କଲମ୍ବୋ,୧୩।୬ : ସମଲିଙ୍ଗୀ ସମ୍ପର୍କକୁ ଆଇନଗତ କରିବା ପାଇଁ ଶ୍ରୀଲଙ୍କାରେ ଏକ ବଡ଼ ବିବାଦ ଉପୁଜିଛି। ଏଥିପାଇଁ ଶ୍ରୀଲଙ୍କାର ରାନିଲ ବିକ୍ରମ ସିଙ୍ଘେ ସରକାର ଏକ ବିଲ ପ୍ରସ୍ତୁତ କରିଛନ୍ତି। କିନ୍ତୁ ଶ୍ରୀଲଙ୍କା ସଂସଦରେ ମତଭେଦ ହେବାର ସଙ୍କେତ ରହିଛି। ବିଭିନ୍ନ ଧାର୍ମିକ ଅନୁଷ୍ଠାନ ତଥା ଧାର୍ମିକ ନେତାଙ୍କ ପକ୍ଷରୁ ସରକାରଙ୍କ ଏହି ପଦକ୍ଷେପକୁ ତୀବ୍ର ବିରୋଧ କରାଯିବ ବୋଲି ପର୍ଯ୍ୟବେକ୍ଷକମାନେ ଆଶଙ୍କା ପ୍ରକାଶ କରିଛନ୍ତି।
ଏଭଳି ପରିସ୍ଥିତିରେ ମଧ୍ୟ ପ୍ରଶ୍ନ ଉଠିଛି ଯେଉଁ ସମୟରେ ରାଷ୍ଟ୍ରପତି ବିକ୍ରମ ସିଙ୍ଘେ ଦେଶରେ ଶୀଘ୍ର ନିର୍ବାଚନ କରି ନିଜ ପାଇଁ ଏକ ନୂତନ ଆଦେଶ ପାଇବାକୁ ପ୍ରସ୍ତୁତ ହେଉଛନ୍ତି, ସେତେବେଳେ ଶାସକ ଦଳର ଅଧିକାଂଶ ସାଂସଦ ଏହି ବିଲକୁ ସମର୍ଥନ କରିବେ କି?
ସଂସଦରେ ଏହି ବିଲ ଆଗତ କରିଥିବା ଶାସକ ଦଳ ଶ୍ରୀଲଙ୍କା ପୋଡୁଜାନା ପେରୁମୁନା ସାଂସଦ ସ୍ବୀକାର କରିଛନ୍ତି ଏହି ବିଲ ଉପରେ ଦଳର ଏକ ବିଭାଗରେ ବିରୋଧ ରହିଛି। କିନ୍ତୁ ଦଳର ଅନ୍ୟ ଏକ ଅଂଶ ଏହାକୁ ସମର୍ଥନ କରୁଛନ୍ତି ଏବଂ ଏହି ବିଲ ଶୀଘ୍ର ପାରିତ କରାଇବାକୁ ଚାହୁଁଛନ୍ତି।
ସାଂସଦ ପ୍ରେମନାଥ ଡୋଲାଭାଟ୍ଟା ଏହି ବିଲ ଆଗତ କରିଛନ୍ତି। ଶ୍ରୀଲଙ୍କା ସଂସଦର ୨୨୫ ସଦସ୍ୟ ଅଛନ୍ତି। ତେଣୁ ଏହି ବିଲ ପାରିତ ହେବା ପାଇଁ ଅତିକମରେ ୧୧୩ ସଦସ୍ୟଙ୍କ ସମର୍ଥନ ଆବଶ୍ୟକ। ଗଣମାଧ୍ୟମର ରିପୋର୍ଟ ଅନୁଯାୟୀ, ଏପର୍ଯ୍ୟନ୍ତ ବିଲ ସପକ୍ଷରେ ସଂଖ୍ୟାଗରିଷ୍ଠ ସମର୍ଥନ ମିଳିବାର କୌଣସି ସୂଚନା ନାହିଁ।
ଡୋଲାଭାଟ୍ଟା କହିଛନ୍ତି ବିରୋଧୀ ଦଳର ଅନେକ ସଦସ୍ୟ ମଧ୍ୟ ଏହି ବିଲକୁ ସମର୍ଥନ କରିଛନ୍ତି। ଏହା ସତ୍ତ୍ୱେ ଏପର୍ଯ୍ୟନ୍ତ ଏହାର ସପକ୍ଷରେ ସଂଗୃହିତ ସଦସ୍ୟଙ୍କ ସଂଖ୍ୟା ଏହାର ପାସ ପାଇଁ ଆବଶ୍ୟକ ସଦସ୍ୟଙ୍କ ତୁଳନାରେ ପ୍ରାୟ ୩୦ କମ ରହିଛି। କେତେକ ସଂଗଠନ, ବିଶେଷ କରି ଧାର୍ମିକ ଏବଂ ନାଗରିକ ସମାଜ ଏହାକୁ ବିରୋଧ କରୁଛନ୍ତି। କିନ୍ତୁ ଏହି ବିଲ ପାଇଁ ସରକାର ଏବଂ ବିରୋଧୀ ଦଳର ନେତୃତ୍ୱଙ୍କର ସମ୍ପୂର୍ଣ୍ଣ ସମର୍ଥନ ରହିଛି ବୋଲି ସେ ଦାବି କରିଛନ୍ତି।