ମୁମ୍ବାଇ,୨୯।୧: ନିଜ ମନ୍ତବ୍ୟ ପାଇଁ ଚର୍ଚ୍ଚାରେ ରହି ଆସୁଥିବା ତେଲେଙ୍ଗାନା ଭାଜପା ବିଧାୟକ ଟି ରାଜା ସିଂ ପୁଣି ଥରେ ବିବାଦୀୟ ବିବୃତ୍ତି ଦେଇଛନ୍ତି। ରବିବାର ସେ କହିଛନ୍ତି, ବର୍ତ୍ତମାନ ଘଣ୍ଟା ବଜାଇବା ହିନ୍ଦୁ ନୁହେଁ, ଗଳା କାଟୁଥିବା ହିନ୍ଦୁ ହେବା ଆବଶ୍ୟକ। ମୁମ୍ବାଇରେ ହିନ୍ଦୁ ଆକ୍ରୋଶ ମୋର୍ଚ୍ଚାର ଏକ କାର୍ଯ୍ୟକ୍ରମରେ ଟି ରାଜା ସିଂ ଏହି ମନ୍ତବ୍ୟ ଦେଇଛନ୍ତି।
ହାଇଦ୍ରାବାଦର ଗୋଶାମହାଲ ଆସନରୁ ଭାଜପା ବିଧାୟକ ଥିବା ଟି ରାଜା ସିଂ କହିଛନ୍ତି, ଜୋମାଟୋ, ରାପିଡୋ ଟ୍ୟାକ୍ସି, ଓଲା, ଉବରରୁ ହିନ୍ଦୁ ଝିଅଙ୍କ ନାମ ଓ ନମ୍ବର ନିଆଯାଉଛି ଏବଂ ଲଭ୍ ଜିହାଦ କରାଯାଉଛି। ମୁସଲମାନ ଦୋକାନରୁ ସାମଗ୍ରୀ କିଣିବା ଠାରୁ ଦୂରେଇ ରୁହନ୍ତୁ। ମୁଁ ମୋଦି ଜୀଙ୍କୁ ଅନୁରୋଧ କରୁଛି ଯେ, ‘ହମ ଦୋ, ହମାରେ ଦୋ’ ଆମ ପାଇଁ ଗ୍ରହଣୀୟ, କିନ୍ତୁ ଏହା ମୁସଲମାନମାନଙ୍କ ପାଇଁ ମଧ୍ୟ ଲାଗୁ ହେବା ଆବଶ୍ୟକ।
ଭାଜପା ବିଧାୟକ ଆହୁରି କହିଛନ୍ତି, ହିନ୍ଦୁମାନଙ୍କୁ ମୋର ଅନୁରୋଧ, ୧ ଟଙ୍କାର ହେଉ କି ଏକ ଲକ୍ଷ ଟଙ୍କା ସାମଗ୍ରୀ ହେଉ କେବଳ ହିନ୍ଦୁ ଦୋକାନରୁ କିଣନ୍ତୁ। ଲଭ୍ ଜିହାଦ ବିରୋଧରେ ଆଇନ ଆଣିବାକୁ ମୁଁ ରାଜ୍ୟ ସରକାର ଏବଂ କେନ୍ଦ୍ରକୁ ଦାବି କରୁଛି।
ଏହାପୂର୍ବରୁ ଜାନୁଆରୀ ୧୯ରେ ହାଇଦ୍ରାବାଦ ପୋଲିସ ଗତ ବର୍ଷ ଏକ ଧାର୍ମିକ ସମ୍ପ୍ରଦାୟ ବିରୋଧରେ ଆପତ୍ତିଜନକ ମନ୍ତବ୍ୟ ଦେଇ ଟି ରାଜା ସିଂଙ୍କୁ ନୋଟିସ ପଠାଇଥିଲା। ଗତ ବର୍ଷ ଟି ରାଜା ସିଂଙ୍କୁ ମଧ୍ୟ ଗିରଫ କରାଯାଇଥିଲା। ପ୍ରଫେଟ୍ ମହମ୍ମଦଙ୍କ ପ୍ରତି ଅପମାନଜନକ ମନ୍ତବ୍ୟ ଦେଇଥିବାରୁ ତାଙ୍କୁ ତେଲେଙ୍ଗାନା ପୋଲିସ ଗିରଫ କରିଥିଲା। ଯଦିଓ ପରେ ସେ ଜାମିନ ପାଇଥିଲେ। ଭାଜପା ତାଙ୍କୁ ନିଲମ୍ବିତ କରିଥିଲା।