ଇକ୍ୱେଡର ଏହାର ଚତୁର୍ଥ ଫିଫା ଫୁଟ୍ବଲ ବିଶ୍ୱକପ୍ ଖେଳିବାକୁ ଯାଉଛି। ସୋମବାର ସନ୍ଧ୍ୟା ଦଳ ଘୋଷଣା କରିବାର ଶେଷ ସମୟ ରହିଥିଲା। ବିବାଦକୁ ଏଡାଇବାକୁ ଯାଇ କୋଚ୍ ଗୁସ୍ତାଭୋ ଅଲ୍ଫାରୋ ଡିଫେଣ୍ଡର ବାଇରନ କାଷ୍ଟଲୋଙ୍କୁ ତାଙ୍କ ଦଳରୁ ବାଦ୍ ଦେଇଛନ୍ତି। ମାର୍ଚ୍ଚରେ ବିଶ୍ୱକପ୍ ପାଇଁ ଯୋଗ୍ୟତା ହାସଲ କରିବାପରଠାରୁ ଇକ୍ୱେଡର ଫୁଟ୍ବଲ କର୍ତ୍ତୃପକ୍ଷ ଆଇନଗତ ସମସ୍ୟାରେ ଛନ୍ଦି ହୋଇପଡ଼ିଛନ୍ତି। ଚିଲି ଓ ପେରୁ ଫୁଟ୍ବଲ କର୍ତ୍ତୃପକ୍ଷଙ୍କ ନିକଟରେ ଯୁକ୍ତି କରିଥିଲେ କାଷ୍ଟିଲୋ ପ୍ରକୃତରେ ଜଣେ କଲମ୍ବିଆନ। ତେଣୁ ସେ ବେଆଇନ ଭାବେ ବହୁ ବିଶ୍ୱକପ୍ କ୍ୱାଲିଫାୟର ଖେଳିଛନ୍ତି। ତାଙ୍କର ଏହି ଦାବି ପ୍ରତ୍ୟାଖ୍ୟାତ ହୋଇଥିଲା। ଇକ୍ୱେଡରକୁ ବିଶ୍ୱକପ୍ ଗ୍ରୁପ୍-ଏ’ରେ ଖେଳିବା ଲାଗି ଅନୁମତି ମିଳିଥିଲା। ଏହି ଗ୍ରୁପ୍ରେ ଅନ୍ୟ ଦଳ କାତାର, ସେେନେଗାଲ ଓ ନେଦରଲାଣ୍ଡ୍ସ ରହିଛନ୍ତି। ଇକ୍ୱେଡର ଓ କାତାର ରବିବାର ଟୁର୍ନାମେଣ୍ଟ ଓପନ୍ କରିବେ। କ୍ରୀଡ଼ାର ସର୍ବୋଚ୍ଚ ନ୍ୟାୟାଳୟ କୋର୍ଟ ଅଫ୍ ଆର୍ବିଟ୍ରେଶନ ଫର୍ ସ୍ପୋଟର୍ସ (କାସ୍) କିନ୍ତୁ ଗତ ସପ୍ତାହରେ ଏହାର ରୁଲିଂରେ ୨୦୨୬ ବିଶ୍ୱକପ୍ ପାଇଁ ଦକ୍ଷିଣ ଆମେରିକୀୟ କ୍ୱାଲିଫାୟର୍ସ ଆରମ୍ଭ ହେବା ପୂର୍ବରୁ ଇକ୍ୱେଡର ୩ ପଏଣ୍ଟ ହରାଇବ ବୋଲି କହିଛନ୍ତି। ପାସପୋର୍ଟ ହାସଲ ବେଳେ କାଷ୍ଟିଲୋ ତାଙ୍କ ଜନ୍ମଦିବସ ଓ ଜନ୍ମସ୍ଥାନ ସମ୍ପର୍କରେ ଭୁଲ ତଥ୍ୟ ଦେଇଥିବା କୋର୍ଟ କହିଛନ୍ତି। ଅଲଫାରୋ ବର୍ତ୍ତମାନ କାଷ୍ଟିଲୋଙ୍କ ସ୍ଥାନରେ ଇକ୍ୱେଡର ଦ୍ୱିତୀୟ ଡିଭିଜନ ଖେଳୁଥିବା ଷ୍ଟ୍ରାଇକର କେଭିନ ରୋଡ୍ରିଗୁଏଜ୍ଙ୍କୁ ଦଳରେ ନେଇଛନ୍ତି।
