ଆନନ୍ଦପୁର,୨୧।୧୧(ସ୍ବ.ପ୍ର.)-କେନ୍ଦୁଝର ଜିଲା ଆନନ୍ଦପୁର ତହସିଲ ଅଞ୍ଚଳରେ ବାଲି ମିଳୁ ନ ଥିବାରୁ ନିର୍ମାଣ କାମ ହୋଇ ପାରୁନି। ଆବାସ ହିତାଧିକାରୀମାନେ ବାଲି ବିନା ଘରକାମ କରି ନ ପାରି ହଇରାଣ ହରକତ ହେଉଛନ୍ତି। ଏହି ତହସିଲ ଅଧୀନରେ ଥିବା ୭ଟି ସଇରାତର ଲିଜ୍ ପ୍ରକ୍ରିୟା ଦୀର୍ଘ ଦିନ ହେବ ଶେଷ ହୋଇଥିଲେ ମଧ୍ୟ ବାଲି ଉଠି ପାରୁନି। ପରିବେଶ ମଞ୍ଜୁରୀ ମିଳିପାରୁ ନ ଥିବାରୁ ଏହା କାର୍ଯ୍ୟକାରୀ ହୋଇପାରୁନି ବୋଲି ତହସିଲଦାର ତପନ କୁମାର ନାୟକ କହିଛନ୍ତି। ଫଳରେ ସରକାରୀ ଯୋଜନାରେ ହେବାକୁ ଥିବା ନିର୍ମାଣ କାର୍ଯ୍ୟ ତ୍ୱରାନ୍ବିତ ହେବାରେ ଘୋର ପ୍ରତିବନ୍ଧକ ସାଜିଛି। ଅନ୍ୟପଟେ ଏହି ତହସିଲ ଅଞ୍ଚଳର କେତେକ ବ୍ୟକ୍ତି ନିର୍ମାଣ କାମ ଜାରି ରଖିଛନ୍ତି। ଏଥିପାଇଁ ବାଲି କେଉଁଠୁ ଆସୁଛି ବୋଲି ପ୍ରଶ୍ନବାଚୀ ସୃଷ୍ଟି ହୋଇଛି।
ବାଲି ସଇରାତ ବନ୍ଦ ଥିବାରୁ ସରକାରୀ ଆବାସ ଯୋଜନାରେ ସାମିଲ ହୋଇଥିବା ଗରିବ ହିତାଧିକାରୀମାନେ ଆବାସ ଗଢ଼ିବାରେ ସମସ୍ୟାର ସମ୍ମୁଖୀନ ହେଉଛନ୍ତି। ଏପରିକି କେତେକ ହିତାଧିକାରୀ ବାଧ୍ୟ ବାଧ୍ୟକତାରେ ଚଢ଼ା ଦରରେ କିଣିବା ପାଇଁ ଚୋରା ବାଲି ମାଫିଆଙ୍କ ଉପରେ ନିର୍ଭର କରିବାକୁ ବାଧ୍ୟ ହେଉଛନ୍ତି। ନିକଟରେ ତହସିଲ ପକ୍ଷରୁ ପଦ୍ମପୁର ସଇରାତରୁ ବାଲି ଚୋରା ଚାଲାଣ ରୋକିବା ପାଇଁ ଟ୍ରେଞ୍ଚ ଖୋଳା ଯାଇଥିଲା। ହେଲେ ମାଫିଆମାନେ ଏହାକୁ ପୋତି ପୁନର୍ବାର ବାଲି ଚାଲାଣ କରିବାରେ ସଫଳ ହେଉଥିବା ଦେଖିବାକୁ ମିଳୁଛି। ଚୋରା ବାଲି ଚାଲାଣ ରୋକିବା ଦିଗରେ ଆବଶ୍ୟକ ସହଯୋଗ ପାଇଁ ସ୍ଥାନୀୟ ପୋଲିସକୁ ଚିଠି ମାଧ୍ୟମରେ ଅବଗତ କରାଯାଇଥିଲେ ସୁଦ୍ଧା କୌଣସି ସହଯୋଗ ମିଳିପାରୁନି ଓ ଚୋରା ଚାଲାଣ ବୃଦ୍ଧି ପାଉଥିବାରୁ ସରକାରଙ୍କ ରାଜସ୍ବ ହାନୀ ଘଟୁଥିବା ତହସିଲ କର୍ତ୍ତୃପକ୍ଷ କହିଛନ୍ତି।
ସୂଚନାଯୋଗ୍ୟ, ଆନନ୍ଦପୁର ତହସିଲ ଅଧୀନରେ ଆନନ୍ଦପୁର, ଅମାରଙ୍ଗ, ଟୁକୁଣା, ପଞ୍ଚୁପଲୀ, ଗୌଡ଼ଡିହା, ବେଲବାହାଳି, ବୁଢ଼ିକୁଦ ଆଦି ବାଲି ସଇରାତ ରହିଛି। ସମ୍ପୃକ୍ତ ସଇରାତ ଗୁଡ଼ିକ ଲିଜ୍ କାର୍ଯ୍ୟ ଶେଷ ହୋଇଛି। ହେଲେ ପରିବେଶ ମଞ୍ଜୁରୀ ନ ମିଳିବାରୁ ଏହା କାର୍ଯ୍ୟକାରୀ ହୋଇପାରୁନି। ତହସିଲଦାର ନାୟକ କହିଛନ୍ତି, କାର୍ଯ୍ୟାଳୟ ପକ୍ଷରୁ ପରିବେଶ ମଞ୍ଜୁରୀ ନିମନ୍ତେ ଠିକଣା ସମୟରେ ଆବଶ୍ୟକ କାଗଜପତ୍ର ପ୍ରଦାନ କରାଯାଇଛି। ମାତ୍ର ଅଦ୍ୟାବଧି ପରିବେଶ ମଞ୍ଜୁରୀ ମିଳିପାରିନି।