ନୂଆଦିଲ୍ଲୀ, ୩୦।୧: ବମ୍ବେ ହାଇକୋର୍ଟଙ୍କ ଏକ ବିବାଦୀୟ ରାୟକୁ ନେଇ ଦେଶରେ ଚର୍ଚ୍ଚା ପରେ ସୁପ୍ରିମ୍କୋର୍ଟ ମାମଲାରେ ସମ୍ପୃକ୍ତ ବିଚାରପତିଙ୍କ ସୁପାରିଶ ରୋକିଛନ୍ତି। ସୁପ୍ରିମ୍କୋର୍ଟ କଲେଜିୟମ୍ରେ ବମ୍ବେ ହାଇକୋର୍ଟର ବିଚାରପତି ପୁଷ୍ପା ଗାନେଡ଼ିଓ୍ବାଲାଙ୍କୁ ସ୍ଥାୟୀ ବିଚାରପତି କରାଯିବା ଲାଗି କେନ୍ଦ୍ର ସରକାରଙ୍କୁ ସୁପାରିଶ କରାଯାଇଥିଲା। ତେବେ ବିବାଦୀୟ ରାୟ ପରେ ସୁପ୍ରିମ୍କୋର୍ଟ କଲେଜିୟମ୍ ପକ୍ଷରୁ ଏଭି ନିଷ୍ପତ୍ତି ଗ୍ରହଣ କରାଯାଇଛି। ସୂଚନାଯୋଗ୍ୟ, ବମ୍ବେ ହାଇକୋର୍ଟର ନାଗପୁର ବେଞ୍ଚ୍ ପକ୍ଷରୁ ଏକ ମାମଲାର ବିଚାର କରାଯାଇ ପୋଷାକ ଉପରେ ହସ୍ତଚାଳନା କରିବା ଅଶ୍ଳୀଳ ଆଚରଣ ଅବା ଯୌନ ନିର୍ଯାତନା ନୁହେଁ ବୋଲି କୁହାଯାଇଥିଲା। ଶରୀର ସହିତ ଶରୀରର ସଂଯୋଗ ହେଲେ ହିଁ ଏହାକୁ ଯୌନ ନିର୍ଯାତନା କୁହାଯାଇ ପାରିବ ବୋଲି ବିଚାରପତି ପୁଷ୍ପା ଗାନେଡ଼ିଓ୍ବାଲାଙ୍କ ନେତୃତ୍ୱରେ ଗଠିତ ଖଣ୍ଡପୀଠ ରାୟ ଦେଇଥିଲେ। ଏହି ମାମଲାରେ ସେସନ୍ କୋର୍ଟ ୩୯ ବର୍ଷ ବୟସ୍କ ଅଭିଯୁକ୍ତଙ୍କୁ ୩ ବର୍ଷ ଜେଲ ଦଣ୍ଡାଦେଶ କରିଥିଲେ। ଅଭିଯୁକ୍ତ ଜଣେ ୧୨ ବର୍ଷ ବୟସ୍କା ନାବାଳିକାଙ୍କ ପୋଷାକ ଉପରେ ହସ୍ତଚାଳନା କରିଥିବା ଅଭିଯୋଗ ହୋଇଥିଲା। ପୋସ୍କୋ ଅଧିନିୟମ ଅନୁସାରେ ଏବଂ ଭାରତୀୟ ପିଙ୍ଗଳକୋଡ ଧାରା ୩୫୪ ଅନୁସାରେ ଏଭଳି ଅଭିଯୋଗରେ ଦୋଷୀ ସାବ୍ୟସ୍ତ ହେଲେ ଅଭିଯୁକ୍ତଙ୍କୁ ସର୍ବନିମ୍ନ ୩ ବର୍ଷ ପର୍ଯ୍ୟନ୍ତ ଜେଲ ଦଣ୍ଡାଦେଶ କରାଯାଇପାରେ। ୨୦୧୬ ଡିସେମ୍ବରରେ ଏହି ମାମଲା ଅଭିଯୁକ୍ତ ସତୀଶଙ୍କ ବିରୋଧରେ ରୁଜୁ ହୋଇଥିଲା। ୨୦୨୧ ଜାନୁୟାରୀ ୧୯ରେ ବିଚାରପତି ପୁଷ୍ପା ଗାନେଡ଼ିଓ୍ବାଲା ଯୌନ ନିର୍ଯାତନାର ନୂତନ ପରିଭାଷା ନେଇ ରାୟ ଦେଇଥିଲେ। ପୁଷ୍ପାଙ୍କ ପାଇଁ ସୁପ୍ରିମ୍କୋର୍ଟ କଲେଜିୟମ୍ ପକ୍ଷରୁ ଜାନୁୟାରୀ ୨୦ରେ କେନ୍ଦ୍ର ସରକାରଙ୍କୁ ସୁପାରିଶ୍ କରାଯିବା ଲାଗି ନିଷ୍ପତ୍ତି ଗ୍ରହଣ କରାଯାଇଥିଲା। ତେବେ ଏବେ ଏହା ଉପରେ ରୋକ ଲଗାଯାଇଛି।
