ଭଦ୍ରକ ଅଫିସ, ୪।୮: ଭଦ୍ରକ ଜିଲା ଧାମନଗର ବ୍ଲକର ଭଦ୍ରକ-ଆଖଣ୍ଡଳମଣି ମୁଖ୍ୟରାସ୍ତାର ପାଳସାହି ଛକଠାରୁ ରଇପୁର ପଞ୍ଚାୟତର କଣ୍ଟିକା ବାଙ୍କସାହି ପର୍ଯ୍ୟନ୍ତ ରାସ୍ତା ନିର୍ମାଣ ଚାଲିଛି। ନିର୍ମାଣ କାର୍ଯ୍ୟ ସରି ନ ଥିବାବେଳେ ରାସ୍ତା ଖାଲଖମାରେ ଭର୍ତ୍ତି ହେଲାଣି। ନିମ୍ନମାନର କାମ ଯୋଗୁ ରାସ୍ତାର ଏପରି ଅବସ୍ଥା ହୋଇଥିବା ସାଧାରଣରେ ଅଭିଯୋଗ ହେଉଛି।
୫ କି.ମି. ୬୦୦ ମିଟର ରାସ୍ତା ପ୍ରଧାନମନ୍ତ୍ରୀ ଗ୍ରାମସଡ଼କ ଯୋଜନାରେ ଅନ୍ତର୍ଭୁକ୍ତ କରାଯାଇ ୨୦୨୧ ନଭେମ୍ବର ୧୬ଠାରୁ ନିର୍ମାଣ କାର୍ଯ୍ୟ ଆରମ୍ଭ ହୋଇଥିଲା। ଆସନ୍ତା ଅକ୍ଟୋବର ୧୫ ସୁଦ୍ଧା ନିର୍ମାଣ ଶେଷ ଲାଗି ଧାର୍ଯ୍ୟ ହୋଇଛି। ସରକାରଙ୍କ ପାଣ୍ଠିରୁ ୩ କୋଟି ୯୭ ଲକ୍ଷ ୪୬ ହଜାର ଟଙ୍କା ବ୍ୟୟବରାଦ କରାଯାଇଛି। ନିମ୍ନମାନର କାର୍ଯ୍ୟ, ଦୁର୍ବଳ କଞ୍ଚାମାଲ ବ୍ୟବହାର ଯୋଗୁ ଏପଟେ ରାସ୍ତା ନିର୍ମାଣାଧୀନ ଥିବାବେଳେ ସେପଟେ ନଷ୍ଟ ହୋଇଚାଲିଛି। ଖାଲଖମା ଯୋଗୁ ରାସ୍ତାରେ ବର୍ଷା ପାଣି ଜମି ରହିଛି। ଫଳରେ କୃତ୍ରିମ ଜଳାଶୟ ଭ୍ରମ ସୃଷ୍ଟି ହୋଇଛି। ଦିନ ବେଳେ ବି ଏହି ରାସ୍ତାରେ ଚାଲି ଚାଲି ଯିବା ବିପଦପୂର୍ଣ୍ଣ। ବାଙ୍କସାହିଠାରୁ ରଇପୁର ପଞ୍ଚାୟତର ଛାତ୍ରୀଛାତ୍ର, ବ୍ୟବସାୟୀ, ଶ୍ରମିକ ଏହି ରାସ୍ତା ଉପରେ ନିର୍ଭର କରନ୍ତି। ବ୍ଲକ, ଥାନା, ଜିଲା ସଦର ମହକୁମାଠାରୁ ଆରମ୍ଭ କରି ସ୍କୁଲ କଲେଜ ଯିବା ପାଇଁ ଏହା ଏକମାତ୍ର ରାସ୍ତା। କିନ୍ତୁ ପ୍ରଶାସନିକ ଅବହେଳା ଓ ଠିକାଦାରଙ୍କ ମନମୁଖୀ କାର୍ଯ୍ୟ ପାଇଁ ରାସ୍ତା ଏବେ ମରଣଯନ୍ତା ପାଲଟିଛି। କୌଣସି ଯାନବାହନ ଚଳାଚଳ କରିବା ସମ୍ଭବ ହେଉନାହିଁ। ଏହାକୁ ନେଇ ସ୍ଥାନୀୟ ଅଞ୍ଚଳରେ ଜନଅସନ୍ତୋଷ ଦେଖାଦେଇଛି। ଜିଲା ପ୍ରଶାସନ ରାସ୍ତା ନିର୍ମାଣ କାର୍ଯ୍ୟର ଅଗ୍ରଗତି ସମ୍ପର୍କରେ ଅନୁଧ୍ୟାନ କରି ଅବଧି ସମୟ ମଧ୍ୟରେ ସମ୍ପୂର୍ଣ୍ଣ କରାଇବା ସହ ବର୍ଷା ଋତୁରେ ଲୋକଙ୍କ ଯାତାୟାତ ପାଇଁ ପଦକ୍ଷେପ ନେବାକୁ ଦାବି ହୋଇଛି।