ନୂଆଦିଲ୍ଲୀ, ୨।୮: ଆବଶ୍ୟକ ଜମି ନ ମିଳିବାରୁ ୧୭ ଜବାହର ନବୋଦୟ ବିଦ୍ୟାଳୟର ନିର୍ମାଣ କାର୍ଯ୍ୟ ଅଟକି ରହିଛି। ଲୋକ ସଭାରେ ସୋମବାର କେନ୍ଦ୍ରୀୟ ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଲୋକ ସଭାରେ ରତନ ସିଂ ମାଗନ ସିଂ ରାଠୋରଙ୍କର ଏକ ପ୍ରଶ୍ନର ଲିଖିତ ଉତ୍ତରରେ ଏହି ସୂଚନା ଦେଇଛନ୍ତି। ଜବାହର ନବୋଦୟ ବିଦ୍ୟାଳୟ(ଜେଏନ୍ଭି) ପାଇଁ ସ୍ଥାୟୀ କୋଠା ନିର୍ମାଣ ଏକ ଦୀର୍ଘକାଳୀନ ପ୍ରକ୍ରିୟା ଏବଂ ସମ୍ପୃକ୍ତ ରାଜ୍ୟ ସରକାରଙ୍କଠାରୁ ଜମି ନ ମିଳିବା କାରଣରୁ ଏସବୁ ବିଦ୍ୟାଳୟର ନିର୍ମାଣ ହୋଇ ପାରିନାହିଁ। ନବୋଦୟ ବିଦ୍ୟାଳୟ ଯୋଜନା ଅନ୍ତର୍ଗତ ଦେଶର ପ୍ରତ୍ୟେକ ଜିଲାରେ ଗୋଟିଏ ଜବାହର ନବୋଦୟ ବିଦ୍ୟାଳୟ ଖୋଲିବାକୁ ସରକାରଙ୍କ ପକ୍ଷରୁ ନିଷ୍ପତ୍ତି ଗ୍ରହଣ କରାଯାଇଛି। ଶିକ୍ଷାମନ୍ତ୍ରୀ କହିଛନ୍ତି ଯେ,ଏପର୍ଯ୍ୟନ୍ତ ୬୬୧ ଜବାହର ନବୋଦୟ ବିଦ୍ୟାଳୟକୁୁ ଅନୁମତି ଦିଆଯାଇଛି। ସେଥିମଧ୍ୟରୁ ୫୮୦ ବିଦ୍ୟାଳୟ ସ୍ଥାୟୀ କ୍ୟାମ୍ପସରେ କାର୍ଯ୍ୟ କରୁଛି। ନିର୍ମାଣ ହୋଇ ପାରି ନ ଥିବା ୧୭ ନବୋଦୟ ବିଦ୍ୟାଳୟ ମଧ୍ୟରୁ ଅରୁଣାଚଳ ପ୍ରଦେଶରେ ଗୋଟିଏ, ଆସାମରେ ଗୋଟିଏ, ବିହାରରେ ଗୋଟିଏ, ଛତିଶଗଡରେ କୋଟିଏ, ଦିଲ୍ଲୀରେ ୭ଟି, ଜାମ୍ମୁ କାଶ୍ମୀରରେ ୨ଟି, ଝାଡ଼ଖଣ୍ଡରେ ଗୋଟିଏ ଏବଂ ପଶ୍ଚିମ ବଙ୍ଗରେ ୩ଟି ରହିଛି। ଶିକ୍ଷାମନ୍ତ୍ରୀ କହିଛନ୍ତି ଯେ ଜବାହର ନବୋଦୟ ବିଦ୍ୟାଳୟ ପାଇଁ ସ୍ଥାୟୀ କ୍ୟାମ୍ପସ ନିର୍ମାଣ ଏକ ନିରନ୍ତର ପ୍ରକ୍ରିୟା। ଏହା ପାଇଁ ଆବଶ୍ୟକ ଜମି ମାଗଣାରେ ଯୋଗାଇବା ପାଇଁ ସମ୍ପୃକ୍ତ ରାଜ୍ୟ ସରକାର ଅବା କେନ୍ଦ୍ରଶାସିତ ଅଞ୍ଚଳର ପ୍ରଶାସନର ସହମତି ଉପରେ ନିର୍ଭର କରେ।