ଏମ୍ଭି-୭୯,୨୭ା୩(ଡି.ଏନ.ଏ.): ମାଲକାନଗିରି ଜିଲା ସୀମାନ୍ତ ମୋଟୁଠାରେ ସାବେରୀ ନଦୀ ଉପରେ ଚାଲିଥିବା ବ୍ରିଜ୍ ନିର୍ମାଣ କାର୍ଯ୍ୟ ସରୁନାହିଁ। ନଦୀର ଉପର ମୁଣ୍ଡରେ ଚାଲିଥିବା ଏହି ବ୍ରିଜ୍ ନିର୍ମାଣକୁ ଇତିମଧ୍ୟରେ ୫ବର୍ଷ ବିତିଯାଇଛି। ବିଭାଗୀୟ ଅଧିକାରୀଙ୍କ ଅବହେଳା ଏବଂ ଠିକା କମ୍ପାନୀର ମନମୁଖି କାର୍ଯ୍ୟ ବ୍ରିଜ୍ ନିର୍ମାଣକୁ ଶେଷ କରିପାରିନାହଁି। ଲୋକମାନେ ଜୀବନକୁ ବାଜି ଲଗାଇ ନଦୀପାର ହୋଇ ଯାତାୟାତ କରୁଛନ୍ତି। ଅନେକ ଥର ଭରା ନଦୀରେ ଡଙ୍ଗା ବୁଡ଼ି ବହୁ ଜୀବନ ଯାଇଥିବା ନଜିର ମଧ୍ୟ ଏଠାରେ ରହିଛି। ମାଲକାନଗିରି ଜିଲା ସୀମାନ୍ତ ମୋଟୁଠାରେ ପ୍ରବାହିତ ହେଉଛି ସିଲେରୁ ଓ ସାବେରୀ ନଦୀ। ବର୍ଷ ତମାମ ଏହି ନଦୀରେ ଜଳ ଥାଏ l ଏହି ଦୁଇ ନଦୀ ଦେଇ ମାଲକାନଗିରି ଜିଲା ଲୋକେ ଓ ଅନ୍ୟ ଜିଲାର ଲୋକେ ଯାତାୟାତ କରିଥାନ୍ତି l ସାବେରୀ ନଦୀର ଉପରମୁଣ୍ଡରେ ନିର୍ମାଣ ଚାଲିଥିବା ବ୍ରିଜ଼୍ ରାଞ୍ଚତ୍-ବିଜୟୱାଡାକୁ ସଂଯୋଗ କରୁଛି l ମାଲକାନଗିରିରୁ ପ୍ରତିଦିନ ରାଞ୍ଚତ୍-ବିଜୟୱାଡାକୁ ବସ୍ ଯାତାୟାତ କରିଥାଏ। ତେବେ ବ୍ରିଜ୍ ନିର୍ମାଣ ସମ୍ପୂର୍ଣ୍ଣ ନ ହେଉ ନ ଥିବାରୁ ମୋଟୁଠାରୁ ଅନ୍ୟ ପଥ ଦେଇ ଗଲେ ଛତିଶଗଡ଼ ୩୦ କି.ମି. ପଡ଼େ l ବ୍ରିଜ୍ ଦେଇ ଯାତାୟାତ କଲେ ୧ କି.ମି. ପଡ଼ିଥାଏ। ମାଓବାଦୀ ଅଧ୍ୟୁଷିତ ମାଲକାନଗିରି ଜିଲାକୁ ରାଞ୍ଚତ୍-ବିଜୟୱାଡା ଓ ହାଇଦ୍ରାବାଦ ସହ ଯୋଡ଼ିବା ପାଇଁ ଏହି ବ୍ରିଜ୍ ନିର୍ମାଣ ଚାଲିଛି। ୫ବର୍ଷ ହେଲା ଏହାର ନିର୍ମାଣ ଶେଷ ହୋଇପାରୁ ନ ଥିବାରୁ ଏନେଇ ସ୍ଥାନୀୟ ଲୋକଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି l ତୁରନ୍ତ ଏହାର ନିର୍ମାଣ କାର୍ଯ୍ୟ ସାରିବାକୁ ସାଧାରଣରେ ଦାବି ହେଉଛି।
