ନୂଆଦିଲ୍ଲୀ,୧୮।୧୧: ଶ୍ରଦ୍ଧାଙ୍କୁ ତାଙ୍କ ଲିଭ୍-ଇନ୍ ପାର୍ଟନର ଅତି ନିର୍ମମ ଭାବେ ହତ୍ୟା କରିଥିବା ଘଟଣା ସାରା ଦେଶରେ ଚହଳ ସୃଷ୍ଟି କରିଛି। ଏହି ସମୟରେ କେନ୍ଦ୍ରମନ୍ତ୍ରୀ କୌଶଲ କିଶୋର ଏହି ଘଟଣା ଉପରେ ଏକ ବିବାଦୀୟ ମନ୍ତବ୍ୟ ଦେଇଛନ୍ତି। ଯାହାକୁ ନେଇ ସେ ଚର୍ଚ୍ଚ ପରିସରକୁ ଆସିଛନ୍ତି। ଏହି ହତ୍ୟାକାଣ୍ଡରେ କେନ୍ଦ୍ରମନ୍ତ୍ରୀ ଶିକ୍ଷିତ ଝିଅ ଏବଂ ଲିଭ୍-ଇନ୍ ରିଲେସନସିପ୍କୁ ଦାୟୀ କରିଛନ୍ତି। ସେ କହିଛନ୍ତି, ଏଭଳି ଘଟଣା ସେହି ଝିଅଙ୍କ ସହ ଘଟୁଛି ଯେଉଁମାନେ ଭଲ ଶିକ୍ଷିତ, ସେମାନେ ଭାବନ୍ତି ଯେ ସେମାନେ ଅତ୍ୟନ୍ତ ସ୍ପଷ୍ଟ ଏବଂ ସେମାନଙ୍କ ଭବିଷ୍ୟତ ବିଷୟରେ ନିଷ୍ପତ୍ତି ନେବାର କ୍ଷମତା ରହିଛି। ଏହାସହ ଆହୁରି ମଧ୍ୟ କହିଛନ୍ତି ଯେ, ଲିଭ୍-ଇନ୍ ରିଲେସନସିପ୍ରେ ରହିବା କ’ଣ ଦରକାର? ଯଦି ତାହା କରିବାକୁ ପଡିବ ତା’ହେଲେ ଲିଭ୍-ଇନ୍ ରିଲେସନସିପ୍ ପାଇଁ ଉପଯୁକ୍ତ ପଞ୍ଜୀକରଣ କରିବା ଉଚିତ୍। ଏଭଳି ରିଲେସନସିପ୍କୁ ମା’ବାପା ଯଦି ପ୍ରସ୍ତୁତ ନୁହନ୍ତି,ତେବେ କୋର୍ଟ ମ୍ୟାରେଜ୍ କରି ଏକାଠି ରହିବା ଉଚିତ୍। ତାଙ୍କର ଏଭଳି ବିବୃତ୍ତିକୁ ମଧ୍ୟ ଅନେକ ସମାଲୋଚନା ମଧ୍ୟ କରାଯାଉଛି।
