ଆନନ୍ଦପୁର,୫ା୪(ସ୍ବ.ପ୍ର.): ଆନନ୍ଦପୁର ପୌରପରିଷଦ ଫକୀରପୁରଠାରେ ଥିବା ବାଲୁଙ୍କେଶ୍ୱର ମନ୍ଦିରର ନୂତନ ପରିଚାଳନା କମିଟିକୁ ନେଇ ବିବାଦୀୟ ପରିସ୍ଥିତି ସୃଷ୍ଟି ହୋଇଛି। ଦୀର୍ଘ ୨୦ ବର୍ଷ ପରେ ଗଠିତ ହୋଇଥିବା କମିଟିକୁ ଚଞ୍ଚକତାପୂର୍ଣ୍ଣ ଭାବେ କରାଯାଇଥିବା ଅଭିଯୋଗ ହୋଇଛି। ୪ ଓ୍ବାର୍ଡ ବିଶିଷ୍ଟ ଫକୀରପୁର ଗ୍ରାମରୁ କେବଳ ଗୋଟିଏ ଓ୍ବାର୍ଡ ତଥା ୧୧ ନଂରୁ ଲୋକଙ୍କୁ ପରିଚାଳନା କମିଟିର ସଦସ୍ୟ ଭାବେ ଚୟନ କରାଯାଇଥିବା ଅଭିଯୋଗ ହୋଇଛି। ଯାହାକୁ ନେଇ ଅସନ୍ତୋଷ ପ୍ରକାଶ ପାଇବା ସହିତ ଆନନ୍ଦପୁର ଉପଜିଲାପାଳଙ୍କ କାର୍ଯ୍ୟାଳୟରେ ଗ୍ରାମବାସୀଙ୍କ ପକ୍ଷରୁ ବୁଧବାର ଅଭିଯୋଗ ପତ୍ର ପ୍ରଦାନ କରାଯାଇଛି। ବାଲୁଙ୍କେଶ୍ୱର ମନ୍ଦିରରେ ଦୀର୍ଘ ୨୦ବର୍ଷରୁ ଊର୍ଦ୍ଧ୍ୱ ହେବ ପରିଚାଳନା କମିଟି ଗଠନ ହୋଇପାରିନାହିଁ। ଏ ସମ୍ପର୍କରେ ପୂର୍ବରୁ ଜିଲାପାଳଙ୍କ କାର୍ଯ୍ୟାଳୟରେ ବହୁବାର ଅଭିଯୋଗ କରିବା ସହିତ କୋଠ ତହସିଲଦାରଙ୍କୁ ମଧ୍ୟ ଜଣାଇଥିବା କହିଛନ୍ତି ଗ୍ରାମବାସୀ। ନିକଟରେ ମନ୍ଦିର ପରିଚାଳନା କମିଟି ଗଠନ ହୋଇଥିବା ସମ୍ପର୍କରେ ଗ୍ରାମବାସୀଙ୍କୁ ସୂଚନା ଦିଆଯାଇ ନ ଥିବା ସହିତ କେବଳ ଗୋଟିଏ ଓ୍ବାର୍ଡ ୧୧କୁ ନେଇ କମିଟି ଗଠନ ହୋଇଥିବା ଗ୍ରାମର ନରେନ୍ଦ୍ର ପଣ୍ଡା, ଶ୍ରୀଧର ମଳିକ, ବିଜୁ ସାହୁ, ମହେଶ୍ୱର ମହାନ୍ତି ପ୍ରମୁଖ ଅଭିଯୋଗ କରିଛନ୍ତି। ଏପରିକି ସମ୍ପୃକ୍ତ କମିଟିକୁ ଭଙ୍ଗାଯାଇ ସମସ୍ତ ଗ୍ରାମବାସୀଙ୍କ ଉପସ୍ଥିତରେ ନୂତନ କମିଟି ଗଠନ ହେଉ ବୋଲି ସେମାନେ ଦାବି କରିଛନ୍ତି।