ନୂଆଗାଁ,୧୪।୮(ଧନେଶ୍ୱର ସାହୁ): ନୟାଗଡ଼ ଜିଲା ନୂଆଗାଁ ବ୍ଲକ ନିକଟରେ ଚାଲିଥିବା ପ୍ରାଣୀ ଚିକିତ୍ସାଳୟ ଗୃହ ନିର୍ମାଣ କାର୍ଯ୍ୟରେ ବିଣ୍ଡା ସିମେଣ୍ଟ ବ୍ୟବହାର ହେଉଥିବା ନେଇ ଅଭିଯୋଗ ହୋଇଛି। ତେବେ ଅଭିଯୋଗ ଶୁଣିବା ପରେ ଚିକିତ୍ସାଳୟ ଗୃହ ନିର୍ମାଣ କାର୍ଯ୍ୟରେ କୌଣସି ଅନିୟମିତତାକୁ ପ୍ରଶୟ ଦିଆଯିବ ନାହିଁ। ଆବଶ୍ୟକ ହେଲେ ଆମେ ବିଭାଗୀୟ ଉଚ୍ଚପଦାଧିକାରୀଙ୍କୁ ଜଣାଇବୁ ବୋଲି କହିଛନ୍ତି ଜିଲା ମୁଖ୍ୟ ପ୍ରାଣୀ ଚିକିତ୍ସାଧିକାରୀ।
ପଶୁପକ୍ଷୀ,ଗାଈଗୋରୁଙ୍କ ସୁରକ୍ଷା, ଚିକିତ୍ସା କରାଇବା, ସେମାନଙ୍କ ସୁରକ୍ଷା ପାଇଁ ଜନ ସଚେତନ ସୃଷ୍ଟି କରାଇବା, କୃଷକ, ଗୋପାଳକଙ୍କୁ ଋଣ ମାଧ୍ୟମରେ ଗାଈ, କୁକୁଡା ଆଦି ଯୋଗାଇ ଦେବା ନିମନ୍ତେ ନୂଆଗାଁ ବ୍ଲକ ନିକଟରେ ପ୍ରାଣୀ ଚିକିତ୍ସାଳୟ ପ୍ରତିଷ୍ଠା କରାଯାଇଥିଲା। ସେହି ସମୟରେ ପ୍ରାଣୀ ଚିକିତ୍ସା କେନ୍ଦ୍ରରେ ଅଧିକାରୀ, କର୍ମଚାରୀ ଆଦି ରହି ତାହାର ସୁରକ୍ଷା ଦାୟିତ୍ୱ ନେଉଥିଲେ। କାଳକ୍ରମେ ରକ୍ଷଣାବେକ୍ଷଣ ଅଭାବରୁ ପୁରୁଣା ଘର ସବୁ ଭାଙ୍ଗିବାକୁ ବସିଲାଣି। ତେଣୁ ନୂତନ ପ୍ରାଣୀ ଚିକିତ୍ସାଳୟ ଗୃହ ନିର୍ମାଣ କରିବା ପାଇଁ ସରକାର ୬୪ ଲକ୍ଷ ଟଙ୍କା ଅନୁଦାନ ଦେଇଥିବା ବେଳେ ତା’ର ନିର୍ମାଣ କାର୍ଯ୍ୟ ଓଡ଼ିଶା କ୍ଷୁଦ୍ରଶିଳ୍ପ ନିଗମ ତରଫରୁ ଟେଣ୍ଡର ମାଧ୍ୟମରେ ଠିକାଦାର ଚୟନ କରାଯାଇଛି। ଉକ୍ତ ନିର୍ମାଣ କାର୍ଯ୍ୟ ଅତି ନିମ୍ନମାନର ହେଉଛି। ବିଭାଗୀୟ ଅଧିକାରୀ କେବେ କାମ ଦେଖିବା ପାଇଁ ଆସୁ ନ ଥିବା ବେଳେ ଠିକାଦାର ନିଜକୁ ସୁହାଇଲା ଭଳି କାମ କରୁଛନ୍ତି। ଶସ୍ତା ଦରରେ ବିଣ୍ଡା ସିମେଣ୍ଟ କିଣି ଉକ୍ତ କାର୍ଯ୍ୟରେ ବ୍ୟବହାର କରିବା ସହ ବାଲି ପୋତିବା ବଦଳରେ ମାଟି ପୋତୁଥିବା ନେଇ ଅଭିଯୋଗ ହେଉଛି। ବିଣ୍ଡା ସିମେଣ୍ଟରେ କାମ କରୁଥିବା ସମୟରେ କେତେଜଣ ସ୍ଥାନୀୟ ଲୋକ ଏହାକୁ ବିରୋଧ କରିଥିଲେ ମଧ୍ୟ ତାହାକୁ ଖାତିର ନ କରି ଠିକାଦାର ନିର୍ଦ୍ଦେଶରେ ସେହି ବିଣ୍ଡା ସିମେଣ୍ଟରେ କାର୍ଯ୍ୟ କରାଯାଇଥିଲା। ଏ ନେଇ ନୂଆଗାଁ ବ୍ଲକ ପ୍ରାଣୀ ଚିକିତ୍ସାଧିକାରୀ ଶୁଭାଶିଷ ମହାପାତ୍ରଙ୍କୁ ଜଣାଇବାରେ ବିଣ୍ଡା ସିମେଣ୍ଟ ବ୍ୟବହାର ନ କରିବା ପାଇଁ ଠିକାଦାରକୁ ଫୋନ କରି ଜଣାଇଛି ବୋଲି କହିଥିଲେ। ନିମ୍ନମାନର କାର୍ଯ୍ୟ ବାବଦରେ ଜିଲା ମ୍ୁଖ୍ୟ ପ୍ରାଣୀ ଚିକିତ୍ସାଧିକାରୀ ପ୍ରଶାନ୍ତ କୁମାର ମିଶ୍ରଙ୍କୁ ପଚାରିବାରେ କେବଳ ପ୍ରାଣୀ ଚିକିତ୍ସାଳୟ ଗୃହ ନିର୍ମାଣ କାର୍ଯ୍ୟରେ ନୁହଁ , ଆମ ବିଭାଗ ସହ ସଂଶ୍ଳିଷ୍ଟ ଥିବା କୌଣସି କାର୍ଯ୍ୟରେ ଅନିୟମିତତାକୁ ପ୍ରଶୟ ଦିଆଯିବ ନାହିଁ। ଅଭିଯୋଗ ପାଇଲେ ନିଶ୍ଚିତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ନିମ୍ନମାନର ଗୃହ ନିର୍ମାଣ ବିଷୟରେ କାର୍ଯ୍ୟ କରାଉଥିବା ବିଭାଗର ଉଚ୍ଚ ପଦସ୍ଥ ଅଧିକାରୀଙ୍କୁ ଜଣାଇବେ ବୋଲି କହିଛନ୍ତି ଜିଲା ମୁଖ୍ୟ ଚିକିତ୍ସାଧିକାରୀ ମିଶ୍ର।