ଚୌଦ୍ୱାର,୧।୩(ଡି.ଏନ.ଏ.): ଟକ ସହର ସମେତ ଏହାର ଉପକଣ୍ଠରେ ଗତ କିଛି ମାସ ମଧ୍ୟରେ ଚଢାଉ କରାଯାଇ ଅନେକ ନକଲି ଓ ଅପମିଶ୍ରିତ କାରଖାନା ଠାବ କରାଯାଇଛି। ସେଠାରୁ ଘିଅ, ତେଲ, ମସଲାଗୁଣ୍ଡ, ଚା, ନକଲି ଜର୍ଦ୍ଦା, ହଳଦୀଗୁଣ୍ଡ ଜବତ କରାଯାଇଛି। ଏହି ସାମଗ୍ରୀ ରାଜ୍ୟର ବିଭିନ୍ନ ସ୍ଥାନକୁ ବିକ୍ରି ପାଇଁ ପଠାଯାଉଛି। ପରବର୍ତ୍ତୀ ସମୟରେ ଏହା ଅପମିଶ୍ରିତ ବୋଲି ଜଣାପଡିବା ପରେ ଜନଅସନ୍ତୋଷ ଦେଖାଦେଉଛି। ଏହାକୁ ଦୃଷ୍ଟିରେ ରଖି ପୋଲିସ ପକ୍ଷରୁ କାରଖାନାରେ ଚଢାଉ କରାଯାଇ ବିପୁଳ ପରିମାଣର ଅପମିଶ୍ରିତ ସାମଗ୍ରୀ ଜବତ କରାଯାଉଛି। ଏହାକୁ ପରୀକ୍ଷା ପାଇଁ ପଠାଯାଉଛି। ପରବର୍ତ୍ତୀ ସମୟରେ ଏହା ଖାଦ୍ୟ ଅନୁପଯୋଗୀ ବୋଲି ଜଣାପଡିବାରୁ ତାହାକୁ ନଷ୍ଟ କରି ପୋତି ଦିଆଯାଉଛି। ଏହି କ୍ରମରେ ଚୌଦ୍ୱାର ପୌରପାଳିକା ୯ନଂ. ୱାର୍ଡ ବାଳିକା ଉଚ୍ଚବିଦ୍ୟାଳୟ ନିକଟ ଏକ କାରଖାନାରୁ ଜବତ ହୋଇଥିବା ଅପମିଶ୍ରିତ ଘିଅ ଓ ସସ୍କୁ ରବିବାର ପୋଲିସ ନଷ୍ଟ କରିଛି। ନଷ୍ଟ ସାମଗ୍ରୀ ମଧ୍ୟରେ ରହିଛି ୪୦ ପେଟି ଟମାଟୋ ଓ ଚିଲି ସସ୍ ଏବଂ ଭିନେଗାର, ୨୦ ପେଟି ଅପମିଶ୍ରିତ ଘିଅଡବା ଓ ୧୦ ଟିଣ ଅପମିଶ୍ରିତ ଘିଅ। କୋର୍ଟଙ୍କ ନିର୍ଦ୍ଦେଶକ୍ରମେ ଏହି ସବୁ ଅପମିଶ୍ରିତ ଘିଅ, ସସ୍ ବୋତଲ ଓ ସାମଗ୍ରୀ ପ୍ରସ୍ତୁତ ପାଇଁ ରହିଥିବା କଞ୍ଚାମାଲଗୁଡିକୁ ଚୌଦ୍ୱାରସ୍ଥିତ ବଧୀ ପଡିଆ ନିକଟରେ ଗାତ ଖୋଳି ପୋତି ଦିଆଯାଇଛି। ଏହି ସମୟରେ ଜୋନ୍-୧ ଏସିପି ଅମରେନ୍ଦ୍ର ପଣ୍ଡା, ଚୌଦ୍ୱାର ଥାନା ଆଇଆଇସି ବିରଞ୍ଚି ନାରାୟଣ ପତି, ଏସ୍ଆଇ ବୃନ୍ଦାବନ ସାହୁଙ୍କ ସହ ଥାନା କର୍ମଚାରୀ ଉପସ୍ଥିତ ଥିଲେ। ନଷ୍ଟ ସାମଗ୍ରୀର ମୂଲ୍ୟ ଲକ୍ଷାଧିକ ଟଙ୍କା ହେବ ବୋଲି ଚୌଦ୍ୱାର ଥାନା ଆଇଆଇସି ପତି କହିଛନ୍ତି।
ଗତ ସେପ୍ଟେମ୍ବର ୧୪ ତାରିଖରେ ଉକ୍ତ କାରଖାନାରେ କଟକ କମିଶନରେଟ ପୋଲିସ ଓ ଚୌଦ୍ୱାର ପୋଲିସ ମିଳିତ ଭାବେ ଚଢାଉ କରି ବିପୁଳ ପରିମାଣର ଅପମିଶ୍ରିତ ଘିଅ ଓ ସସ୍ ଜବତ କରିଥିଲା। ଏହି ଘଟଣାରେ କାରଖାନା ମାଲିକଙ୍କୁ ଗିରଫ କରି କୋର୍ଟ ଚାଲାଣ କରିଥିଲା। କାରଖାନାକୁ ସିଲ୍ କରିବା ସହ ଜବତ ସାମଗ୍ରୀର ନମୁନା ପରୀକ୍ଷା ପାଇଁ ପଠାଇଥିଲା। ପରେ ଏହି ସାମଗ୍ରୀ ଖାଦ୍ୟ ଉପଯୋଗୀ ନୁହେଁ ବୋଲି ଜଣାପଡିବାରୁ ତାହାକୁ ପୋତାଗଲା ବୋଲିି ଏସିପି ପଣ୍ଡା କହିଛନ୍ତି।