ରସୁଲପୁର,୧୫ା୧(ରଂଜିତ ରାଉତ): ରସୁଲପୁର ବ୍ଲକ ଅନ୍ତର୍ଗତ ୨୮ ପଞ୍ଚାୟତରେ ୨୪ ଉଚ୍ଚ କ୍ଷମତା ସମ୍ପନ୍ନ ପାଣିଟାଙ୍କି ନିର୍ମାଣ ଚାଲିଛି। ନିର୍ମାଣ ଦାୟିତ୍ୱ ଠିକାସଂସ୍ଥା କେଇସି ଉପରେ ନ୍ୟସ୍ତ କରାଯାଇଛି। ହେଲେ ମୂଳ ଠିକାସଂସ୍ଥାର ଖାମଖିଆଲି ମନୋଭାବ ଯୋଗୁ ନିର୍ମାଣ କାର୍ଯ୍ୟ ଧିମେଇଛି। ଫଳରେ ଠିକ୍ ସମୟରେ କାମ ସରିବ ନାହିଁ ବୋଲି କୁହାଯାଉଛି। ଏଥିସହିତ କାର୍ଯ୍ୟ ନିମ୍ନମାନର ଓ ବିବାଦୀୟ ଜମି ଉପରେ କରାଯାଉଛି ବୋଲି ବିଭିନ୍ନ ସମୟରେ ଆସୁଥିବା ଅଭିଯୋଗରୁ ଜଣାଯାଇଛି।
ଏଠାରେ ଠିକାସଂସ୍ଥା ନିର୍ମାଣ କାର୍ଯ୍ୟକୁ ନିଜେ ନ କରି ଅନ୍ୟ ଏଜେନ୍ସି ଉପରେ ନ୍ୟସ୍ତ କରି ଦେଇଥିବାରୁ ନିର୍ମାଣର ସ୍ଥାୟିତ୍ୱ ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି। ଠିକାସଂସ୍ଥା ପାଣିଟାଙ୍କି ନିର୍ମାଣ ଦାୟିତ୍ୱ ଛୋଟ ଠିକାଦାର(ପେଟି ଠିକାଦାର)ଙ୍କ ହାତକୁ ଟେକି ଦେଇଥିବାରୁ ସମସ୍ୟା ଉପୁଜୁଛି। ଏହିଭଳି ଘଟଣା ବ୍ଲକର ଭୋଟକା ଓ ନରସିଂହପୁର ପଞ୍ଚାୟତରେ ଦେଖିବାକୁ ମିଳିଛି। ଏହି ଦୁଇଟି ସ୍ଥାନରେ ପାଣିଟାଙ୍କି ନିର୍ମାଣ ଦାୟିତ୍ୱରେ ବାହାର ରାଜ୍ୟର ଠିକାଦାର ଅନିଲ ଠାକୁରଙ୍କ ଉପରେ ନ୍ୟସ୍ତ କରାଯାଇଥିଲା। ହେଲେ ସମ୍ପୃକ୍ତ ଠିକାଦାର ଅଧାରୁ କାମ ଛାଡ଼ି ଚାଲିଯାଇଥିବା ଜଣାଯାଇଛି। ତେଣୁ ଉକ୍ତ ସଂସ୍ଥା ପକ୍ଷରୁ ନିୟୋଜିତ ଶ୍ରମିକ, ସପ୍ଲାୟର, ଘରଭଡ଼ା ଭଳି କେତେକଙ୍କର ବକେୟା ଟଙ୍କା ପୈଠ କରାଯାଇ ନାହିଁ ବୋଲି ଅଭିଯୋଗ ହେଉଛି। କାମର ବିଲ ମିଳିଲେ ବକେୟା ପାଉଣ ଦେବେ ବୋଲି ଠିକାଦାର କହିଥିଲେ। ହେଲେ ତାହା ହୋଇ ପାରୁନାହିଁ। ଅନ୍ୟପକ୍ଷରେ ପୁରୁଣା ଏଜେନ୍ସି ଚାଲିଯିବା ପରେ ପୁଣି ଆଉ ଏକ ନୂଆ ଏଜେନ୍ସି ଖୋଜୁଛି ଠିକାସଂସ୍ଥା କେଇସି। ସ୍ଥାନୀୟ ଅଞ୍ଚଳର ଜଣେ ଠିକାଦାରଙ୍କ ଉପରେ ଅଧାଗଡ଼ା ନିର୍ମାଣ କାର୍ଯ୍ୟକୁ ନ୍ୟସ୍ତ କରିବାକୁ ଚିନ୍ତା କରୁଛି ଠିକାସଂସ୍ଥା। କିନ୍ତୁ ନିର୍ମାଣ ସ୍ଥଳରେ ନିୟୋଜିତ ହୋଇଥିବା ଶ୍ରମିକ, ସୁରକ୍ଷାକର୍ମଚାରୀ, ସୁପରଭାଇଜରଙ୍କ ଦରମା, ସପ୍ଲାୟରଙ୍କ ପାଉଣା, ଠିକାସଂସ୍ଥା ପକ୍ଷରୁ ନିଆଯାଇଥିବା ଘରଗୁଡିକର ଭଡ଼ା ଆଦି ଲକ୍ଷାଧିକ ବକେୟା ଅର୍ଥରାଶି ଏଯାଏ ପୈଠ ହୋଇପାରି ନ ଥିବାରୁ ନୂଆ ଏଜେନ୍ସି ନିଯୁକ୍ତି ହୋଇପାରୁନାହିଁ। ଅପରପକ୍ଷରେ ପୁରୁଣା ଠିକାଦାରଙ୍କ ଠାରୁ ପାଉଣା ପାଇ ନ ଥିବା କର୍ମଚାରୀଙ୍କୁ କମ୍ପାନୀ ପକ୍ଷରୁ ସହଯୋଗ ମିଳୁନାହିଁ। ସେମାନଙ୍କ ବକେୟା ପାଉଣା ପୈଠ ନ କରି ନୂଆ ଏଜେନ୍ସି ନିଯୁକ୍ତି କରାଗଲେ କର୍ମଚାରୀ ନିର୍ମାଣ କାର୍ଯ୍ୟ କରାଇବାରେ ବାଧକ ସାଜିବା ପାଇଁ ଯୋଜାନା କରୁଥିବା ଜଣାଯାଇଛି। ଏହିଭଳି ବିବାଦ ଯୋଗୁ କେଇସି ପକ୍ଷରୁ ଏକ ନୂଆ ଏଜେନ୍ସି ଯୋଗାଡ କରାଯାଇଥିଲେ ବି ତା’କୁ କାର୍ଯ୍ୟରେ ନିୟୋଜିତ କରାଯାଇ ପାରୁନାହିଁ।
ଏ ସମ୍ପର୍କରେ ପୁରୁଣା ଠିକାସଂସ୍ଥାର ସୁପରଭାଇଜର ଓ ସୁରକ୍ଷାକର୍ମଚାରୀଙ୍କୁ ପଚାରିବାରୁ ସେମାନେ କହିଛନ୍ତି, ୫ମାସର ଦରମା ମିଳିନାହିଁ। ଏ ନେଇ କେଇସି କମ୍ପାନୀକୁ ଲିଖିତ ଭାବରେ ଜଣାଇଛନ୍ତି। ଉକ୍ତ ମାମଲାକୁ ଫଇସଲା କରିବାକୁ ସେମାନେ କମ୍ପାନୀର କୁଆଖିଆ କାର୍ଯ୍ୟାଳୟକୁ ବାରମ୍ବାର ଦୌଡୁଛନ୍ତି। ହେଲେ ସମାଧାନର ବାଟ ବାହାରୁନାହିଁ। କମ୍ପାନୀ ସେମାନଙ୍କ ବକେୟା ଟଙ୍କା ନ ଦେଇ କାମ ଆରମ୍ଭ କଲେ ଏହାକୁ କର୍ମଚାରୀ ବିରୋଧ କରିବେ ବୋଲି ମତ ରଖିଛନ୍ତି। ଏ ନେଇ କେଇସି କମ୍ପାନୀର ପ୍ରକଳ୍ପ ପରିଚାଳକ ଅରବିନ୍ଦ କୁମାରଙ୍କୁ ପଚାରିବାରୁ କାମକୁ ନେଇ ସ୍ଥାନୀୟ ଅଞ୍ଚଳରେ ସମସ୍ୟା ରହିଥିବା ଅଭିଯୋଗକୁ ସ୍ବୀକାର କରିଛନ୍ତି। ତେଣୁ ଉକ୍ତ ସମସ୍ୟାକୁ ତୁରନ୍ତ ସମାଧାନ କରାଯାଇ ପୁଣି କାର୍ଯ୍ୟ ଆରମ୍ଭ କରାଯିବ ବୋଲି ପ୍ରକାଶ କରିଛନ୍ତି। ଏବେ ଦେଖିବାକୁ ଅପେକ୍ଷା କେବେ ଏହାର ସମାଧାନ କରାଯାଇ କାର୍ଯ୍ୟ ଆରମ୍ଭ ହେଉଛି।