ବ୍ରାସିଲିଆ,୭।୭: ସ୍ଥାନୀୟ ମାନେ ଗାରିଞ୍ଚା ଷ୍ଟାଡିୟମରେ କୋପା ଆମେରିକା ଫୁଟବଲ ଟୁର୍ନାମେଣ୍ଟର ଦ୍ୱିତୀୟ ସେମିଫାଇନାଲରେ ଲିଓନେଲ ମେସିଙ୍କ ଆର୍ଜେଣ୍ଟିନା ଓ କଲମ୍ବିଆ ପରସ୍ପରକୁ ଭେଟିବେ। ଆର୍ଜେଣ୍ଟିନା ସୁପରଷ୍ଟାର ମେସିଙ୍କ ଉପରେ ଓ କଲମ୍ବିଆ ଗୋଲକିପର ଡେଭିଡ ଓସ୍ପିନାଙ୍କ ଉପରେ ଅତ୍ୟଧିକ ଭାବେ ନିର୍ଭରଶୀଳ ହୋଇପଡିଛନ୍ତି। ବିଜୟୀ ହେଲେ ଆର୍ଜେଣ୍ଟିନା ଫାଇନାଲରେ ପାରମ୍ପରିକ ପ୍ରତିଦ୍ୱନ୍ଦ୍ୱୀ ବ୍ରାଜିଲକୁ ଭେଟିବ। ମେସି ମଧ୍ୟ ଆର୍ଜେଣ୍ଟିନା ପାଇଁ ପ୍ରଥମ ଅନ୍ତର୍ଜାତୀୟ ଟାଇଟଲ ଅପେକ୍ଷାରେ ରହିଛନ୍ତି। ୧୯୯୩ ପରେ ଆର୍ଜେଣ୍ଟିନା କୋପା ଆମେରିକା ଟାଇଟଲ ହାସଲ କରିପାରି ନାହିଁ। ଅନ୍ୟପଟେ କଲମ୍ବିଆ ୨୦୦୧ରେ ତା’ର ଏକମାତ୍ର କୋପା ଟାଇଟଲ ହାସଲ କରିଥିଲା।
ଟୁର୍ନାମେଣ୍ଟରେ ମେସି ଏ ପର୍ଯ୍ୟନ୍ତ ଜବରଦସ୍ତ ଫର୍ମରେ ରହିଛନ୍ତି। ୪ଟି ଗୋଲ ସ୍କୋର କରିବା ସହ ସେ ୪ ଗୋଲରେ ଆସିଷ୍ଟ କରିଛନ୍ତି। ମେସି ଏପର୍ଯ୍ୟନ୍ତ ସର୍ବାଧିକ ଗୋଲ ସ୍କୋର କରି ସମସ୍ତଙ୍କ ଆଗରେ ରହିଛନ୍ତି। ଇକ୍ୱେଡର ବିପକ୍ଷ କ୍ୱାର୍ଟର ଫାଇନାଲରେ ସେ ଅନ୍ତିମ ମୁହୂର୍ତ୍ତରେ ଫ୍ରିକିକ୍ ଜରିଆରେ ଚମତ୍କାର ଗୋଲ ଦେଇଥିଲେ ଓ ଆର୍ଜେଣ୍ଟିନା ୩-୦ ଗୋଲରେ ବିଜୟୀ ହୋଇଥିଲା।
କଲମ୍ବିଆ ଏକ ଶକ୍ତିଶାଳୀ ଦଳ ଓ ସେମିରେ ଏହା କଡ଼ା ଚ୍ୟାଲେଞ୍ଜ ଦେବ ବୋଲି ଆର୍ଜେଣ୍ଟିନା କୋଚ୍ ଲିଓନେଲ ସ୍କାଲୋନୀ କହିଛନ୍ତି। ଗତ ୧୮ଟି ମ୍ୟାଚ୍ରେ ଆର୍ଜେଣ୍ଟିନା ଅପରାଜେୟ ରହିଛି। ତେଣୁ ସ୍ଥିର ପ୍ରଦର୍ଶନ କରିବାକୁ ପ୍ରୟାସ କରିବୁ ବୋଲି ସ୍କାଲୋନୀ କହିଛନ୍ତି। ସେହିପରି ଆର୍ଜେଣ୍ଟିନା ଏକ ଶକ୍ତିଶାଳୀ ଦଳ ଓ ଫୁଟ୍ବଲ ସୁପରପାଓ୍ବାର ବୋଲି କଲମ୍ବିଆ କୋଚ୍ ରେନାଲ୍ଡୋ ରୁଏଡା କହିଛନ୍ତି। ତେବେ କେବଳ ମେସି ନୁହନ୍ତି ପୂରା ଆର୍ଜେଣ୍ଟିନାକୁ ଚକ୍ମା ଦେବାକୁ ପ୍ରୟାସ କରିବୁ। ଏହା ଆମ ପାଇଁ ଫାଇନାଲ ସଦୃଶ ହୋଇଛି। ଆମେ ୧୦୦ ପ୍ରତିଶତ ପ୍ରଦର୍ଶନ କରିବାକୁ ଚେଷ୍ଟା କରିବୁ ବୋଲି ରୁଏଡା କହିଛନ୍ତି।
