ନୂଆଦିଲ୍ଲୀ,୧୫।୭: ଗତ କିଛି ମାସ ହେବ ଭାରତୀୟ ପାଇକାରୀ ମୁଦ୍ରାସ୍ଫୀତିରେ ପରିବର୍ତ୍ତନ ଦେଖାଦେଇଛି। ଏପରିକି ୨୦୨୩ରେ କ୍ରମାଗତ ୩ୟ ଥର ପାଇଁ ପାଇକାରୀ ମୁଦ୍ରାସ୍ଫୀତିର ହାର ହ୍ରାସ ପାଇଛି। ବିଶେଷକରି ଗତ ୮ ବର୍ଷର ସର୍ବନିମ୍ନ ସ୍ତରକୁ ପାଇକାରୀ ମୁଦ୍ରାସ୍ଫୀତି ହାର ଖସି ଆସିଛି। ଉଲ୍ଲେଖଯୋଗ୍ୟ, ଶୁକ୍ରବାର ବାଣିଜ୍ୟ ମନ୍ତ୍ରଣାଳୟ ପକ୍ଷରୁ ୨୦୨୩ ଜୁନ ମାସର ପାଇକାରୀ ମୁଦ୍ରାସ୍ଫୀତି ହାର ସମ୍ପର୍କରେ ବିସ୍ତୃତ ସୂଚନା ଦିଆଯାଇଛି। ଉକ୍ତ ସୂଚନା ଅନୁଯାୟୀ, ୨୦୨୩ ଜୁନ୍ରେ ଦେଶର ପାଇକାରୀ ମୁଦ୍ରାସ୍ଫୀତି ୪.୧୨%କୁ ଖସି ଆସିଛି। ୨୦୨୩ ମେରେ ମଧ୍ୟ ପାଇକାରୀ ମୁଦ୍ରାସ୍ଫୀତ ୩.୮% ରହିଥିଲା। ପାଇକାରୀ ମୁଦ୍ରାସ୍ଫୀତି ନିମ୍ନମୁଖୀ ହେବା ଫଳରେ ଦରଦାମ ବୃଦ୍ଧିର ସମ୍ଭାବନା ହ୍ରାସ ସହ ଖାଉଟି ସାମଗ୍ରୀରେ ଦର ହ୍ରାସ ନେଇ ଆଶା କରାଯାଉଛି। ମନ୍ତ୍ରଣାଳୟର ସୂଚନା ଅନୁଯାୟୀ, ୨୦୨୩ ଜୁନରେ ଖଣିଜ ତୈଳ, ଖାଦ୍ୟ ପାନୀୟ ସାମଗ୍ରୀ, ମୌଳିକ ଧାତୁ, ଅଶୋଧିତ ତୈଳ ଏବଂ ପ୍ରାକୃତିକ ଗ୍ୟାସ୍ ଆଦି ଦାମରେ ହ୍ରାସ ଦେଖାଦେଇଛି। ଏହା ବ୍ୟତୀତ ଟେକ୍ସଟାଇଲ ଦାମ୍ ମଧ୍ୟ ନିମ୍ନସ୍ତରକୁ ଖସି ଆସିଛି। ଏହା ପ୍ରଭାବ ଦରବୃଦ୍ଧି କମ୍ କରିପାରେ ବୋଲି ବଜାର ବିଶେଷଜ୍ଞମାନେ ଆକଳନ କରୁଛନ୍ତି। ସେହିଭଳି ଖାଦ୍ୟ ସାମଗ୍ରୀ ଦରବୃଦ୍ଧିରେ ମଧ୍ୟ ହ୍ରାସ ପରିଲକ୍ଷିତ ହୋଇଛି। ୨୦୨୩ ଜୁନ୍ରେ ଏହାର ପରିମାଣ ୧.୨୪% ରହିଥିଲା ବେଳେ ୨୦୨୩ ମେ’ରେ ୧.୫୯% ରହିଥିଲା। ଅପରପକ୍ଷରେ ବିଜୁଳି ଏବଂ ଶକ୍ତି କ୍ଷେତ୍ରରେ ମଧ୍ୟ ଦର ବୃଦ୍ଧି ହ୍ରାସ ହୋଇଛି। ଫଳରେ ୨୦୨୩ ଜୁନ୍ରେ ଏହାର ପରିମାଣ ହ୍ରାସ ଘଟି ୧୨.୬୩% ହୋଇଛି।