ଭୁବନ, ୧୦ା୪(ଡି.ଏନ୍.ଏ.) – ଗୁରୁ ଏବଂ ଶିଷ୍ୟ ମଧ୍ୟରେ ସମ୍ପର୍କ କେଉଁ ଅନାଦିକାଳର। ଶିକ୍ଷାନୁଷ୍ଠାନରେ ଛାତ୍ରୀଛାତ୍ର ଏବଂ ଶିକ୍ଷକଙ୍କ ମଧ୍ୟରେ ସମନ୍ବୟ ରହିଲେ ଶିକ୍ଷାର ମାନ ବୃଦ୍ଧି ପାଇବ ବୋଲି କହିଛନ୍ତି ଭୁବନ ଏନ୍ଏସି ଅଧ୍ୟକ୍ଷ ଶୁଭେନ୍ଦୁ ସାହୁ। ନୂଆ ଭୁବନ ନୋଡାଲ ହାଇସ୍କୁଲରେ ଶନିବାର ଆୟୋଜିତ ପ୍ରତିଭା ସମ୍ମାନ ସମାରୋହରେ ମୁଖ୍ୟ ଅତିଥି ଭାବେ ଯୋଗଦେଇ ସେ ଏହା କହିଛନ୍ତି।
ସ୍କୁଲ ପରିଚାଳନା କମିଟି ସଭାପତି ବିପିନ ବିହାରୀ ସେଠୀଙ୍କ ସଭାପତିତ୍ୱରେ ବ୍ଲକ ଅଧ୍ୟକ୍ଷା ସିପ୍ରା ବରାଳ ମୁଖ୍ୟ ବକ୍ତା ଭାବେ ଯୋଗଦେଇ ପାଠପଢ଼ା ଉପରେ ଗୁରୁତ୍ୱ ଦେଇ ସୁନାଗରିକ ହେବାକୁ ଛାତ୍ରୀଛାତ୍ରଙ୍କୁ ପରାମର୍ଶ ଦେଇଥିଲେ। ପୂର୍ବତନ ଅଧ୍ୟକ୍ଷ ଧର୍ମାନନ୍ଦ ବରାଳ, ଏନ୍ଏସି ଉପାଧ୍ୟକ୍ଷା ମାନିନି ସାହୁ, ଏବିଇଓ ରାଜଲକ୍ଷ୍ମୀ ଟୁଡୁ ସମ୍ମାନିତ ଅତିଥି ଭାବେ ଉପସ୍ଥିତ ରହି କରୋନା ମହାମାରୀ କିପରି ଶିକ୍ଷାକୁ ପ୍ରଭାବିତ କରିଛି ଏବଂ ଏଥିରୁ ମୁକୁଳିବାର ବାଟ ବିଷୟରେ ଆଲୋଚନା କରିଥିଲେ। ଏହି ଅବସରରେ ଭୁବନ ଏନ୍ଏସିର ବିଭିନ୍ନ ସ୍କୁଲର ୧୦ ପ୍ରତିଭାସମ୍ପନ୍ନ ଛାତ୍ରୀଛାତ୍ରଙ୍କୁ ସମ୍ମାନିତ କରାଯାଇଥିଲା। ପଠାଣି ସାମନ୍ତ ମେଧାବୃତ୍ତି ପରୀକ୍ଷାରେ କୃତିତ୍ୱ ଅର୍ଜନ କରିଥିବା ବୈଷ୍ଣବୀ ପୃଷ୍ଟି, ଦିବ୍ୟଶକ୍ତି ବେହେରା, ଶୁଭଲକ୍ଷ୍ମୀ ସାହୁ, ରୋଜାଲିନ୍ ପୃଷ୍ଟି, ଝରଣା ସାହୁ, ସୋମ୍ୟରଞ୍ଜନ ସାହୁ, ବାଦଲ ପଣ୍ଡା, ଓମ୍ପ୍ରକାଶ ସାହୁ, ଜାତୀୟ ମେଧା ଅନ୍ବେଷଣରେ କୃତିତ୍ୱ ହାସଲ କରିଥିବା ଶୁଭମ୍ ସୂର୍ଯ୍ୟାଂଶୁ ସାହୁ ଏବଂ ଏନ୍ଏସ୍ଏସ୍ଏସ୍ ବୃତ୍ତିରେ କୃତିତ୍ୱ ଲାଭ କରିଥିବା ଆଲୋକ ପୃଷ୍ଟି ସମ୍ମାନିତ ହୋଇଥିଲେ। ମୋ’ ସ୍କୁଲ ଅଭିଯାନ ପାଇଁ ସର୍ବାଧିକ ସହାୟତା ଦେଇଥିବା ପୁରାତନ ଛାତ୍ର ଅମ୍ବୁଜ କୁମାର ସାହୁଙ୍କୁ ସମ୍ବର୍ଦ୍ଧିତ କରାଯାଇଥିଲା। ପ୍ରଧାନ ଶିକ୍ଷକ ବିଜୟ ଆଚାର୍ଯ୍ୟ, ବିଜ୍ଞାନ ଶିକ୍ଷକ ଖଗେଶ୍ବର ବେହେରା, ସହକାରୀ ଶିକ୍ଷକ ଗୁରୁ ପ୍ରସାଦ ମିଶ୍ର ପ୍ରମୁଖ କାର୍ଯ୍ୟକ୍ରମ ପରିଚାଳନା କରିଥିଲେ। ଛାତ୍ରୀଛାତ୍ରଙ୍କ ଦ୍ୱାରା ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯାଇଥିଲା।
