ବିରୋଧରେ ୩୧ା୨୦୨୩/ଇଜେଡ ନମ୍ବରରେ ଏକ ମାମଲା ରୁଜୁ କରିଛନ୍ତି। ଏନ୍ଜିଟିର ବି. ଅମିତ ସ୍ଥାଳେକର ଏବଂ ଏକ୍ସପର୍ଟ ମେମ୍ବର ଆଫ୍ରୋଜ ଅହମ୍ମଦଙ୍କୁ ନେଇ ଗଠିତ ଖଣ୍ଡିପୀଠ ମାମଲାର ଶୁଣାଣି କରି ୨୪ ଘଣ୍ଟା ମଧ୍ୟରେ କାଉଣ୍ଟର ଆଫିଡେଭିଟ ଦାଖଲ କରିବାକୁ ଯାଜପୁର ପୌର ପରିଷଦର ନିର୍ବାହୀ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି।
ଅଭିଯୋଗ ଅନୁଯାୟୀ, ଯାଜପୁର ତହସିଲ ଅନ୍ତର୍ଗତ ଯଯାତିନଗର ପ୍ଲଟ ନମ୍ବର ୬୬୭, ଖାତା ନମ୍ବର ୬୩୬/୫୦୩ରେ ଜଳାଶୟ କିସମ ଜମିକୁ ପୋତି ଜବରଦଖଲ କରି ଶପିଂ ମଲ୍ ନିର୍ମାଣ ହେଉଛି। ଏନ୍ଜିଟିର ନିର୍ଦ୍ଦେଶ ଅନୁସାରେ ୨୨ା୩ା୨୦୨୨ରେ ଉକ୍ତ ମାମଲାର ଶୁଣାଣି କରି ସମସ୍ତ ପକ୍ଷଭୁକ୍ତଙ୍କୁ ୪ ସପ୍ତାହ ମଧ୍ୟରେ ସତ୍ୟପାଠ ଦାଖଲ କରିବାକୁ ନିର୍ଦ୍ଦେଶ ଦେଇଥିଲେ। ଏହାବାଦ୍ ପରବର୍ତ୍ତୀ ଶୁଣାଣି ପର୍ଯ୍ୟନ୍ତ ଉକ୍ତ ବିବାଦୀୟ ଜଳାଶୟ କିସମ ଜମିରେ ନିର୍ମାଣ କାର୍ଯ୍ୟକୁ ସ୍ଥଗିତ ରଖିବା ଏବଂ ଯାଜପୁର ଜିଲାପାଳ ଏହାର ଅନୁପାଳନ କରିବାକୁ ନିର୍ଦ୍ଦେଶ ହୋଇଥିଲା। ନିର୍ଦ୍ଦେଶ ଅନୁଯାୟୀ ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ(ଏସ୍ପିସିବି)ର କଳିଙ୍ଗନଗର ଆଞ୍ଚଳିକ ଅଧିକାରୀ ପ୍ରମୋଦ କୁମାର ବେହେରା ଗତ ୨୦ା୪ା୨୦୨୩ରେ ସରଜମିନ ତଦନ୍ତ କରିଥିଲେ। ତଦନ୍ତ ରିପୋର୍ଟରେ ଦର୍ଶାଯାଇଛି, ୨୭୦୦ବର୍ଗ ଫୁଟ ଜମିରେ ଏକ ଫ୍ଲୋର ନିର୍ମାଣ ହେଉଥିବାବେଳେ ଜମି ତା’ର ଜଳାଶୟ କିସମକୁ ହରାଇ ସାରିଛି। ଜମିର ପାର୍ଶ୍ୱରେ ଏକ କଂକ୍ରିଟ ଡ୍ରେନ ନିର୍ମାଣ ହୋଇଛି। କାଗଜପତ୍ର ଅନୁସାରେ ଜମି ଘରବାରି କିସମ ରହିଛି। ଏଥିରୁ ବୁଝାପଡୁଛି ଯେ, ପୂର୍ବରୁ ଏହି ଜମି ଜଳାଶୟ କିସମ ରହିଥିଲା। ହେଲେ ବିଷ୍ଣୁ ଚରଣ ରଥ ପରବର୍ତ୍ତୀ ସମୟରେ ଘରବାରିକୁ କିସମ ପରିବର୍ତ୍ତନ ରହିଛି। ଏଥିରେ ସ୍ଥାନୀୟ ତହସିଲଦାରଙ୍କ ସମେତ ଆରଡିସିସ୍ତରରେ ସହଯୋଗ କରିଛନ୍ତି। ଏହାସହ ଯାଜପୁର ସ୍ବତନ୍ତ୍ର ପ୍ଲାନିଂ ଅଥରିଟି କମର୍ସିଆଲ ଓ ରେସିଡେନ୍ସିଆଲ ପାଇଁ ୩ ଟି ଫ୍ଲୋରରେ ବିଲଡିଂ ନିର୍ମାଣ କରିବାକୁ ଅନୁମତି ପ୍ରଦାନ କରିଛନ୍ତି। ତେବେ ବର୍ଜ୍ୟଜଳ ନିଷ୍କାସନ ପରିମାଣ ଅନୁସାରେ କୌଣସି ଅନୁମତିର ଆବଶ୍ୟକତା ନାହିଁ ବୋଲି ଏସ୍ପିସିବି ପକ୍ଷରୁ ତଦନ୍ତରେ ଦର୍ଶାଯାଇଛି। ଏଠାରେ ପ୍ରଶ୍ନ ଉଠିଛି, ଭୂତଳ ଜଳସ୍ତର ବୃଦ୍ଧି କରିବା ଉଦ୍ଦେଶ୍ୟରେ ରାଜ୍ୟ ସରକାର ଜଳାଶୟ କିସମ ଜମିର ପୁନରୁଦ୍ଧାର କରିବାକୁ ନିର୍ଦ୍ଦେଶ ଦେଉଥିବାବେଳେ ପ୍ରଶାସନ ପକ୍ଷରୁ ଏଠାରେ ପୋତାଯାଇଥିବା ଜଳାଶୟ ଜମିରେ ନିର୍ମାଣ କାର୍ଯ୍ୟ ଚାଲିଛି। କେବଳ ଜଳାଶୟ ନୁହେଁ, ଯାଜପୁର ଜିଲା ଦେଇ ପ୍ରବାହିତ ବୈତରଣୀ ନଦୀର ବୁଢା ଆନ୍ନିକଟ ରୁଢିଆ ପୋଲ ନିକଟରେ ନଦୀପଠାକୁ ପୋତାଯାଇ ନିର୍ମାଣ କାମ ଚାଲିଛି। ଏହାସହ ଆଖୁଆପଦା ଠାରୁ ଯାଜପୁର ଟାଉନ ପର୍ଯ୍ୟନ୍ତ ବୈତରଣୀ ନଦୀକୂଳରେ କେତେକ ନିର୍ମାଣ କାର୍ଯ୍ୟ ପାଇଁ ବୈତରଣୀ ସଙ୍କୁଚିତ ହେଉଥିବା ଅଭିଯୋଗ ହୋଇଛି। ଏନେଇ ପୂର୍ବରୁ ଭଦ୍ରକ ଜିଲାର ଭଣ୍ଡାରୀପୋଖରୀ ବ୍ଲକବାସୀ ଏନ୍ଜିଟିର ଦ୍ୱାରସ୍ଥ ହୋଇ ସାରିଛନ୍ତି। ଏଭଳି ଭାବେ ନଦୀନାଳ, ଜଳାଶୟକୁ ପୋତା ହେଉଥିବାରୁ ଭବିଷ୍ୟତରେ ବୈତରଣୀ ତା’ର ଗତିପଥ ବଦଳି ବିପର୍ଯ୍ୟୟ ସୃଷ୍ଟି କରିପାରେ ବୋଲି ମତପ୍ରକାଶ ପାଇଛି।
ଏ ସଂକ୍ରାନ୍ତରେ ଯାଜପୁର ତହସିଲଦାର ଜ୍ୟୋତିକାନ୍ତ ଭୁଜବଳଙ୍କୁ ପଚାରିବାରୁ ସେ କହିଛନ୍ତି, ନିୟମ ଅନୁସାରେ ଜଳାଶୟ କିସମକୁ ଆରଡିସି ପରିବର୍ତ୍ତନ କରିପାରିବେ। ତେଣୁ ସମସ୍ତ କାର୍ଯ୍ୟ ଠିକ୍ ଭାବେ ହୋଇଛି, କୌଣସି ଚିନ୍ତା କରିବାର ନାହିଁ ା