ବେଙ୍ଗାଲୁରୁ,୧୯।୧୨ : କର୍ନାଟକ ବିଧାନସଭାରେ ବୀର ସାବରକରଙ୍କ ଫଟୋ ସ୍ଥାପନକୁ ନେଇ ଏକ ଅଡୁଆ ସୃଷ୍ଟି ହୋଇଛି। ଏହା ବିରୋଧରେ ବିରୋଧୀ ଦଳର ନେତା ସିଦ୍ଧରମୈୟା ଏବଂ ଅନ୍ୟ ନେତାମାନେ ବିଧାନସଭା ବାହାରେ ବିରୋଧ ପ୍ରଦର୍ଶନ କରିଛନ୍ତି।
କଂଗ୍ରେସ ନେତାମାନେ ଅଭିଯୋଗ କରିଛନ୍ତି ଯେ ଶାସକ ଦଳ ଭାଜପା ଚାହୁଁଛି ଯେ ଗୃହର ପ୍ରକ୍ରିୟା ଚାଲୁ ନ ହେଉ। ତେଣୁ ସେମାନେ ଜାଣିଶୁଣ ଏଭଳି ସମସ୍ୟା ଆଣି ବାଧାବିଘ୍ନ ସୃଷ୍ଟି କରୁଛନ୍ତି। କର୍ନାଟକ କଂଗ୍ରେସ ସଭାପତି ତଥା ବିଧାୟକ ଡି.କେ ଶିବକୁମାର କହିଛନ୍ତି ଯେ ସେମାନେ ସରକାରଙ୍କ ବିରୋଧରେ ଅନେକ ଦୁର୍ନୀତି ମାମଲା ଉଠାଇବାକୁ ଚାହୁଁଛନ୍ତି ତେଣୁ ସେମାନେ ଏହି ଫଟୋ ସ୍ଥାପନ କରି ବିବାଦ ସୃଷ୍ଟି କରିଛନ୍ତି। ସେମାନଙ୍କର ବିକାଶର କୌଣସି ଏଜେଣ୍ଡା ନାହିଁ।
କଂଗ୍ରେସ ନେତା ସିଦ୍ଧରମୈୟା ବାଚସ୍ପତିଙ୍କୁ ଏକ ଚିଠି ଲେଖି ବାଲ୍ମିକୀ, ବାସଭନ୍ନା, କ୍ନକ ଦାସ, ବି.ଆର. ଆମ୍ବେଡକର, ସର୍ଦ୍ଦାର ବଲ୍ଲଭଭାଇ ପଟେଲ ଏବଂ ଅନ୍ୟ ନେତାଙ୍କ ଫଟୋ ମଧ୍ୟ ରଖାଯିବା ଉଚିତ ବୋଲି ଅନୁରୋଧ କରିଛନ୍ତି।
ସିଦ୍ଧରମୈୟା ସାବରକାରଙ୍କୁ ଜଣେ ବିବାଦୀୟ ବ୍ୟକ୍ତିତ୍ୱ ବୋଲି ବର୍ଣ୍ଣନା କରିଛନ୍ତି। ସେ କହିଛନ୍ତି ଯେ ଏହି ଫଟୋର ଉନ୍ମୋଚନ ବିଷୟରେ ମୋତେ କୌଣସି ନିମନ୍ତ୍ରଣ ଦିଆଯାଇ ନାହିଁ। ଏହା ହେଉଛି ଭାଜପାର ବିବାଦୀୟ ଏଜେଣ୍ଡା। ମହାତ୍ମା ଗାନ୍ଧୀଙ୍କ ହତ୍ୟାରେ ସାବରକର ସମ୍ପୃକ୍ତ ଥିବା ସେ ଅଭିଯୋଗ କରିଛନ୍ତି।
ଏହା ପ୍ରଥମ ଘଟଣା ନୁହେଁ ଯେ ଦେଶରେ ସାବରକରଙ୍କୁ ନେଇ ବିବାଦ ଉପୁଜିଛି। ଏହା ପୂର୍ବରୁ ମଧ୍ୟ ତାଙ୍କ ବିଷୟରେ ଦେଶରେ ଅନେକ ବିବାଦ ଉପୁଜିଥିଲା। ନିକଟରେ କଂଗ୍ରେସ ନେତା ରାହୁଲ ଗାନ୍ଧୀ କହିଥିଲେ ଯେ ଦେଶରେ ସାବରକର ଏବଂ ଅନ୍ୟ ପଟେ ମହାତ୍ମା ଗାନ୍ଧୀଙ୍କ ଚିନ୍ତାଧାରା ମଧ୍ୟରେ ଲଢ଼େଇ ହେଉଛି।