ବ୍ରାସିଲିଆ,୧୦।୭: କୋପା ଆମେରିକା ଟୁର୍ନାମେଣ୍ଟର ଫାଇନାଲ ମୁକାବିଲାରେ ବ୍ରାଜିଲ ଓ ଆର୍ଜେଣ୍ଟିନା ପରସ୍ପରକୁ ଭେଟିବା ନିଶ୍ଚିତ ହୋଇଛି। ଶନିବାର ରାତିରେ ଟାଇଟଲ ପାଇଁ ଦୁଇ ଫୁଟ୍ବଲ ପାଓ୍ବାର ହାଉସ ମୁକାବିଲାରେ ଅବତୀର୍ଣ୍ଣ ହେବେ। ସେହିପରି ତୃତୀୟ ସ୍ଥାନ ପାଇଁ ଏବେ ସେମିଫାଇନାଲ ଦୁଇ ପରାଜିତ ଦଳ ପେରୁ ଓ କଲମ୍ବିଆ ଶନିବାର ପରସ୍ପରକୁ ଭେଟିବେ। ସମ୍ମାନ ପାଇଁ ଲଢେଇ କରିବାକୁ ଯାଉଥିବା ଏହି ଦୁଇ ଦେଶ ବିଜୟ ସହ ଟୁର୍ନାମେଣ୍ଟରେ ଅଭିଯାନ ଶେଷ କରିବା ଲକ୍ଷ୍ୟରେ ରହିଛନ୍ତି।
ଫାଇନାଲ ପୂର୍ବରୁ ସ୍ଥାନୀୟ ମାନେ ଗାରିଞ୍ଚା ଷ୍ଟାଡିୟମରେ ଖେଳାଯିବାକୁ ଥିବା ମ୍ୟାଚ ଉପରେ ସମସ୍ତଙ୍କ ନଜର ରହିଛି। ବିଜୟୀ ହୋଇ ଦୁଇ ଦଳ ପୁଣି ଥରେ ସେପ୍ଟେମ୍ବରରେ ବିଶ୍ୱକପ୍ କ୍ୱାଲିଫାୟର୍ସକୁ ପ୍ରତ୍ୟାବର୍ତ୍ତନ କରିବେ। ଆସନ୍ତା ବର୍ଷ କାତାରରେ ଫିଫା ବିଶ୍ୱକପ୍ ଆୟୋଜନ ହେବାକୁ ଯାଉଥିବା ବେଳେ ଦୁଇ ଦଳ ଏବେଠାରୁ ପ୍ରସ୍ତୁତି ଆରମ୍ଭ କରିବା ଲକ୍ଷ୍ୟରେ ରହିଛନ୍ତି। ବ୍ରାଜିଲ ଓ ଆର୍ଜେଣ୍ଟିନା ପରେ ଦକ୍ଷିଣ ଆମେରିକାରେ ଶ୍ରେଷ୍ଠ ତୃତୀୟ ଦଳ ହେବା ମଧ୍ୟ ଏକ ବଡ଼ ସଫଳତା ବୋଲି କଲମ୍ବିଆ କୋଚ ରେଇନାଲ୍ଡୋ ରୁଏଡା କହିଛନ୍ତି। ସାଉଥ ଆମେରିକାନ ବିଶ୍ୱକପ୍ କ୍ୱାଲିଫାୟର୍ସରେ କଲମ୍ବିଆ ଏବେ ପଞ୍ଚମ ସ୍ଥାନରେ ରହିଛି ଓ ବିଶ୍ୱକପ୍ ଯୋଗ୍ୟତା ହାସଲ ପାଇଁ କେତେପାଦ ଦୂରରେ ରହିଛି। ବ୍ରାଜିଲ, ଆର୍ଜେଣ୍ଟିନା, ଇକ୍ୱେଡର, ଉରୁଗୁଏ ବିଶ୍ୱକପ୍ ଯୋଗ୍ୟତା ହାସଲ କରିସାରିଛନ୍ତି।
ଅନ୍ୟପଟେ ପେରୁ କିନ୍ତୁ ଦକ୍ଷିଣ ଆମେରିକା ବିଶ୍ୱକପ୍ କ୍ୱାଲିଫାୟର୍ସ ତାଲିକାର ଦଶମ ତଥା ଅନ୍ତିମ ସ୍ଥାନରେ ରହିଛ। ୨୦୧୮ ବିଶ୍ୱକପ୍ ହିରୋ ରିକାର୍ଡୋ ଗାରେକା ଏବେ ପେରୁର କୋଚ୍ ରହିଛନ୍ତି ଓ ସେ ତାଙ୍କ ଚମକ ହରାଇବା ଭଲି ଲାଗୁଛନ୍ତି। ଗ୍ରୁପ୍ ପର୍ଯ୍ୟାୟରେ ପେରୁ ୨-୧ ଗୋଲରେ କଲମ୍ବିଆକୁ ହରାଇଥିଲା। ତେଣୁ କଲମ୍ବିଆ ଏହାର ପ୍ରତିଶୋଧ ନେବାକୁ ପ୍ରୟାସ କରିବ। ଗ୍ରୁପ୍ ପର୍ଯ୍ୟାୟରେ କଲମ୍ବିଆ ବ୍ରାଜିଲକୁ ଓ ସେମିଫାଇନାଲରେ ଆର୍ଜେଣ୍ଟିନାକୁ ବେଶ୍ ସମସ୍ୟାରେ ପକାଇଥିଲା। ଅନ୍ତିମ ମୁହୂର୍ତ୍ତରେ ବ୍ରାଜିଲ ୨-୧ ଗୋଲରେ ବିଜୟୀ ହୋଇଥିବା ବେଳେ ବିଜୟୀ ହେବା ପାଇଁ ଆର୍ଜେଣ୍ଟିନାକୁ ପେନାଲ୍ଟି ଶୁଟ୍ ଆଉଟର ସହାୟତା ନେବାକୁ ପଡିଥିଲା। ଅନ୍ୟପଟେ ପେରୁ ଗ୍ରୁପ୍ ପର୍ଯ୍ୟାୟରେ ବ୍ରାଜିଲଠାରୁ ୪-୦ ଗୋଲରେ ହାରିଥିଲା। କିନ୍ତୁ ଏହାପରେ ପେରୁ ଜବରଦସ୍ତ ପ୍ରତ୍ୟାବର୍ତ୍ତନ କରି କଲମ୍ବିଆ ଓ ଭେନିଜୁଏଲା ଭଳି ଦଳକୁ ହରାଇ କ୍ୱାର୍ଟର ଫାଇନାଲରେ ପ୍ରବେଶ କରିଥିଲା ଏବଂ ପାରାଗୁଏକୁ ପେନାଲ୍ଟିରେ ହରାଇ ସେମିଫାଇନାଲରେ ପ୍ରବେଶ କରିଥିଲା। ପେରୁ ଦଳରେ ଜିଆନଲୁକା ଲାପାଡୁଲାଙ୍କ ଭଳି ଜଣେ ପ୍ରତିଭାସମ୍ପନ୍ନ ଷ୍ଟ୍ରାଇକର ରହିଛନ୍ତି। ଖ୍ରୀଷ୍ଟିଆନ ଗୁଏଭା ଓ ଆନ୍ଦ୍ରେ କାରିଲୋଙ୍କ ସହ ତାଙ୍କର ଭାଗୀଦାରି ବେଶ୍ ଉପାଦେୟ ସାବ୍ୟସ୍ତ ହୋଇଛି।