ଚମ୍ପୁଆ,୨୮ା୯(ଡି.ଏନ୍.ଏ): କେନ୍ଦୁଝର ଜିଲା ଚମ୍ପୁଆ ଥାନା ଅନ୍ତର୍ଗତ ରିମୂଳି ଫାଣ୍ଡି ଅଧୀନ ନିଶ୍ଚିନ୍ତପୁର ପଞ୍ଚାୟତର ଅମଳାଣିଗୋଡ଼ା ଗାଁରେ ଧର୍ମାନ୍ତରୀକରଣକୁ ନେଇ ଉତ୍ତେଜନା ଦେଖାଯାଇଛି। ପୂର୍ବତନ ଝୁମ୍ପୁରା ବ୍ଲକ୍ ଅଧ୍ୟକ୍ଷ ସଚିତ୍ର ମହାନ୍ତ, ଫାଣ୍ଡି ଅଧିକାରୀ ସନ୍ତୋଷ ନାୟକଙ୍କ ହସ୍ତକ୍ଷେପ ପରେ ଉଭୟ ପକ୍ଷଙ୍କ ସହମତିରେ ସମାଧାନ ହୋଇଛି। ପୋଲିସ ସୂଚନା ମୁତାବକ ପ୍ରଥମ ପକ୍ଷ ଶମ୍ଭୁ ମୁଣ୍ଡା, ରାମଚନ୍ଦ୍ର ମୁଣ୍ଡା, ଜଗଦିଶ୍ ମୁଣ୍ଡା, ବାଳାଇ ମୁଣ୍ଡା, ଘନଶ୍ୟାମ ମୁଣ୍ଡା ଆଦି ୮ ପରିବାର ଧର୍ମ ପରବିର୍ତ୍ତନ କରିଥିଲେ। ଏବେ ପ୍ରତି ରବିବାର ଧର୍ମାନୁଷ୍ଠାନରେ ସାମୂହିକ ପ୍ରାର୍ଥନା, ଗ୍ରାମ ବାହାରୁ ଲୋକ ଆସି ସେଠାରେ ରୁଣ୍ଡ ହେବାକୁ ଗ୍ରାମବାସୀ ବିରୋଧ କରିଆସୁଛନ୍ତି। ଏହାକୁ ନେଇ ଦୁଇ ପକ୍ଷଙ୍କ ମଧ୍ୟରେ ଉତ୍ତେଜନା ଦେଖାଯାଇଥିଲା। ଏ ନେଇ ରିମୂଳି ଫାଣ୍ଡିରେ ଅଭିଯୋଗ ପରେ ଫାଣ୍ଡି ଅଧିକାରୀ ନାଏକ ଆଇନ୍ଶୃଙ୍ଖଳା ପରିସ୍ଥିତି ଉପୁଜିବା ଆଶଙ୍କା କରି ଉଭୟ ପକ୍ଷକୁ ଡକାଇ ଆଲୋଚନା କରିବା ପରେ ଏହାର ସମାଧାନ ହୋଇଥିଲା। ଗ୍ରାମବାସୀଙ୍କ ମଧ୍ୟରେ ଅଙ୍ଗନଓ୍ବାଡ଼ି କର୍ମୀ ମୀନା ମହାନ୍ତ, ରମେଶ ମୁଣ୍ଡା, ଗାର୍ଦ୍ଦୀ ମୁଣ୍ଡା, ରାଜେଶ ଦିଗି, ମଙ୍ଗଲ ମୁଣ୍ଡା, ଈଶ୍ୱର ମୁଣ୍ଡା, ଅର୍ଜୁନ ମୁଣ୍ଡା, ଅଙ୍କୁରା ମୁଣ୍ଡା ପ୍ରମୁଖ ଆଲୋଚନାରେ ଉପସ୍ଥିତ ଥିଲେ।