ରସୁଲପୁର,୨୯ା୭(ଡି.ଏନ.ଏ.): ଯାଜପୁର ଜିଲା ରସୁଲପୁର ବ୍ଲକ ଅନ୍ତର୍ଗତ ନରସିଂହପୁର ପଞ୍ଚାୟତର ସରପଞ୍ଚ ପ୍ରଶାନ୍ତ କୁମାର ଦାସ ସରକାରୀ ଅର୍ଥ ବିନିଯୋଗକରି ଘରୋଇ ରାସ୍ତା ନିର୍ମାଣ କରିଥିବା ଅଭିଯୋଗ ହୋଇଛି। ଅଭିଯୋଗକାରୀ ଗ୍ରାମବାସୀ ଏନେଇ ଯାଜପୁର ଜିଲାପାଳଙ୍କ ଦୃଷ୍ଟି ଆକର୍ଷଣ କରିଛନ୍ତି। ଉକ୍ତ ଘଟଣାକୁ ତଦନ୍ତ କରାଯାଇ ବେଆଇନ ନିର୍ମାଣ କାର୍ଯ୍ୟରେ ସଂପୃକ୍ତ ଥିବା ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ପାଇଁ ଗ୍ରାମବାସୀଙ୍କ ପକ୍ଷରୁ ଦାବି ହୋଇଛି।
ପଞ୍ଚାୟତିରାଜ ଏବଂ ପାନୀୟଜଳ ବିଭାଗ ଅନୁଦାନରେ ପଞ୍ଚାୟତ ପକ୍ଷରୁ ଗ୍ରାମର ସମିତ ରଞ୍ଜନ ମହାନ୍ତିଙ୍କ ଘରଠାରୁ ମହାବୀର ଯୁବକ ସଂଘକୁ ସି.ସି ରୋଡ ଓ ଡ୍ରେନ ନିର୍ମାଣ ପାଇଁ ୩ଲକ୍ଷ ଟଙ୍କା ବ୍ୟୟ ବରାଦ କରାଯାଇଛି। ପଞ୍ଚମ ରାଜ୍ୟ ଅର୍ଥ କମିଶନ ଅନୁଦାନରୁ ଏହି ଅର୍ଥ ମଞ୍ଜୁର କରାଯାଇଛି। ଉକ୍ତ ଅର୍ଥରେ ରାସ୍ତା ନିର୍ମାଣ କରାଯାଇଛି। ହେଲେ ପ୍ରକଳ୍ପ ସ୍ଥଳରେ ଡ୍ରେନ ହୋଇନାହିଁ ବୋଲି ଅଭିଯୋଗ ହେଉଛି। ଉକ୍ତ ରାସ୍ତାଟି ସରପଞ୍ଚଙ୍କ ପରିବାରର ୍ଯଯକ୍ତିଗତ ଜମିର ପ୍ଲଟ ନମ୍ବର-୧୧୨୭, ୧୦୮୦, ୧୦୮୧, ୧୧୨୩, ୧୧୨୨, ୧୧୧୯, ୧୦୮୫ ଉପରେ ନିର୍ମାଣ କରାଯାଇଛି। ଏପରି କି ଢଳେଇ ରାସ୍ତା ନିର୍ମାଣ ଆଳରେ ସରପଞ୍ଚ ନିଜ ଘର ଅଗଣାକୁ ପକ୍କାରେ ପରିଣତ କରିଛନ୍ତି। ଏହି ରାସ୍ତାରେ କେବଳ ସରପଞ୍ଚଙ୍କ ପରିବାରକୁ ଛାଡିଦେଲେ ଗ୍ରାମ୍ୟର ଅନ୍ୟ କୌଣସି ଜନସାଧାରଣ ବ୍ୟବହାର କରିବେ ନାହିଁ। ଉକ୍ତ ରାସ୍ତା ନିର୍ମାଣର ତଦାରଖ ଦାୟିତ୍ୱ ବିଭାଗୀୟ ଅଧନରେ ରହିଛି। ପଞ୍ଚାୟତ ନିର୍ବାହୀ ଅଧିକାରଙ୍କ ନାଁରେ କାର୍ଯ୍ୟାଦେଶ ପ୍ରଦାନ କରାଯାଇଛି। ନିୟମାମୁତାବକ ରାସ୍ତା ନିର୍ମାଣ ହେବା ପାଇଁ ପଞ୍ଚାୟତରେ ଫାଇଲ ଖୋଲା ଯାଇଛି। ହେଲେ ଜମିଜମା ସଂପର୍କିତ କାଗଜାଦ୍ ସଂଯୋଗ କରାଯାଇ ନାହିଁ। ପଞ୍ଚାୟତ ପକ୍ଷରୁ ବ୍ୟକ୍ତିଗତ ଜମିରେ ରାସ୍ତା ନିର୍ମାଣ କରାଯାଉଥିବା ଜାଣି ପଞ୍ଚାୟତ ପ୍ରଶାସନ ଜମିଜମା ସମ୍ପର୍କିତ ତ୍ଯଯକୁ ଅଣଦେଖା କରିଥିବା ନେଇ ସାଧାରଣରେ ଚର୍ଚ୍ଚା ଆଲୋଚନା ହେଉଛି। ସରପଞ୍ଚ ନିଜ କ୍ଷମତାକୁ ଅପବ୍ୟବହାର କରି ଏଭଳି କାର୍ଯ୍ୟ କରିଥିବାରୁ ଗ୍ରାମବାସୀଙ୍କ ମନରେ ଅସନ୍ତୋଷ ଦେଖା ଦେଇଛି। ଏ ନେଇ ସରପଞ୍ଚ ପ୍ରଶାନ୍ତ କୁମାର ଦାସଙ୍କୁ ପଚାରିବାରୁ ସେ ରାସ୍ତା ନିର୍ମାଣ ହୋଇଥିବା କଥାକୁ ସ୍ବୀକାର କରିଛନ୍ତି। ତେବେ ଏଠାରେ ଥିବା ପୁରୁଣା ରାସ୍ତାକୁ ସେ ମରାମତି କରିଛନ୍ତି ବୋଲି ସଫେଇ ଦେଇଛନ୍ତି।