ଯାଜପୁର ଅଫିସ,୨୭ା୩: ଯାଜପୁର ସହରର ୟୁନିଟ-୮ ଯଯାତିନଗରର ପ୍ଲଟ ନମ୍ବର ୬୬୭, ଖାତା ନମ୍ବର ୬୩୬/୫୦୩ରେ ଥିବା ଏକ ଜଳାଶୟ କିସମ ଜମିକୁ ପୋତି ଶପିଂ ମଲ୍ ନିର୍ମାଣ ହେଉଛି। ଏହିମର୍ମରେ ରାଜ୍ୟ ସରକାର ଏବଂ ଜବରଦଖଲକାରୀଙ୍କ ବିରୋଧରେ ସ୍ଥାନୀୟ ବାସିନ୍ଦା ଚନ୍ଦ୍ରଶେଖର ରାୟ ନ୍ୟାଶନାଲ ଗ୍ରୀନ ଟ୍ରିବ୍ୟୁନାଲ(ଏନ୍ଜିଟି)ରେ ଅଭିଯୋଗ କରିଛନ୍ତି। ଏନେଇ ଏନ୍ଜିଟିରେ ୩୧/୨୦୨୩/ଇଜେଡ୍ ନମ୍ବରରେ ଏକ ମାମଲା ରୁଜୁ ହୋଇଛି। ଏନ୍ଜିଟିର ଜଷ୍ଟିସ ବି.ଅମିତ୍ ସ୍ଥାଲେକର ଓ ଜୁଡିସିଆଲ ମେମ୍ବର ପ୍ରଫେସର ଏ. ସେନ୍ଥିଲ ୨୨ା୩ା୨୦୨୩ରେ ଉକ୍ତ ମାମଲାର ଶୁଣାଣି କରି ସମସ୍ତ ଜବାବଦାତାଙ୍କୁ ୪ ସପ୍ତାହ ମଧ୍ୟରେ ସତ୍ୟପାଠ ଦାଖଲ କରିବାକୁ ନିର୍ଦ୍ଦେଶ ଦେଇଛନ୍ତି। ଏହାବାଦ୍ ପରବର୍ତ୍ତୀ ଶୁଣାଣି ପର୍ଯ୍ୟନ୍ତ ଉକ୍ତ ଜଳାଶୟ କିସମ ଜମିରେ ନିର୍ମାଣ କାର୍ଯ୍ୟକୁ ସ୍ଥଗିତ ରଖିବା ଏବଂ ଯାଜପୁର ଜିଲାପାଳ ଏହାର ଅନୁପାଳନ କରିବାକୁ ଶୁଣାଣିରେ ଦର୍ଶାଯାଇଛି।
ପୌରାଣିକ କିମ୍ବଦନ୍ତୀ ବହନ କରୁଥିବା ଯାଜପୁର ଜିଲାରେ ପ୍ରାୟ ୩ ହଜାରରୁ ଊର୍ଦ୍ଧ୍ୱ ପୋଖରୀ ଥିଲା ବୋଲି ଜନଶ୍ରୁତି ରହିଛି। କିନ୍ତୁ ଏବେ ୨,୩୮୯ଟି ପୋଖରୀ ରହିଥିବା ସରକାରୀ ଭାବେ କୁହାଯାଇଛି। ସେଥିମଧ୍ୟରୁ କୋରେଇ ବ୍ଲକରେ ସର୍ବାଧିକ ୮୨୮ଟି ରହିଥିବାବେଳେ ବଡ଼ଚଣା ବ୍ଲକରେ ୧୯୯, ବରୀରେ ୫୧, ବିଞ୍ଝାରପୁରରେ ୧୨୫, ଦାନଗଦିରେ ୨୦୫, ଦଶରଥପୁରରେ ୨୨୩, ଧର୍ମଶାଳାରେ ୨୦୫, ଯାଜପୁର ବ୍ଲକରେ ୧୨୧, ରସୁଲପୁରରେ ୧୮୭, ସୁକିନ୍ଦାରେ ୧୪୫ ଏବଂ ବ୍ୟାସନଗର ଓ ଯାଜପୁର ମ୍ୟୁନିସିପାଲିଟି ଅଞ୍ଚଳରେ ୧୦୦ ପୋଖରୀ ରହିଛି। ହେଲେ ଦ୍ରୁତ ଶିଳ୍ପାୟନ ସହ ସହରୀକରଣ ସହରର ଭୂଗୋଳକୁ ବଦଳାଇ ଦେଇଛି। ବର୍ଷାଜଳର ସଂରକ୍ଷଣ ସହ ସହର ବସତିକୁ ଅତିବୃଷ୍ଟିର କ୍ଷୟକ୍ଷତିରୁ ସୁରକ୍ଷିତ ରଖିବା ଉଦ୍ଦେଶ୍ୟରେ ଶହ ଶହ ବର୍ଷର ଯୋଜନାବଦ୍ଧ ଭାବରେ କରାଯାଇଥିବା ବନ୍ଧ, ପୋଖରୀଗୁଡ଼ିକ ହଜି ଯାଉଛି। ସହରାଞ୍ଚଳ ଓ ଗ୍ରାମାଞ୍ଚଳରେ ଥିବା ଜଳାଶୟଗୁଡ଼ିକୁ ସଂରକ୍ଷଣ ଓ ପ୍ରଦୂଷଣମୁକ୍ତ କରିବାକୁ ରାଜ୍ୟ ସରକାରଙ୍କ ପକ୍ଷରୁ ଏକାଧିକ ନିର୍ଦ୍ଦେଶ ହେଉଛି। ହେଲେ ପ୍ରଶାସନିକସ୍ତରରେ ଆନ୍ତରିକତାର ଅଭାବ ଯୋଗୁ ସରକାରଙ୍କ ଏହି ଉଦ୍ଦେଶ୍ୟ ସଫଳ ହୋଇପାରୁନାହିଁି। କେତେଜଣ ପ୍ରଭାବଶାଳୀ ବ୍ୟକ୍ତି ପୋଖରୀ ପୋତିବାକୁ ଯୋଜନାବଦ୍ଧ ଭାବରେ ଷଡ଼ଯନ୍ତ୍ର କରୁଛନ୍ତି। ଏଥିରେ ମୋଟା ଅଙ୍କର ହାତଗୁଞ୍ଜା ନେଇ ସରକାରୀ ଅଧିକାରୀ ସହଯୋଗ କରୁଥିବା ମଧ୍ୟ ଅଭିଯୋଗ ହେଉଛି। ଏହି କ୍ରମରେ ଯାଜପୁର ସହରର ଉକ୍ତ ପୋଖରୀ ପୋତାଯିବାକୁ ନେଇ ମାମଲା ଏନ୍ଜିଟିରେ ପହଞ୍ଚତ୍ଛି। ଅଭିଯୋଗ ଅନୁସାରେ ରେଭିନ୍ୟୁ ରେକର୍ଡରେ ଏହି ଜମି ଜଳାଶୟ କିସମ। ଏଥିପାଇଁ ୧୨ା୪ା୨୦୨୧ ଏବଂ ୧୨ା୫ା୨୦୨୧ରେ ଯାଜପୁର ସ୍ପେଶାଲ ପ୍ଲାନିଂ ଅଥରିଟି ଓ ଯାଜପୁର ପୌର ପରିଷଦର ନିର୍ବାହୀ ଅଧିକାରୀ ଉକ୍ତ ଜଳାଶୟ କିସମ ଜମିରେ ନିର୍ମାଣ ବନ୍ଦ କରିବାକୁ ଜବରଦଖଲକାରୀଙ୍କୁ ନୋଟିସ ଦେଇଥିଲେ। କିନ୍ତୁ ଉକ୍ତ ନୋଟିସର ପ୍ରାୟ ୨ ବର୍ଷ ଅତିକ୍ରାନ୍ତ ହୋଇ ସାରିଥିବାବେଳେ ସରକାରୀସ୍ତରରେ କୌଣସି ପଦକ୍ଷେପ ଗ୍ରହଣ କରାଗଲା ନାହିଁ। ଏଭଳି ସ୍ଥିତିରେ ଜବରଦଖଲକାରୀ ନିର୍ମାଣ କାର୍ଯ୍ୟକୁ ଆଗେଇ ନେଇଛନ୍ତି। ଅଧିକାରୀଙ୍କ ଉକ୍ତ ନିର୍ଦ୍ଦେଶନାମା କେବଳ ବଳ କଷିବାକୁ ପ୍ରଜୁଯ୍ୟ ଥିଲା ବୋଲି ସନ୍ଦେହ କରାଯାଇଛି। ତେଣୁ ଏହି ସମ୍ବେଦନଶୀଳ ମାମଲାକୁ ଏନ୍ଜିଟି ଗ୍ରହଣ କରି ସମ୍ପୃକ୍ତ ଅଧିକାରୀ, ଜବରଦଖଲକାରୀ ଏବଂ ରାଜ୍ୟ ସରକାରଙ୍କ ନୋଟିସ ଜାରି ହୋଇଛି। ଜିଲାରେ ଏଭଳି ଶତାଧିକ ଜଳାଶୟ କିସମ ଜମି ଜବରଦଖଲକାରୀଙ୍କ କବ୍ଜାରେ ରହିଥିବାବେଳେ ସରକାରୀ ଅଧିକାରୀ ନୀରବଦ୍ରଷ୍ଟା ସାଜିଛନ୍ତି।