ଅନେକ ବାଧାବିଘ୍ନ ଅତିକ୍ରମ କରି ୯୦ ଦଶକରେ ଭୁବନେଶ୍ୱର ମାଷ୍ଟର କ୍ୟାଣ୍ଟିନରେ ଆରମ୍ଭ କରିଥିଲେ ‘ଗ୍ରୀନ୍ ଚିଲିଜ୍’। ଦୃଢ଼ ଇଚ୍ଛାଶକ୍ତି ତଥା ଅକ୍ଳାନ୍ତ ପରିଶ୍ରମ ବଳରେ ସେହି ଅନୁଷ୍ଠାନ ଆଜି ଏକ ଲୋକପ୍ରିୟ ଫୁଡ୍କୋର୍ଟ ଓ ଗ୍ରୀନ୍ ଚିଲିଜ୍ ଗ୍ରୁପ୍ରେ ପରିଗଣିତ ହୋଇଛି। ଉକ୍ତ ଫୁଡ୍ ଚେନ୍ର ପ୍ରତିଷ୍ଠାତା ଏମ୍. କେଶବ ରାଓ ନିଜ ସଂଘର୍ଷମୟ ଯାତ୍ରାର ଅନୁଭୂତି ଧରିତ୍ରୀ ସହ ବାଣ୍ଟିଛନ୍ତି।
ଗ୍ରୀନ୍ ଚିଲିଜ୍ର ଯାତ୍ରା କିପରି ଆରମ୍ଭ ହୋଇଥିଲା?
କମ୍ ବୟସରେ ପାଠପଢ଼ା ଛାଡ଼ି ପରିବାର ପ୍ରତିପୋଷଣ ପାଇଁ ସହର ସହର ବୁଲି କାମ ଖୋଜୁଥିଲି। ରାସ୍ତାକଡ଼ର ଠେଲା ଓ ଫୁଡ୍ କାଉଣ୍ଟରଗୁଡ଼ିକରୁ ଖାଦ୍ୟ ଖାଇ ଜୀବନ ଅତିବାହିତ କରୁଥାଏ। ଏହା ମଧ୍ୟରେ ମନରେ ଅନେକ ସ୍ବପ୍ନ ଧରି ଭୁବନେଶ୍ୱରକୁ ଫେରି ବେପାର କରିବାକୁ ଇଚ୍ଛା ହେଲା। ତା’ ପରେ ଆରମ୍ଭ ହୋଇଥିଲା ଏକ ନୂତନ ଅଧ୍ୟାୟ। ୧୯୯୯ ଜୁଲାଇରେ ସ୍ଥାନୀୟ ମାଷ୍ଟର କ୍ୟାଣ୍ଟିନ ଛକରେ ବିଏମ୍ସି ଓ ଓପଲଫେଡ୍ ସହାୟତାରେ ଏକ ବୁଥ୍ରେ ଆରମ୍ଭ କରିଥିଲି ଫାଷ୍ଟଫୁଡ୍ ବ୍ୟବସାୟ। କିଛିଦିନ ପରେ ମହାବାତ୍ୟା ମୋ ଦୋକାନ ଘରକୁ ସମ୍ପୂର୍ଣ୍ଣ ନଷ୍ଟ କରିଦେଲା। ହେଲେ ମୁଁ ହାର ନ ମାନି ପୁଣି ବ୍ୟବସାୟ ଆରମ୍ଭ କରିଥିଲି। ଗତ ୨୩ ବର୍ଷର ବ୍ୟବସାୟ ମଧ୍ୟରେ ଅନେକ ସମସ୍ୟାର ସମ୍ମୁଖୀନ ହୋଇ ମଧ୍ୟ ମହାପ୍ରଭୁ ଜଗନ୍ନାଥଙ୍କ ଭରସାରେ ଆଗେଇ ଚାଲିଛି। ବର୍ତ୍ତମାନ ଗ୍ରୀନ୍ ଚିଲିଜ୍ ଏକ ଗ୍ରୁପ୍ରେ ପରିଣତ ହେବା ସହ ସାରା ଦେଶରେ ସ୍ବତନ୍ତ୍ର ଫାଷ୍ଟଫୁଡ୍ ୟୁନିଟ୍ର ସୁନାମ ପାଇଛି।
ଗ୍ରୀନ୍ ଚିଲିଜ୍ର ସଫଳତା ପଛର ରହସ୍ୟ କ’ଣ?
ସଫଳତା ଦିନକରେ ମିଳେନାହିଁ। ୫ ବର୍ଷର ପରିଶ୍ରମ ଓ ଗୁଣାତ୍ମକ ଖାଦ୍ୟ ସାଙ୍ଗକୁ ଲୋକସମ୍ପର୍କ ଯୋଗୁ ଏହା ସମ୍ଭବ ହୋଇଛି। ସେହିଭଳି ଗ୍ରାହକଙ୍କ ଚାହିଦା ପୂରଣ ଓ ବୃତ୍ତିକୁ ବ୍ରତ ବୋଲି ଭାବିବା ସହ ସାଧୁତାକୁ ମଧ୍ୟ ଗୁରୁତ୍ୱ ଦେଇଆସିଛି। ଫଳରେ ଉଭୟ ଗ୍ରାହକ ଓ କର୍ମଚାରୀଙ୍କ ପ୍ରିୟପାତ୍ର ହେବା ସହିତ ସଫଳତାର ସ୍ବାଦ ଚାଖିବା ଆରମ୍ଭ କରିଥିଲି।
ଆପଣଙ୍କ ଆଗାମୀ ଯୋଜନା କ’ଣ ରହିଛି?
ବିନା ଯୋଜନାରେ ବ୍ୟବସାୟ କରିବା କଷ୍ଟକର। ଗତ ୨ ବର୍ଷରେ କୋଭିଡ୍ ମହାମାରୀର ପ୍ରଭାବ ଖାଦ୍ୟ ବ୍ୟବସାୟୀଙ୍କ ଉପରେ ଅନେକ ମାତ୍ରାରେ ପଡ଼ିଛି। ବ୍ୟବସାୟ ବନ୍ଦ ରହିଥିଲେ ମଧ୍ୟ କର୍ମଚାରୀ ଓ ପରିବାର ପ୍ରତିପୋଷଣ ଦାୟିତ୍ୱ ଥିଲା। ଏହାରି ମଧ୍ୟରେ କିଛି ପରିମାଣରେ କାରବାରରେ ସୁଧାର ଆସିଛି। ସମୟ ଠିକ୍ ରହିଲେ ଭୁବନେଶ୍ୱରବାସୀ ଗ୍ରୀନ୍ ଚିଲିଜ୍ ପକ୍ଷରୁ ଆଉ ଏକ ନୂଆ ପ୍ଲାଟ୍ଫର୍ମ ‘ଗୋଲ୍ଡେନ ଚିଲି’ରୁ ସୁଷମ ଓ ସ୍ବାଦିଷ୍ଟ ଖାଦ୍ୟର ମଜା ଉଠାଇପାରିବେ। ଉଭୟ ଗ୍ରୀନ୍ ଚିଲିଜ୍ ଏବଂ ଗୋଲ୍ଡେନ ସହ ଏହାର କ୍ୟାଟରିଙ୍ଗ ସୁବିଧା ଓ ସେବା ମଧ୍ୟ ଦେଶବାସୀଙ୍କୁ ଯୋଗାଇବା ଯୋଜନା ରହିଛି।
ଗ୍ରୀନ୍ ଚିଲିଜ୍ର ବୈଶିଷ୍ଟ୍ୟ କ’ଣ?
ଗ୍ରୀନ୍ ଚିଲିଜ୍ର ଅନେକ ବୈଶିଷ୍ଟ୍ୟ ରହିଛି, ସେଥିମଧ୍ୟରୁ ଭିନ୍ନ ଭିନ୍ନ ରାଜ୍ୟର ସଂଜ୍ଞା ବହନ କରୁଥିବା ବିରିୟାନି ଏବଂ ରୋଲ୍ର ଚାହିଦା ବେଶ୍ ଭଲ ରହିଛି। ସବୁ ବ୍ୟବସାୟରେ ମୁଖ୍ୟ ହେଉଛନ୍ତି ଗ୍ରାହକ। କିନ୍ତୁ ଗ୍ରୀନ୍ ଚିଲିଜ୍ରେ କୌଣସି ବର୍ଗ କିମ୍ବା ସ୍ବତନ୍ତ୍ର ଗ୍ରାହକ ନ ଥାନ୍ତି। ଏହାର ସ୍ବାଦ ଓ ଚାହିଦା ଯୋଗୁ ସବୁ ବର୍ଗର ଲୋକ ଗ୍ରୀନ୍ ଚିଲିର ପ୍ରମୁଖ ଗ୍ରାହକ ବୋଲି ଧରିଥାଉ। ଗ୍ରାହକ ଈଶ୍ୱର ହୋଇଥିବାରୁ କାହାକୁ ଆମେ ସ୍ବତନ୍ତ୍ର ବୋଲି ଭାବି ନ ଥାଉ।
ବର୍ତ୍ତମାନ ଖାଦ୍ୟ ବ୍ୟବସାୟରେ କାହାର ଟ୍ରେଣ୍ଡ ଭଲ ରହୁଛି?
ଫାଷ୍ଟଫୁଡ୍ ଖାଦ୍ୟର ମଜା ଉଠାଇବାକୁ ହେଲେ ପରିବାର ଓ ବନ୍ଧୁମାନଙ୍କ ସହ ଏକତ୍ର ବସି ଖୋଲା ଆକାଶ ତଳେ ଖାଇବାର ଆନନ୍ଦ ନିଆରା। ହେଲେ କୋଭିଡ୍ ପରଠାରୁ ଏହାର ଚାହିଦା ଧୀରେ ଧୀରେ ହ୍ରାସ ପାଉଛି। କେତେଜଣ ଗ୍ରାହକ ବର୍ତ୍ତମାନ ମଧ୍ୟ ଖୋଲା ଆକାଶ ତଳେ ବସି ଖାଉଛନ୍ତି। ହେଲେ ଅଧିକାଂଶ ଗ୍ରାହକ ଉଭୟ ଅନ୍ଲାଇନ୍ ଓ ଅଫ୍ଲାଇନ୍ ମାଧ୍ୟମରେ ପାର୍ସଲକୁ ପସନ୍ଦ କରୁଛନ୍ତି। କୋଭିଡ୍ ଭୟ ଯୋଗୁ ପାର୍ସଲର ଟ୍ରେଣ୍ଡ ବଢ଼ିଯାଇଛି। ଖାଦ୍ୟ ଡେଲିଭରି ସୁବିଧା ଓ ସେବା ଆସିବା ଦିନଠାରୁ ପାର୍ସଲ ଚାହିଦା ମଧ୍ୟ ବଢ଼ିଛି।
ଅବସର ବେଳେ କିପରି ସମୟ ଅତିବାହିତ କରିଥାନ୍ତି?
ବ୍ୟସ୍ତତା ମଧ୍ୟରେ ଅବସର ପାଇଁ ଆବଶ୍ୟକ ସମୟ ନ ଥାଏ। ହେଲେ ଘର, ପରିବାର ଓ ବନ୍ଧୁଜନଙ୍କ ସହ ଦେଖା ସାକ୍ଷାତ୍ଠାରୁ ଆରମ୍ଭ କରି ବିଭିନ୍ନ କାର୍ଯ୍ୟରେ ଯୋଗଦେବାକୁ ସମୟ ବାହାର କରିବାକୁ ପଡ଼େ। ଅବସର ବେଳେ ଯୁଆଡ଼େ ଗଲେ ବି ପିଲା ଓ ପରିବାର ସର୍ବୋପରି ମୋ ମା’ଙ୍କ ପାଖରେ ଅଧିକ ସମୟ କାଟିବାକୁ ମୋତେ ଭଲ ଲାଗେ।
ଯୁବ ବ୍ୟବସାୟୀଙ୍କୁ କି ପରାମର୍ଶ ଦେବେ?
ବ୍ୟବସାୟ ପାଇଁ ମନ ବଳାଉଥିବା ଯୁବ ବ୍ୟବସାୟୀଙ୍କୁ ଏତିକି କହିବି ବିଶ୍ୱାସଭାଜନ ଓ ଲୋକସମ୍ପର୍କକୁ ଗୁରୁତ୍ୱ ଦେବା ସହିତ କର୍ମଚାରୀ ଓ ବ୍ୟବସାୟରେ ସାଧୁତା ବଜାୟ ରଖିଲେ ସଫଳତା ଆପେ ଆପେ ମିଳିଯିବ।