ଯାଜପୁର ସଦର,୨୨।୩(ଡି.ଏନ.ଏ.): ଯାଜପୁର ବ୍ଲକ ଅନ୍ତର୍ଗତ ଶ୍ୟାମଦାସପୁର ପଞ୍ଚାୟତର କଳସପୁର ବାଲିଘାଟକୁ ସଂଯୋଗ କରୁଥିବା ରାସ୍ତା ଖରସ୍ରୋତା ନଦୀବନ୍ଧକୁ ଲାଗିଛି। ତେଣୁ ଉକ୍ତ ଘାଟରୁ ବାଲି ପରିବହନ ପାଇଁ ଖରସ୍ରୋତାର ଦୁର୍ବଳ ନଦୀବନ୍ଧକୁ ହାଣି ଗୋଡ଼ା ନିର୍ମାଣ କରାଯାଇଛି। ଫଳରେ ଖରସ୍ରୋତା ନଦୀବନ୍ଧ ସୁରକ୍ଷାକୁ ନେଇ ମାଧପୁର, କଳସପୁର ଓ ଭୁବନପୁର ଆଦି ଗ୍ରାମର ଜନସାଧାରଣଙ୍କ ମନରେ ଆଶଙ୍କା ସୃଷ୍ଟି ହେଉଛି। ଉକ୍ତ ନଦୀବନ୍ଧର ସୁରକ୍ଷା ପ୍ରତି ଧ୍ୟାନ ଦିଆ ନ ଯାଇ ବନ୍ଧକୁ ହାଣି ବାଲି ବୋଝେଇ ଟ୍ରକ, ହାଇୱା ଓଭର ଲୋଡ କରି ଯାତାୟାତ କରୁଛି। ଦୁର୍ବଳ ନଦୀବନ୍ଧକୁ କାଟି ଗୋଡ଼ା କିଏ କରୁଛି ତାହା ଜଳସମ୍ପଦ ବିଭାଗ ଜାଣି ନ ଥିବା କହୁଛି। ୨୦ନଂ. ଜାତୀୟ ରାଜପଥର ରାଜଘାଟଠାରୁ ତନ୍ତିଘାଇ ପର୍ଯ୍ୟନ୍ତ ଏହି ଖରସ୍ରୋତା ନଦୀବନ୍ଧ ଯାଇଛି। ବନ୍ଧ କଡ଼ରେ ମାଧପୁର, କଳସପୁର, ଭୁବନପୁର, ହାସୀନପୁର ଆଦି ଗ୍ରାମ ଅବସ୍ଥିତ। ବିଗତ ବର୍ଷରେ ଅନେକ ଥର ବନ୍ଧଭାଙ୍ଗି ବହୁ ଧନଜୀବନ ନଷ୍ଟ କରିଥିବା ନଜର ରହିଛି। ଅନେକ ସ୍ଥାନରେ ଘୋଳିଆ ପଡ଼ିବାର ମଧ୍ୟ ଦେଖାଦେଇଛି। ମାତ୍ର ଦୁର୍ବଳ ନଦୀବନ୍ଧ ଉପରେ କଳସପୁର ବାଲିଘାଟରୁ ଭାରିଯାନ ଚଳାଚଳ ଯୋଗୁ ବନ୍ଧର ସୁରକ୍ଷା ପ୍ରତି ବିପଦ ଦେଖାଦେଇଛି। ଦୁର୍ବଳ ନଦୀବନ୍ଧକୁ ହାଣି ଗୋଡ଼ା କରିବା ଦ୍ୱାରା ନଦୀରେ ପାଣି ହେଲେ ଘାଇ ସୃଷ୍ଟି ହେବା ସମ୍ଭାବନା ରହିଛି। ଜଳ ସମ୍ପଦ ଅଗୋଚରରେ ନଦୀବନ୍ଧ କାଟି ଗୋଡ଼ା ନିର୍ମାଣ କାହା ନିର୍ଦ୍ଦେଶରେ ହୋଇଛି ବୋଲି ସାଧରଣରେ ପ୍ରଶ୍ନବାଚୀ ସୃଷ୍ଟି ହୋଇଛି।
ଏହାଛଡ଼ା ଓଭର ଲୋଡ୍ ବାଲିଗାଡ଼ି ଚଳାଚଳ କରୁଥିବାରୁ ଅନ୍ୟ ୨ ଚକିଆ, ୩ ଚକିଆ, ୪ ଚକିଆ ଗାଡ଼ି ଏହି ବନ୍ଧରେ ଯିବାଆସିବା ସମ୍ଭବ ହେଉନାହଁି। ବାଲିମାଫିଆ ନିଜ ଇଚ୍ଛାରେ ଗାଡ଼ି ଚଳାଉଛନ୍ତି। ବାଲିଘାଟ ନିକଟରେ ବିଦ୍ୟାଳୟ ଓ ଅଙ୍ଗନୱାଡ଼ି କେନ୍ଦ୍ର ରହିଛି। ଫଳରେ ଅଭିଭାବକ ପିଲାଙ୍କୁ ବିଦ୍ୟାଳୟ ଓ ଅଙ୍ଗନୱାଡ଼ି ଛାଡ଼ିବାକୁ ଭୟ କରୁଛନ୍ତି। ବାଲି ବୋଝେଇ ଗାଡ଼ି ଚଳାଚଳ ଯୋଗୁ ବିଦ୍ୟାଳୟରେ ପାଠପଢ଼ା ବ୍ୟାଘାତ ହେଉଛି। ବିଦ୍ୟାଳୟ ଛାତ୍ରୀଛାତ୍ର ଖେଳଛୁଟିରେ ପଡ଼ିଆ କିମ୍ବା ରାସ୍ତାକୁ ମଧ୍ୟ ଆସିପାରୁନାହାନ୍ତି। ଏଭଳି ପରସ୍ଥିତିରେ ଜିଲା ପ୍ରଶାସନ କିପରି କଳସପୁର ବାଲିଘାଟ ନିଲାମ କଲା ତାହା ବଡ଼ ପ୍ରଶ୍ନବାଚୀ ହୋଇଛି। ନଦୀରେ ସାମାନ୍ୟ ବନ୍ୟା ଆସିଲେ ଗୋଡ଼ା ହୋଇଥିବା ସ୍ଥାନରେ ନିଶ୍ଚୟ ଘାଇ ହେବ ଜାଣି ମଧ୍ୟ ମାଫିଆ ନିର୍ଭୟରେ ବାଲି ପରିବହନ କରୁଛନ୍ତି। ତେଣୁ ଏ ଦିଗରେ ଜଳ ସମ୍ପଦ ବିଭାଗ ଓ ତହସିଲ ପ୍ରଶାସନ ଧ୍ୟାନ ଦେବାକୁ ସାଧାରଣରେ ଦାବି ହେଉଛି।