ତୈଳ ରାଜନୀତି ଘେରରେ ଉପଭୋକ୍ତା, ୧୦ ଅଣ-ଭାଜପା ଶାସିତ ରାଜ୍ୟରେ କମୁନି ପେଟ୍ରୋଲ-ଡିଜେଲ ଦାମ୍‌…

ନୂଆଦିଲ୍ଲୀ,୯।୧୧: ଗତ ସପ୍ତାହରେ କେନ୍ଦ୍ର ସରକାର ପେଟ୍ରୋଲ ଏବଂ ଡିଜେଲ ଉପରେ ଏକ୍ସାଇଜ ଡୁ୍ୟୁଟି ଯଥାକ୍ରମେ ୫ ଏବଂ ୧୦ ଟଙ୍କା ହ୍ରାସ କରିବା ପରେ ଭାଜପା ଶାସିତ ସମସ୍ତ ରାଜ୍ୟ ମଧ୍ୟ ଇନ୍ଧନ ଉପରେ ଭାଲ୍ୟୁ ଆଡ ଟ୍ୟାକ୍ସ (ଭାଟ) ହ୍ରାସ କରିଛନ୍ତି। ଇନ୍ଧନ ଉପରେ ଭାଟ ହ୍ରାସ କରିବାକୁ ଓଡିଶା ଏବଂ ପଞ୍ଜାବ ମଧ୍ୟ ନିଷ୍ପତ୍ତି ନେଇଛନ୍ତି। ଏଭଳି କରି ପଞ୍ଜାବ ପେଟ୍ରୋଲ ଏବଂ ଡିଜେଲ ଦାମ ମୂଲ୍ୟ ହ୍ରାସ କରିବାରେ ଏକମାତ୍ର କଂଗ୍ରେସ ଶାସିତ ରାଜ୍ୟ ହୋଇପାରିଛି।
ତେବେ ଦେଶର ୧୦ ଅଣ-ଭାଜପା ଶାସିତ ରାଜ୍ୟରେ ପେଟ୍ରୋଲ-ଡିଜେଲ ଦାମ୍‌ ପୂର୍ବ ପରି ରହିଛି। ଏହାଦ୍ୱାରା ରାଜ ନୈତିକ ଦଳର ତୈଳ ରାଜନୀତି ଘେରରେ ଉପଭୋକ୍ତାମାନେ ହନ୍ତସନ୍ତ ହେବାରେ ଲାଗିଛନ୍ତି। କଂଗ୍ରେସ ଶାସିତ ଅନ୍ୟ ରାଜ୍ୟଗୁଡିକରେ ଭାଟ ହ୍ରାସ କରିବାର ଆବଶ୍ୟକତା ବିଷୟରେ ପଚରାଯିବାରୁ ଦଳର ମୁଖପାତ୍ର ପୱନ ଖେରା କହିଛନ୍ତି ଯେ ଏହା ଉପରେ ବିଚାର କରାଯାଉଛି। ଏହା ସହିତ ଦେ କହିଛନ୍ତି ଯେ, ଭାଜପା ଗତ ଦୁଇ ବର୍ଷ ହେଲା କହୁଛି ଯେ ପେଟ୍ରୋଲ ଏବଂ ଡିଜେଲର ମୂଲ୍ୟ ସହିତ ସରକାରଙ୍କର କୌଣସି ସମ୍ପର୍କ ନାହିଁ। କିନ୍ତୁ ଉପ-ନିର୍ବାଚନରେ ଭାଜପା ହାରିଯିବା ପରେ, ହଠାତ୍‌ ସରକାର ପେଟ୍ରୋଲ ଏବଂ ଡିଜେଲ ଉପରେ ଏକ୍ସାଇଜ ଡ୍ୟୁଟି ହ୍ରାସ କରିଛନ୍ତି। ଏଭଳି କରି ଭାଜପା କେବଳ ଜନସାଧାରଣଙ୍କୁ ଭୂଆଁ ବୁଲାଇବାର ଉଦ୍ୟମ କରୁଥିବା ସେ କହିଛନ୍ତି।

ଅପରପକ୍ଷରେ ଭାଜପା ମୁଖପାତ୍ର ଗୋପାଳ କୃଷ୍ଣ ଅଗ୍ରୱାଲ ଦଳର ଆଭିମୁଖ୍ୟକୁ ଦୋହରାଇ କହିଛନ୍ତି ଯେ ଭାଜପା ଶାସିତ ରାଜ୍ୟ ଭଳି କଂଗ୍ରେସ ଶାସିତ ରାଜ୍ୟ ଏଭଳି କରିବା ଆବଶ୍ୟକ। କଂଗ୍ରେସ ଶାସିତ ରାଜସ୍ଥାନ ଏବଂ ଛତିଶଗଡରେ ପେଟ୍ରୋଲ-ଡିଜେଲ ଉପରେ ଭାଟ ହ୍ରାସ କରିବାକୁ ପରାମର୍ଶ ଦିଆଯାଇଛି।

ଆନ୍ଧ୍ରପ୍ରଦେଶର ମୁଖ୍ୟମନ୍ତ୍ରୀ ଓ୍ବାଇଏସ୍‌ ଜଗନ ମୋହନ ରେଡ୍ଡୀଙ୍କ ସରକାର ପେଟ୍ରୋଲ ଏବଂ ଡିଜେଲ ଉପରେ ଭାଟ କାଟିବାକୁ ମନା କରିଦେଇଛନ୍ତି। ଖବରକାଗଜରେ ବିଜ୍ଞାପନ ପ୍ରକାଶ କରି ଏହି ପ୍ରସଙ୍ଗରେ ନିଜର ଆଭିମୁଖ୍ୟ ସ୍ପଷ୍ଟ କରିଛନ୍ତି। ରାଜ୍ୟ ସରକାର କହିଛନ୍ତି ଯେ କେନ୍ଦ୍ରୀୟ ଏକ୍ସାଇଜ ଡ୍ୟୁଟି ଭାବେ ୩.୩୫ ଲକ୍ଷ କୋଟି ଟଙ୍କା ଜମା କରିବା ସତ୍ତ୍ୱେ କେନ୍ଦ୍ର ଏହାକୁ ଯଥେଷ୍ଟ ଅର୍ଥ ଭରଣା କରିବାକୁ ଦେଇନାହିଁ। ରାଜ୍ୟରେ ପେଟ୍ରୋଲର ମୂଲ୍ୟ ୧୦୮.୨୦ ଟଙ୍କା ରହିଛି॥

କଂଗ୍ରେସ ଶାସିତ ରାଜ୍ୟ ଛତିଶଗଡ ଏପର୍ଯ୍ୟନ୍ତ କୌଣସି ନିଷ୍ପତ୍ତି ଘୋଷଣା କରିନାହିଁ। ତଥାପି କଂଗ୍ରେସ ଶାସିତ ପଞ୍ଜାବ ପରେ ପେଟ୍ରୋଲ ଏବଂ ଡିଜେଲ ଉପରେ ଭାଟ କାଟିବାକୁ ବିଚାର କରାଯାଉଛି ବୋଲି ରାଜ୍ୟ ସରକାର କହିଛନ୍ତି।

ଆମ ଆଦମୀ ପାର୍ଟି (ଏଏପି) ଦିଲ୍ଲୀ ସରକାର ତୈଳ ଉପରେ ଭାଟ ହ୍ରାସ ଘୋଷଣା କରିନାହାଁନ୍ତି। ଦିଲ୍ଲୀର ବିରୋଧୀ ଦଳ ଭାଜପା ଏବଂ କଂଗ୍ରେସ ତୁରନ୍ତ ଟିକସ ହ୍ରାସ କରିବାକୁ ଦାବି କରିଛନ୍ତି। ଦିଲ୍ଲୀରେ ପେଟ୍ରୋଲ ଏବଂ ଡିଜେଲର ମୂଲ୍ୟ ଯଥାକ୍ରମେ ୧୦୩.୯୭ ଏବଂ ୮୬.୬୭ ଟଙ୍କା ରହିଛି।

ଅଣ-ଭାଜପା ଶାସିତ ଝାଡଖଣ୍ଡ ମଧ୍ୟ ତୈଳ ଟିକସ ହ୍ରାସ ସମ୍ପର୍କରେ ଘୋଷଣା କରି ନାହିଁ। ବିରୋଧୀ ଭାଜପା ଏବଂ ପେଟ୍ରୋଲିୟମ ଡିଲର ଆସୋସିଏଶନ ହେମନ୍ତ ସୋରେନ ସରକାରଙ୍କ ଉପରେ ଭାଟ ହ୍ରାସ କରିବାକୁ ଦାବି କରିଛନ୍ତି।
କେରଳର କମ୍ୟୁନିଷ୍ଟ ପାର୍ଟି ଅଫ ଇଣ୍ଡିଆ-ମାର୍କ୍ସବାଦୀ (ସିପିଆଇ-ଏମ) ସରକାର ସ୍ପଷ୍ଟ କରିଛନ୍ତି ଯେ ଭାଟ ହ୍ରାସ କରିବାର କୌଣସି ଯୋଜନା ନାହିଁ। ଅର୍ଥମନ୍ତ୍ରୀ କେ.ଏନ ବାଲାଗୋପାଲ ଯୁକ୍ତି କରିଛନ୍ତି ଯେ କେନ୍ଦ୍ର ତୈଳ ଟିକସକୁ ସାମାନ୍ୟ ହ୍ରାସ କରିଛି। ତୈଳ ମୂଲ୍ୟ ବୃଦ୍ଧି ବିରୋଧରେ ଦେଶବ୍ୟାପୀ ବିରୋଧ ପ୍ରଦର୍ଶନ କରି ବାଲାଗୋପାଲ ଏକ୍ସାଇଜ ଡ୍ୟୁଟିରେ ହ୍ରାସ କେନ୍ଦ୍ରର ଏକ ଅସ୍ଥାୟୀ ଏବଂ ଭାବମୂର୍ତ୍ତିି ବଞ୍ଚାଇବା ପଦକ୍ଷେପ ବୋଲି କହିଛନ୍ତି।

ମହାରାଷ୍ଟ୍ରର ଶିବସେନା ନେତୃତ୍ୱାଧୀନ ମହା ବିକାଶ ଆଘାଡି (ଏମଭିଏ) ସରକାର ପେଟ୍ରୋଲ ଏବଂ ଡିଜେଲ ଉପରେ ଭାଟ ହ୍ରାସ କରିବେ ନାହିଁ ବୋଲି ଘୋଷଣା କରିଛନ୍ତି। ସରକାର କହିଛନ୍ତି ଯେ, କେନ୍ଦ୍ରୀୟ ଏକ୍ସାଇଜ ଡ୍ୟୁଟି ହ୍ରାସ ହେଲେ ନଭେମ୍ବର ୨୦୨୧ରୁ ମାର୍ଚ୍ଚ ୨୦୨୨ପର୍ଯ୍ୟନ୍ତ ୧,୭୦୦ କୋଟି କ୍ଷତି ହେବ। ୬.୧୫ ଲକ୍ଷ କୋଟି ଟଙ୍କାରୁ ଅଧିକ ଋଣ ନେଇଥିବା ରାଜ୍ୟ ସରକାର ରାଜସ୍ବ କ୍ଷତି ପ୍ରଭାବକୁ ସମ୍ଭାଳିବା ପାଇଁ ସକ୍ଷମ ନୁହନ୍ତି।

କଂଗ୍ରେସ ଶାସିତ ରାଜ୍ୟ ରାଜସ୍ଥାନରେ ସରକାର ତୈଳ ଉପରେ ଭାଟ ହ୍ରାସ କରିବାକୁ ବିଭିନ୍ନ ବିଭାଗର ଚାପର ସମ୍ମୁଖୀନ ହେଉଛନ୍ତି। କେନ୍ଦ୍ରର କଟ ସତ୍ତ୍ୱେ ରାଜସ୍ଥାନରେ ପେଟ୍ରୋଲ ଏବଂ ଡିଜେଲ ସର୍ବାଧିକ ରହିଛି। ଜୟପୁରରେ ପେଟ୍ରୋଲ ମୂଲ୍ୟ ୧୧୧.୦୬ ଟଙ୍କା ଏବଂ ଡିଜେଲ ମୂଲ୍ୟ ୯୫.୭୧ ଟଙ୍କା ଅଛି।

ତାମିଲନାଡୁର ଦ୍ରାବିଡା ମୁନ୍ନେଟ୍ରା କାଜଗାମ (ଡିଏମକେ)ର ମୁଖ୍ୟମନ୍ତ୍ରୀ ଏମ.କେ ଷ୍ଟାଲିନଙ୍କ ସରକାର ପେଟ୍ରୋଲ ଏବଂ ଡିଜେଲ ଉପରେ ଭାଟ ହ୍ରାସ ଘୋଷଣା କରିନାହାଁନ୍ତି।

ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ତୃଣମୂଳ କଂଗ୍ରେସ (ଟିଏମସି) ସରକାର ଏକ୍ସାଇଜ ଡ୍ୟୁଟି ହ୍ରାସ କରିବାକୁ କେନ୍ଦ୍ରର ନିଷ୍ପତ୍ତିକୁ କେବଳ ଏକ ଲୋକ ଦେଖାଣିଆ ଯୋଜନା ବୋଲି କହିଛି। ଟିଏମସି ସାଧାରଣ ସମ୍ପାଦକ ତଥା ମୁଖପାତ୍ର କୁନାଲ ଘୋଷ କହିଛନ୍ତି ଯେ ଭାଜପା ଶାସିତ ରାଜ୍ୟ ସରକାର ସେମାନଙ୍କ ଟିକସ କାରଣରୁ କେନ୍ଦ୍ରରୁ ସେମାନଙ୍କ ଦେୟ ପାଉଛନ୍ତି, କିନ୍ତୁ ପଶ୍ଚିମବଙ୍ଗ ସେଥିରୁ ବଞ୍ଚିତ ରହିଛି।