ନବରଙ୍ଗପୁର,୩।୭: ନବରଙ୍ଗପୁର ଜିଲା ଡାବୁଗାଁ ବ୍ଲକ ଶିକ୍ଷା ବିଭାଗର ଅଜବ ନୀତି। ମୃତ ଶିକ୍ଷକଙ୍କୁ ମିଳିଛି କୋଭିଡ୍ କଣ୍ଟ୍ରୋଲ ରୁମ୍ ଡ୍ୟୁଟି। କଥାଟି ଶୁଣିବାକୁ ଅଡ଼ୁଆ ଲାଗୁଥିଲେ ବି ଜଣେ ମୃତ ଶିକ୍ଷକଙ୍କୁ କୋଭିଡ କାର୍ଯ୍ୟ ପାଇଁ ଚିଠି ଜାରି ହୋଇଛି। ଚିଠି ଅନୁଯାୟୀ, ଚଳିତ ମାସ ୨୮ ତାରିଖ ସା ୬ରୁ ରାତି ୧୦ ପର୍ଯ୍ୟନ୍ତ ମୃତ ଶିକ୍ଷକ କୋଭିଡ୍ କଣ୍ଟ୍ରୋଲ ଗୃହରେ କାର୍ଯ୍ୟ କରିବେ। ଏପରି ଏକ ଘଟଣା ନବରଙ୍ଗପୁର ଜିଲା ଡାବୁଗାଁ ବ୍ଲକରେ ଘଟିଛି।
ସୂଚନା ଅନୁଯାୟୀ, ଡାବୁଗାଁ ବ୍ଲକ କାର୍ଯ୍ୟାଳୟ ପରିସରରେ କୋଭିଡ୍ ସଂକ୍ରାନ୍ତ ଅଭିଯୋଗ ଗ୍ରହଣ କରିବା ନିମନ୍ତେ ଏକ କଣ୍ଟ୍ରୋଲ ରୁମ୍ ରହିଛି। ବ୍ଲକର ଶିକ୍ଷକମାନଙ୍କୁ ୪ ପର୍ଯ୍ୟାୟ ଯଥାକ୍ରମେ ସକାଳ ୭ରୁ ୧, ୧ରୁ ସା ୬, ସା ୬ରୁ ରାତି ୧୦ ଓ ରାତି ୧୦ରୁ ସକାଳ ୭ଟା ପର୍ଯ୍ୟନ୍ତ ଡ୍ୟୁଟି କରିବାକୁ ଚିଠି ଜାରି କରାଯାଇଛି। ଶିକ୍ଷକମାନେ କଣ୍ଟ୍ରୋଲ ରୁମ୍ରେ ରହି କୋଭିଡ୍ ଆକ୍ରାନ୍ତ ପରିବାରର ଫୋନ୍ କଲ୍ ଗ୍ରହଣ କରିବେ। ଏପରି କି ଅଭିଯୋଗ ଶୁଣିବା ସହ ଅନ୍ୟ କାର୍ଯ୍ୟ କରିବେ। ଚଳିତ ଜୁଲାଇ ମାସ ପାଇଁ ଡାବୁଗାଁ ବ୍ଲକ ଶିକ୍ଷା ବିଭାଗ ପକ୍ଷରୁ ଶିକ୍ଷକଙ୍କ ନାମ ଘୋଷଣା କରାଯାଇଛି। ଚିଠି ନଂ. ୧୮୬୩/୨୧ରେ ଶିକ୍ଷକମାନଙ୍କ ନାମ ଉଲ୍ଲେଖ ରହିଛି। ତେବେ ବ୍ଲକର ଜଣେ ମୃତ ଶିକ୍ଷକ ମେଦିନିକାନ୍ତ ମେହେରଙ୍କ ନାମ ମଧ୍ୟ ଏଥିରେ ରହିଛି। ଚିଠି ଅନୁଯାୟୀ, ଜୁଲାଇ ୨୮ ତାରିଖ ସା ୬ରୁ ରାତି୧୦ ପର୍ଯ୍ୟନ୍ତ ସେ କୋଭିଡ୍ କଣ୍ଟ୍ରୋଲ୍ ରୁମ୍ରେ କାର୍ଯ୍ୟ କରିବେ।
ଉଲ୍ଲେଖ ଯୋଗ୍ୟ, ମୃତ ଶିକ୍ଷକଙ୍କୁ ପୂର୍ବରୁ ମଧ୍ୟ କୋଭିଡ୍ କଣ୍ଟ୍ରୋଲ ରୁମ୍ରେ କାର୍ଯ୍ୟ କରିବା ନେଇ ଚିଠି ହୋଇଥିଲା। ଏହା ଜଣାପଡ଼ିବା ପରେ ତରବରିଆ ଭାବେ ମୃତ ଶିକ୍ଷକଙ୍କ ନାମ ଲିଷ୍ଟରୁ କଟାଯାଇଥିଲା। ଏ ନେଇ ଡାବୁଗାଁ ବିଇଓ ପ୍ରଶାନ୍ତ କୁମାର ହୋତାଙ୍କୁ ପଚାରିବାରୁ ତାଲିକାରୁ ନଁା ହଟାଇ ଦିଆଯାଇଛି। ଅନ୍ୟ ଶିକ୍ଷକଙ୍କୁ ଉକ୍ତ ଦାୟିତ୍ୱ ଦିଆଯାଇଛି ବୋଲି ସେ କହିଛନ୍ତି।