ଭଞ୍ଜନଗର,୭।୮(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର ଟାଟା ପାୱାର ଅଧୀନରେ କାର୍ଯ୍ୟରତ ଗାଲେରୀର ଜଣେ କର୍ମଚାରୀଙ୍କୁ ସୋମବାର ଅତି ନିର୍ମମ ଭାବେ କୁପାଟି ଗ୍ରାମରେ ହତ୍ୟା କରାଯାଇଛି। ମୃତ କର୍ମଚାରୀ ଜଣଙ୍କ ହେଲେ ଗାଲେରୀର ଲକ୍ଷ୍ମୀନାରାୟଣ ତ୍ରିପାଠୀ (୫୨)। ମିଟର ରିଡ଼ିଂ ଅଧିକ ହେବାରୁ ଉପଭୋକ୍ତା ଏବଂ କର୍ମଚାରୀଙ୍କ ମଧ୍ୟରେ ବଚସା ହୋଇଥିଲା। ଏହାପରେ ଉପଭୋକ୍ତା ଜଣଙ୍କ କର୍ମଚାରୀଙ୍କୁ ହତ୍ୟା କରିଥିଲେ।
ଘଟଣା ପରେ ଅଭିଯୁକ୍ତଙ୍କୁ ଗ୍ରାମବାସୀ କାବୁ କରିବା ପାଇଁ ଚେଷ୍ଟା କରିଥିଲେ। ହେଲେ ଅଭିଯୁକ୍ତ ଗ୍ରାମବାସୀଙ୍କୁ ଆକ୍ରମଣ କରିବାକୁ ଗୋଡ଼ାଇଥିଲେ। ଏଥିରେ ଗ୍ରାମର ରିଙ୍କୁ ନାଇକ ଆହତ ହୋଇ ଗାଲେରୀ ମେଡିକାଲରେ ଚିକିତ୍ସାଧୀନ ଅଛନ୍ତି।
ପରେ କୌଶଳ କ୍ରମେ ଗ୍ରାମବାସୀ ଅଭିଯୁକ୍ତଙ୍କୁ କାବୁ କରି ନିସ୍ତୁକ ମାଡ଼ମାରି ପୋଲିସ ଜିମା ଦେଇଥିଲେ। ଏହି ଘଟଣାକୁ ନେଇ ସମ୍ପୃକ୍ତ ଅଞ୍ଚଳରେ ଆତଙ୍କ ଖେଳିଯାଇଛି। ଘଟଣା ପରେ ଟାଟା ପାୱାର ଅଧିକାରୀ ପରିସ୍ଥିତି ପ୍ରତି ନଜର ରଖିବା ସହ କେଉଁଭଳି ପରିସ୍ଥିତିରେ ଏତେବଡ଼ ଘଟଣା ଘଟିଲା ସେନେଇ ତଦନ୍ତ ଆରମ୍ଭ କରିଛନ୍ତି।
ଗାଲେରୀ ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ଭଞ୍ଜନଗର ହସ୍ପିଟାଲ ପଠାଇବା ପଠାଇଛି। ଖବର ପାଇ ପୋଲିସ ବିଭାଗର ବରିଷ୍ଠ ଅଧିକାରୀ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି। ଘଟଣାରୁ ପ୍ରକାଶ ଯେ, ଲକ୍ଷ୍ମୀନାରାୟଣ ବହୁଦିନ ହେବ ମିଟର ରିଡ଼ିଂ କାମ କରୁଥିଲେ।
ସୂଚନା ଯୋଗ୍ୟ, ଲକ୍ଷ୍ମୀନାରାୟଣ ସ୍ତ୍ରୀଙ୍କ ସହ ଗ୍ରାମ ମନ୍ଦିରକୁ ଯାଇ ପୂଜାର୍ଚ୍ଚନା କରିଥିଲେ। ପରେ ସ୍ତ୍ରୀଙ୍କୁ ଘରେ ଛାଡ଼ି ମିଟର ରିଡିଂ ଆଣିବାକୁ କୁପାଟି ଗ୍ରାମକୁ ଯାଇଥିଲେ। ଏହି ସମୟରେ ଜଣେ ଉପଭୋକ୍ତଙ୍କ ମିଟର ରିଡ଼ିଙ୍ଗ ଲକ୍ଷ୍ମୀନାରାୟଣ ନେବାକୁ ଯାଇଥିବା ବେଳେ ଉପଭୋକ୍ତା ଜଣଙ୍କ ପଚାରିଥିଲେ ମୋର କାହିଁକି ଅଧିକ ବିଲ ଆସୁଛି। ଲକ୍ଷ୍ମୀନାରାୟଣ କୁଆଡେ କହିଥିଲେ ଏନେଇ ମୁଁ ଜାଣିନି। ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କୁ ପଚାର। ଏଥିରେ ଉପଭୋକ୍ତା ଜଣଙ୍କ ଉତ୍ତ୍ୟକ୍ତ ହୋଇ ଘରେ ଥିବା ଏକ ଟାଙ୍ଗିଆରେ ଲକ୍ଷ୍ମୀନାରାୟଣଙ୍କୁ ହାଣି ହତ୍ୟା କରିଥିଲେ।