କୋଲକାତା,୧୭।୨ : ସାଧାରଣତଃ ଦାମ୍ପତ୍ୟ ଜୀବନରେ ସ୍ତ୍ରୀ ସ୍ବାମୀଙ୍କ ମଧ୍ୟରେ ଝଗଡା, ପାରିବାରିକ ହିଂସା, ନିର୍ଯାତନା, ଆକ୍ରମଣ, ଦୁର୍ନୀତି ମାମଲା ହାଇକୋର୍ଟଙ୍କ ଦ୍ୱାରରେ ପହଞ୍ଚିଥାଏ। କିନ୍ତୁ ହାଇକୋର୍ଟରେ ନାମକୁ ନେଇ ଏକ ବିବାଦ ଏବେ କୋଲକାତା ହାଇକୋର୍ଟରେ ପହଞ୍ଚସିଛି। ସୀତା ଏବଂ ଆକବର ନାମକୁ ନେଇ ଏହି ବିବାଦ ଦେଖାଦେଇଛି ଏବଂ ବିରୋଧୀମାନେ ମଧ୍ୟ ହାଇକୋର୍ଟରେ ଆବେଦନ କରିଛନ୍ତି। ୧୬ ଫେବୃଆରୀରେ ଜଷ୍ଟିସ ସୌଗତ ଭଟ୍ଟାଚାର୍ଯ୍ୟଙ୍କ ବେଞ୍ଚରେ ଏହି ଆବେଦନ କରାଯାଇଥିଲା ଯାହାର ଶୁଣାଣି ୨୦ ଫେବୃଆରୀରେ ହେବ। ନାମ ପରିବର୍ତ୍ତନ କରାଯିବାକୁ ଆବେଦନ କରାଯାଇଛି। ଏହି କଥାଟି ଦୁଇ ନୀରିହ କଥା କହି ପାରୁ ନ ଥିବା ପ୍ରାଣୀଙ୍କ ସହ ଜଡିତ ।
ବାସ୍ତବରେ, ପଶ୍ଚିମବଙ୍ଗର ସିଲିଗୁଡିରେ ଏହି ବିବାଦ ହେଉଛି ସିଂହୀ ଏବଂ ସିଂହଙ୍କ ନାମକୁ ନେଇ। ସିଂହର ନାମ ଆକବର ଏବଂ ସିଂହୀର ନାମ ସୀତା। ନିକଟରେ ଉଭୟଙ୍କୁ ତ୍ରିପୁରାର ସେପାହିଜାଲା ପ୍ରାଣୀ ଉଦ୍ୟାନରୁ ଅଣାଯାଇ ସିଲିଗୁଡି ଜଙ୍ଗଲରେ ରଖାଯାଇଥିଲା, କିନ୍ତୁ ବିଶ୍ୱ ହିନ୍ଦୁ ପରିଷଦ ସେମାନଙ୍କ ନାମକୁ ବିରୋଧ କରିଛି। ହିନ୍ଦୁ ଏବଂ ମୁସଲମାନ ନାମ ସହିତ ସିଂହ ଏବଂ ସିଂହୀ କିପରି ଏକାଠି ରହିପାରିବେ? ଏହି ପ୍ରଶ୍ନ ଉଠାଇ ବିଶ୍ୱ ହିନ୍ଦୁ ପରିଷଦ ପକ୍ଷରୁ ବିରୋଧ କରାଯାଇଛି। ଭିଏଚପି ସଦସ୍ୟମାନେ କହିଛନ୍ତି ‘ଆକବର’ର ମହିଳା ପାର୍ଟନରକୁ ‘ସୀତା ’ବୋଲି କହିବା ହିନ୍ଦୁ ଧର୍ମକୁ ଅପମାନ କରିବା ପରି। ତେଣୁ ନାମ ପରିବର୍ତ୍ତନ କରିବାକୁ ଏକ ଦାବି କରାଯାଇଛି।
ରାଜ୍ୟ ଜଙ୍ଗଲ ଅଧିକାରୀ ଏବଂ ସଫାରି ପାର୍କ ନିର୍ଦ୍ଦେଶକ ଏହି ମାମଲାରେ ପକ୍ଷଭୁକ୍ତ ହୋଇଛନ୍ତି। ବନ ଅଧିକାରୀ କହିଛନ୍ତି ସିଲିଗୁଡି ଆଣିବା ପୂର୍ବରୁ ସିଂହ ଓ ସିଂହୀଙ୍କ ନାମ ପୂର୍ବରୁ ଦିଆଯାଇଥିଲା। ପ୍ରଥମ ଥର ପାଇଁ ଦେଶରେ ବନ୍ୟ ପ୍ରାଣୀଙ୍କ ନାମକୁ ନେଇ ବିବାଦ ଦେଖାଦେଇଛି ଏବଂ ଏହା ହାଇକୋର୍ଟରେ ପହଞ୍ଚିଛି।
ଏହି ମାମଲାରେ ପଶ୍ଚିମବଙ୍ଗର ମମତା ବାନାର୍ଜୀଙ୍କ ସରକାରଙ୍କୁ ସିଧାସଳଖ ଉତ୍ତର ଦେବାକୁ ପଡିପାରେ ବୋଲି ଚର୍ଚ୍ଚା ହେଉଛି। ଯେତେବେଳେ ଭିଏଚପିର ଜାତୀୟ ମୁଖପାତ୍ର ବିନୋଦ ବନସାଲ ଏକ ଟୁଇଟ ଲେଖି ଏହି ଘଟଣାକୁ ଆଶ୍ଚର୍ଯ୍ୟଜନକ ବୋଲି କହିଛନ୍ତି। ସେ ଲେଖିଛନ୍ତି ହିନ୍ଦୁ ମୁସଲମାନମାନଙ୍କୁ ସିଂହ ଏବଂ ସିଂହୀ ନାମ କିଏ ଦେଇଛି ତାହା ନିଶ୍ଚୟ ଜଣା ପଡିବ। ଏହା ହିନ୍ଦୁମାନଙ୍କ ଭାବନାକୁ ଆଘାତ ଦେଇଛି।