ମୋରଡା,୧୧।୮(ସ୍ମାରକ ମାଜୀ): ୫-ଟି ସଚିବ ଭି.କେ. ପାଣ୍ଡିଆନଙ୍କ ଶନିବାର ମୟୂରଭଞ୍ଜ ଜିଲା ମୋରଡ଼ା ଗସ୍ତ କାର୍ଯ୍ୟକ୍ରମ ରହିଛି। ଏହି ପରିପ୍ରେକ୍ଷୀରେ ପ୍ରଶାସନ ପକ୍ଷରୁ ବ୍ଲକର ଚିତ୍ରଡ଼ାସ୍ଥିତ ପାଟପୁର ମିନି ଷ୍ଟାଡିୟମରେ କାର୍ଯ୍ୟକ୍ରମ ପାଇଁ ବ୍ୟାପକ ବ୍ୟବସ୍ଥା କରାଯାଇଛି। ହେଲେ ମିନି ଷ୍ଟାଡିୟମର ନାମକରଣକୁ ବିରୋଧ କରିଛନ୍ତି ଗ୍ରାମବାସୀ l
ମିଳିଥିବା ସୂଚନା ଅନୁଯାୟୀ, ସରକାରୀ କାର୍ଯ୍ୟକ୍ରମ ନୋଟିସରେ ଉକ୍ତ ଷ୍ଟାଡିୟମର ନାମ ପାଟପୁର ମିନି ଷ୍ଟାଡ଼ିୟମ ବଦଳରେ ଏସ୍ଏସ୍ବି ଇଞ୍ଜିନିୟରିଂ କଲେଜ ଖେଳପଡ଼ିଆ ଲେଖାଯାଇଛି। ଯାହାକୁ ପାଟପୁର ଗ୍ରାମବାସୀ ବିରୋଧ କରିଛନ୍ତି l କେଉଁ ଉଦ୍ଦେଶ୍ୟରେ ଏଭଳି ନାମକରଣ କରାଗଲା ବୋଲି ଗ୍ରାମବାସୀ ପ୍ରଶ୍ନ କରିଛନ୍ତି ।
ଦୀର୍ଘ ବର୍ଷ ଧରି ପଡ଼ିଆର ନାମ ପାଟପୁର ଖେଳପଡ଼ିଆ ଥିବାବେଳେ ଏପରି ଘଟଣା ଗ୍ରାମବାସୀଙ୍କ ସ୍ବାଭିମାନକୁ ଆଘାତ ଦେଇଛି ବୋଲି ଗ୍ରାମର ବୀରେନ୍ଦ୍ର କୁମାର ଦାଶ, ମୀନକେତନ ବେହେରା, ମଧୁସୂଦନ ରାଉଳ, ସୁରୋଚନା ମାରାଣ୍ଡି, ସାରାଣୀ ପଳାଇ, ସଞ୍ଜୟ ବେହେରା, ପ୍ରଦ୍ୟୁମ୍ନ ରଣା, ମଞ୍ଜୁଲତା ବେହେରା ପ୍ରମୁଖ କହିଛନ୍ତି। ତେବେ କାର୍ଯ୍ୟକ୍ରମକୁ ଗ୍ରାମବାସୀ ସ୍ବାଗତ କରିଛନ୍ତି। ହେଲେ ନାମକରଣକୁ ସଂଶୋଧନ କରା ନ ଗଲେ ଏହାର ପ୍ରତିବାଦ କରାଯିବ ବୋଲି ଗ୍ରାମବାସୀ ଚେତାବନୀ ଦେଇଛନ୍ତି l
ଏନେଇ ବ୍ଲକ ବିଜେଡି ସଭାପତି ଜୟପ୍ରକାଶ ରାଉଳ କହିଛନ୍ତି, ଏହି ବାବଦରେ ସେ ଆଗରୁ ଅବଗତ ନ ଥିଲେ, ଗ୍ରାମବାସୀ କହିବାରୁ ଜାଣିବାକୁ ପାଇଲେ। ଏହାର ସଂଶୋଧନ କରିବା ପାଇଁ ବ୍ୟବସ୍ଥା କରିବାକୁ କହିଥିଲେ।