ପଟ୍ଟାମୁଣ୍ଡାଇ,୨୩ା୬(କଳ୍ପତରୁ ନାୟକ): ଗ୍ରାମାଞ୍ଚଳର ଲୋକମାନଙ୍କୁ ବିଶୁଦ୍ଧ ପାନୀୟ ଜଳ ଯୋଗାଣ ପାଇଁ ରାଜ୍ୟ ଓ କେନ୍ଦ୍ର ସରକାର ବିଭିନ୍ନ ଯୋଜନା ପ୍ରଣୟନ କରିଛନ୍ତି ା ଏଥିପାଇଁ ଅନେକ କୋଟି ଟଙ୍କା ବ୍ୟୟ କରାଯାଇ ପାନୀୟ ଜଳ ପ୍ରକଳ୍ପ ନିର୍ମାଣ କରାଯାଉଛି। ହେଲେ ଅଧିକାଂଶ ସ୍ଥାନରେ ଯୋଜନା ନାମରେ ଅର୍ଥ ବାଟମାରଣା କରାଯାଉଥିବାରୁ ଏହି ଯୋଜନାରେ ବିଶୁଦ୍ଧ ପାନୀୟ ଜଳ ଯୋଗାଇବାରେ ସଫଳ ରୂପାୟନ ହୋଇପାରୁ ନାହିଁ । ଏହାର ଉଦାହରଣ ଦେଖିବାକୁ ମିଳିଛି କେନ୍ଦ୍ରାପଡ଼ା ଜିଲା ପଟ୍ଟାମୁଣ୍ଡାଇ ବ୍ଲକ ନରସିଂହପୁର ପଞ୍ଚାୟତ ଅଢାଖଣ୍ଡ ଗ୍ରାମରେ ା ଉକ୍ତ ଅଞ୍ଚଳରେ ଥିବା ପାନୀୟ ଜଳ ପ୍ରକଳ୍ପରୁ ଦୂଷିତ ଗୋଳିଆ ପାଣି ଆସୁଥିବାରୁ ତାହା ପାନୀୟ ଉପଯୋଗୀ ହେଉନାହିଁ । ସ୍ଥାନୀୟ ଜନସାଧାରଣ ବାରମ୍ବାର ଅଭିଯୋଗ କରୁଥିଲେ ମଧ୍ୟ ଏହାର ସୁଫଳ ମିଳୁନାହିଁ । ତୁରନ୍ତ ଏ ସଂକ୍ରାନ୍ତରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସାଧାରଣରେ ଦାବି ହୋଇଛି ।
ସୂଚନା ଅନୁଯାୟୀ, ୨୦୦୮-୦୯ ଆର୍ଥିକ ବର୍ଷରେ ନରସିଂହପୁର ପଞ୍ଚାୟତ ଅଠରବାଟିଆ ଗ୍ରାମରେ ଏକ ପାନୀୟ ଜଳ ନିର୍ମାଣ କରାଯାଇ ଅଠରବାଟିଆ, ଅଇନିପଡା ଓ ଅଢାଖଣ୍ଡ ଗ୍ରାମକୁ ପାଇପ୍ ଯୋଗେ ପାନୀୟଜଳ ଯୋଗାଣ କରାଯାଉଥିଲା । ମାତ୍ର ୧ ବର୍ଷ ପୂର୍ବେ ପଟ୍ଟାମୁଣ୍ଡାଇ ଗ୍ରାମ୍ୟ ଜଳଯୋଗାଣ ଓ ପରିମଳ ବିଭାଗ ପକ୍ଷରୁ ଅଢାଖଣ୍ଡ ଗ୍ରାମରେ ଏକ ନୂତନ ପ୍ରକଳ୍ପ ନିର୍ମାଣ କରାଯାଇଥିଲା ା ସେଥିରେ ପୁରୁଣା ପିଭିସି ପାଇପ୍ ବ୍ୟବହାର କରାଯାଇ ଗ୍ରାମବାସୀଙ୍କୁ ପାନୀୟ ଜଳ ଯୋଗାଣ କରାଗଲା । ମାତ୍ର ଉକ୍ତ ପାଇପ ବହୁଦିନର ହୋଇଥିବାରୁ ବିଭିନ୍ନ ସ୍ଥାନରେ ଫାଟି ଯାଇଛି । ଫଳରେ ନର୍ଦ୍ଦମା ଓ ଗୋଳିଆ ପାଣି ପାଇପ୍ରେ ପ୍ରବେଶ କରି ଏ ସମସ୍ୟା ସୃଷ୍ଟି କରୁଛି ା ଅଧିକାଂଶ ସମୟରେ ଗୋଳିଆ ଓ ପଚା ପାଣି ଆସୁଛି ା ସେହିପାଣିରେ ପୋକ ବି ବାହାରୁଥିବା ଗ୍ରାମବାସୀ ଅଭିଯୋଗ କରିଛନ୍ତି ା ପ୍ରାୟ ୫ ଶହ ପରିବାର ଉକ୍ତ ପ୍ରଳଳ୍ପରୁ ପାଣି ବ୍ୟବହାର କରୁଛନ୍ତି ା ସେମାନେ ବାରମ୍ବାର ଜଳଯୋଗାଣ ଓ ପରିମଳ ବିଭାଗ ଅଧିକାରୀଙ୍କ ନିକଟରେ ଅଭିଯୋଗ କରିଆସୁଥିଲେ ସୁଦ୍ଧା ସମସ୍ୟାର ସମାଧାନ ହୋଇପାରୁନାହିଁ। ଗ୍ରାମରେ ୬ଟି ନଳକୂପ ଥିବାବେଳେ କେଉଁ ନଳକୂପରୁ ପାଣି ବାହାରୁଛି ତ ଆଉ କେଉଁ ନଳକୂପରୁ ପାଣି ବାହାରୁ ନାହିଁ ା ଫଳରେ ଅନ୍ୟ କୌଣସି ଉପାୟ ନ ପାଇ ଗ୍ରାମବାସୀ ସେହି ପାଣିକୁ ଛାଣି ଫୁଟାଇ ବ୍ୟବହାର କରି ନିଜର ଶୋଷ ମେଣ୍ଟାଉଛନ୍ତି ା ଉକ୍ତ ପ୍ରକଳ୍ପକୁ ତୁରନ୍ତ ମରାମତି କରିବା ସହିତ ନୂଆ ପାଇପ୍ ଲାଇନ ପକାଇ କାର୍ଯ୍ୟକ୍ଷମ କରିବାକୁ ଗ୍ରାମବାସୀ ରାଜେନ୍ଦ୍ର ନାରାୟଣ ଦାଶ, ରାହାସ ବିହାରୀ ଦାଶ, ଭଗବାନ ଗିରି, କାଙ୍ଗାଳି ମଲିକ, ଦିବାକର ମଲିକ, କୁଳମଣି ପରିଡା, ଯୁବତୀ ମଲିକ, ଅହଲ୍ୟା ପାଢୀ, ନିର୍ଝରିଣୀ ପଣ୍ଡା ପ୍ରମୁଖ ଦାବି କରିଛନ୍ତି ା ଏ ସମ୍ପର୍କରେ ବିଭାଗୀୟ ଯନ୍ତ୍ରୀ ବିଶ୍ୱଜିତ ମିଶ୍ରଙ୍କୁ ପଚାରିବାରୁ ଗତ ୩ ଦିନ ପୂର୍ବେ ଗୋଳିଆ ପାଣି ଆସୁଥିଲା ା ମରାମତି କରାଯାଇଛି । ଅନ୍ୟ ସ୍ଥାନରେ ଆବଶ୍ୟକ ପଦକ୍ଷେପ ଗ୍ରହଣ କରାଯିବ ବୋଲି ସେ ପ୍ରକାଶ କରିଛନ୍ତି ା